1, 2. ¿Kenon uelis techpaleuis Romanos 5:12?

ROMANOS 5:12 kijtoua: “Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli. Niman aman nochimej mikiskej pampa nochimej tlajtlakouaj”. Yejuin se texto tlen melak kuajli tikixmatij niman miyekpa tiktekitiltiaj ijkuak tikinmachtiaj tlaltikpakchanejkej itech Biblia.

² Yejon texto miyekpa uajnestiuj ipan amoxtli ¿Tlenon melauak temachtia Biblia? niman ijkuak tomachtiaj ipan tlaxelojli ueyi 3, 5 niman 6 iuan tokoneuan niman oksekimej, kanaj tikpouaj Romanos 5:12. Kanaj ueliskia tijkuiskej yejuin tlaxelojli pitentsin ika tikinpaleuiskej makasikamatikan tleka aman tlaltikpaktli xse xochitlalpan, tleka nonekiya tlaxtlauijli niman tleka timikij. San ika, yejuin tlaxelojli pitentsin noijki uelis techpaleuis tinochimej ok melak matiktlasojkamatikan ika kuajli touikaj iuan Jehová. Niman yejon kichiuas matiknektokan ika nochi toyojlo tikyolpaktiskej niman tikchiatoskej ika pakilistli tlen yejua yotechijli kichiuas.

3. ¿Tleka noneki matikilnamikikan kenon tejuamej?

 ³ Teyolkoko, pampa tinochimej titlajtlakolejkej. Mojmostla topopolouaj. San ika, Jehová yejua teikneliani. Yejua kimati ika titlajtlakolejkej niman kinektika techtlapopoluis (Salmo 103:13, 14). Jesús techijlia ika noneki matiktlajtlanilikan toTajtsin makitlapopolui totlajtlakoluan (Lucas 11:2-4). Ijkuak Jehová techtlapopoluiya itech tlen otikchiujkej yeuejkaui, xnoneki ok matitlanemilijtokan itech tlen otopopolojkej. Matikitakan kenon Jehová ueli techtlapopoluiya.

4, 5. a) ¿Tlenon techpaleuis matikasikamatikan Romanos 5:12? b) ¿Tlenon kijtosneki “iteiknelilis” tlen xtechmelaua?

⁴ Amoxtli Romanos, ken ipan tlaxelojli ueyi 6, techpaleuiya matikasikamatikan kenon Jehová uelis kitlapopoluis totlajtlakoluan. Ipan tlaxelojli ueyi 3, kijtoua ika “nochimej on tlakamej tlajtlakolejkej”. Kuakon Pablo okijto: “Itechkopa iteiknelilis yejuan okintlayokolij, kijtoua ika intlajtlakoluan yokintlaxtlau. Yejua in kichiua itechkopa Jesucristo yejuan okitlaxtlau [...] totlajtlakol” (Romanos 3:23, 24). Tlajtojli ika griego tlen nikan notlajtolkuepa “iteiknelilis” teasikamachiltia ika tikchiuas itlaj tlen melak kuajli ipampa yakaj niman xtikchias itlaj tlen ika mamitskuepili, itlaj tlen xkinotlanilia niman xkinamiki makiseli.

⁵ Se ixtlamatki okijto ika tlajtojli griego, miyekpa noteneua itech tlen toTajtsin noso Cristo yokichiujkej niman ijkon mamakisakan tlaltikpakchanejkej itech tlajtlakojli niman mikilistli. Ika yejon Traducción del Nuevo Mundo ika inglés kitlajtolkuepa yejuin tlajtojli ika griego ken “iteiknelilis toTajtsin tlen xtechmelaua”. Matikitakan tlenon toTajtsin yokichiuj topampa niman kenon iteiknelilis tlen xtechmelaua techpaleuiya aman niman techmaka se tlamachialistli.

6. ¿Akinomej uelis kinpaleuis iteiknelilis toTajtsin tlen xtechmelaua niman kenon?

⁶ Pampa Adán otlajtlako, okinpanoltili nochimej tlaltikpakchanejkej tlajtlakojli niman mikilistli. Ika yejon, Biblia kijtoua ika “ipampa itlajtlakol se tlakatl, nochi tlakatl ika onkaj mikis”. San ika, Jehová okiteititi ueyi iteiknelilis tlen xtechmelaua niman okitemakak se ojtli niman ijkon kinmakixtis nochimej tlaltikpakchanejkej “ipampa Jesucristo” (Romanos 5:12, 15, 17). “No ijki Dios miyekej kinselis ken [...] yolmelajkej pampa se tlakatl okitlakamat”. Niman uelis tikchiaskej “nemilistli yejuan para nochipa [...] itechkopa toTeko Jesucristo” (Romanos 5:19, 21).

7. ¿Tleka tlaxtlauijli se tetlayokolijli tlen xtechmelaua niman teititia iteiknelilis toTajtsin?

⁷ Xtlanemili itech yejuin: Jehová xnonekiya makitemaka iKoneuj ken se tlaxtlauijli. San ika, yejua okiteititi ueyi iteiknelilis ijkuak okitemakak ika tlen techmakixtis itech tlajtlakojli niman mikilistli. Xakaj kimelaua kiselis tlen toTajtsin niman Jesús okichiujkej topampa. ¡Melak tiktlasojkamatij ika yejuamej okichiujkej tlen ika uelis techtlapopoluiskej niman tinemiskej nochipa! Matikteititikan ipan tonemilis ika melak tiktlasojkamachiliaj toTajtsin.

8. ¿Tlenon tlanemilijli noneki matikmapeuakan?

⁸ Tikmatstokej ika toTajtsin kinektika kitlapopoluis totlajtlakoluan maski uejueyimej.  San ika, maka keman matijkuikan iteiknelilis Jehová tlen xtechmelaua ika tiknemiliskej ika uelis tikchiuaskej itlaj tlen xkuajli niman tikijtoskej “Jehová nechtlapopoluis”. Ipan kachtopa siglo, maski ok nemiyaj sekimej itlatitlankauan Cristo, nemiyaj sekimej akin kichiuayaj ken Cristo akin kipiayaj yejon tlanemilijli (xpoua Judas 4). Ipan yejuin tonajli, noneki matotlajpiyakan ika maka techmauaskej oksekimej akin kipiyaj yejon tlanemilijli niman ika yolik peuas ijkon titlanemiliskej.

9, 10. ¿Kenon Pablo niman oksekimej omakiskej itech tlajtlakojli niman mikilistli?

⁹ Pablo okimijli akin kichiuayaj ken Cristo ika xkuajli yeskia kinemiliskej ika toTajtsin ok kintlapopoluiskia tla yejuamej xkikajkauayaj ika kichiuaj tlajtlakojli. Pablo okijto ika yejuamej nonekiya makimapeuakan yejon tlanemilijli pampa yejuamej “[yo]mikej itech tlajtlakojli” (xpoua Romanos 6:1, 2). ¿Tlenon kijtosneki yejuin?

¹⁰ Ipampa tlaxtlauijli, toTajtsin okitlapopolui itlajtlakoluan Pablo niman oksekimej akin kichiuayaj ken Cristo ipan kachtopa siglo. Jehová okintlapejpeni ika iespíritu santo manochiuakan ikoneuan. Tla yejuamej yolmelaujkanemiskiaj, yaskiaj iluikak niman tlanauatiskiaj iuan Cristo. Pampa yejuamej ok nemiyaj ipan tlaltikpaktli, ¿kenon yejuamej “[yo]mi[jkaj] itech tlajtlakojli”? Ijkuak Pablo okijto ika yomijkaj, kijtosnekiya ika yejuamej kuajli yokipatlakaj ken nemiyaj. Yejua okijto ika ijkuak Jesús omik, sakin oyoliuj ken se espíritu tlen xueli miki. Ika yejon, “mikilistli xok [keman] kipias”. Noijki ijkon, akin kichiuayaj ken Cristo kentla yomijkaj. Nochi innemilis yokipatlakaj pampa xok kikauiliayaj ika xkuajli inileuilis makinchiualti matlajtlakokan. Aman yejuamej okichiujkej nochi tlen ouelkej niman nemiskej ken toTajtsin kiyolpaktia. Yejuamej “kentla [yo]mijkej itech tlajtlakojli, san ika, [yoltoyaj] itech toTajtsin itechkopa Cristo Jesús” (Romanos 6:9, 11, TNM).

11. ¿Kenon ipan yejuin tonajli akin kichiuaj ken Cristo “[yo]mijkej itech tlajtlakojli”?

¹¹ ¿Tlenon uelis tikijtoskej totechkopa? ¿Kenon “[yoti]mijkej itech tlajtlakojli”? Yeuejkaui, kanaj otikchiujkej miyek tlemach tlen xkuajli niman nion xtikmatiyaj kenon kitaya Jehová tlen tikchiuayaj. Kentla tiyeskiaj “tlanamaktin [noso tlakeualtin] ipan on tlen xchipauak niman ipan on tlen xkuajli”, kijtosneki titlakeualtin “ipan on tlajtlakojli” (Romanos 6:19, 20). San ika, ijkuak otomachtijkej itech Biblia kenon toTajtsin kineki matinemikan, otikpatlakej tonemilis, otosentemakakej itech yejua niman otoapolaktijkej. Aman ika nochi toyojlo tiknekij tiktlakamatiskej Jehová niman tinemiskej ken yejua kiyolpaktia. Kuakon tejuamej otimakiskej “itech on tlajtlakojli” niman otochiujkej “tlanamaktin [noso tlakeualtin] itech on yolmelajkilistli” (Romanos 6:17, 18).

12. ¿Tlenon tiktlapejpeniskej tikchiuaskej tinochimej?

¹² San ika, maski ijkon tejuamej uelis tiknemiliskej tlenon tikchiuaskej. Pablo okijto: “Ma ka sa xkauilikan ma mechtilana on tlajtlakojli ipan nemotlalnakayo para nenkitlakamatiskej on xkuajkualtin eleuilistin” (Romanos 6:12). Maski tiuelij noso xtiuelij tikteltiaj xkuajli tlanemilijli niman ileuilistli, matotlajtoltikan: “¿Nijkauilia ika xkuajli notlanemililuan maueyiyakan niman hasta nikchiuas tlen  xkuajli? ¿Noso nikinmapeua nimantsin?”. Tla melak tiktlasojkamatij iteiknelilis toTajtsin tlen xtechmelaua, tikchiuaskej nochi tlen tiueliskej niman ijkon tikyolpaktiskej Jehová.

13. ¿Tleka uelis kuajli tikmatstoskej ika uelis tikchiuaskej tlen kuajli?

¹³ Ipan kachtopa siglo, sekimej tlaltikpakchanejkej ipan Corinto akin tlachtejkej katkaj, tlakamej notekayaj iuan tlakamej, kikajkayauayaj imixnamik, kinueyichiuayaj tajtsitsintin niman tlauaniyaj okixmatkej Jehová niman opeuj kitlasojtlaj, niman onopatlakej. Yejuamej pinauiyaj itech tlen yokichiujkaj (Romanos 6:21; 1 Corintios 6:9-11). Akin kichiuayaj ken Cristo ipan Roma noijki nonekiya ijkon kipatlaskej innemilis. Pablo okimijli: “Ma ka xkauilikan on tlajtlakojli ma kitekitilti nion se parte nemotlalnakayo para ma kichiua on tlen xkuajli. Yej xkauilikan ma Dios mechtekitilti ken [...] yejuan omikej pero oksejpa oyoliuikej [...]. Xtemakakan, tej, cada parte nemotlalnakayo itech Dios para ma kichiua on tlen kuajli” (Romanos 6:13). Pablo kuajli kimatstoyaj ika yejuamej ueliskiaj kichiuaskej tlen kuajli niman nochipa ika nopaleuiskej iteiknelilis toTajtsin tlen xtechmelaua.

14, 15. ¿Tlenon noneki matotlajtoltikan?

¹⁴ Noijki ijkon ipan yejuin tonajli. Sekimej itech tokniuan kanaj noijki yonenkej ken corintios. San ika, sakin ijkuak okixmatkej Jehová, yejuamej onopatlakej. Kentla ochipaujkej. Tla tiknekij tikyolpaktiskej Jehová, tinochimej noneki tikpatlaskej tonemilis. Aman tiknekij tikteititiskej ika melak tiktlasojkamatij iteiknelilis toTajtsin tlen xtechmelaua. Ika yejon, kuajli yotiknemilijkej ika tikyejyekoskej xtikchiuaskej xkuajli ileuilistli tlen tikpiyaj niman tijkuiskej tonemilis ika tiktekichiuiliskej Jehová.

¹⁵ Kema, noneki maka matikchiuakan uejueyimej tlajtlakoltin tlen kichiuayaj sekimej corintios. Xuelis ok tikchiuaskej tlen xkuajli niman noijki tikchiaskej ika toTajtsin matechtlapopolui ipampa iteiknelilis tlen xtechmelaua. San ika, ¿tlenon uelis tikijtoskej itech tlajtlakoltin tlen nesi xuejueyimej? ¿Kuajli yotiknemilijkej tikchiuaskej nochi tlen tiuelij niman ijkon tiktlakamatiskej Jehová itech nochi tlemach? (Romanos 6:14, 17).

16. ¿Kenon tikmatij ika noneki xtikchiuaskej tlajtlakoltin tlen xnoteneuaj ipan 1 Corintios 6:9-11?

¹⁶ Xtlanemili itech Pablo. Yejua okijkuilo: “Nejua ikan notlalnakayo xnikuajli niman ninemi tlanama[k]tli itech on tlajtlakojli. Nejua xnikajsikamati tlinon nikchiua. Tej, xniueli nikchiua on tlen kuajli nikneki, yej nikchiua on tlen xnikuelita” (Romanos 7:14, 15). Maski yejua xkichiujtoya tlemach tlen noteneua ipan 1 Corintios 6:9-11, Pablo kasikamatiya ika yejua ok tlajtlakouaya. Yejua kinekiya kiyolpaktis Jehová, ika yejon nochikauaya xkichiuas yejuin tlen xkuajli (xpoua Romanos 7:21-23). Tejuamej uelis tikixkopinaskej ineskayo niman tikchiuaskej nochi tlen tiuelij niman ijkon tiktlakamatiskej Jehová.

17. ¿Tleka tikneki melajki timoyekanas?

¹⁷ Se neskayotl, tikmatstokej ika akin tiktekichiuiliaj Jehová noneki melajki toyekanaskej (xpoua Proverbios 14:5; *  Efesios 4:25). Xtiknekij tochiuaskej ken Satanás, “intaj on yejuan tlakajkayauaj”. Niman noijki matikilnamikikan ika Ananías niman isiuauj omijkej pampa otekajkayaujkej. Ika yejon maka matitekajkayauakan (Juan 8:44; Hechos 5:1-11). San ika, melajki timoyekanas xsan kijtosneki xtikijtos tlen xmelauak. Tla melauak tiktlasojkamatij iteiknelilis toTajtsin tlen xtechmelaua, noijki melajki toyekanaskej itech okseki tlemach.

18, 19. ¿Tlenon kijtosneki melajki timoyekanas?

¹⁸ Se tlaltikpakchane maski xkijtoua tlen xmelauak uelis xmelajki noyekanas. Se neskayotl, Jehová okimijli israelitas: “Xkipiya ika titlachtekis, xkipiya ika titekajkayauas niman xkipiya ika nemoyekanaskej xmelajki se iuan okse”. ¿Tleka nonekiya kichiuaskej yejuin? Jehová okijto: “Noneki nenchipaujkej yeskej, pampa nejua, Jehová nemoTajtsin, nichipauak” (Levítico 19:2, 11). Maski tejuamej xtikteijliskej itlaj tlen xmelauak, tla tikchiuaj ika oksekimej makineltokakan itlaj tlen xmelauak, kijtosneki ika xmelajki toyekanaj.

¹⁹ Se neskayotl, se tlakatl kijlia akin itech tekiti noso akin iuan tekitij ika yejua noneki kisas saniman ipan tekitl pampa yas kampa tlapajtiketl. San ika, yejuin xmelauak. Yejua kineki kisas saniman  pampa yas vacaciones. Yejua san kipiya ika panos totoka ipan se farmacia noso san kitlaxtlauilis tlapajtiketl. ¿Melajki noyekana noso kinkajkayaua oksekimej? Yejon tlakatl kichiua ika oksekimej makineltokakan itlaj tlen xmelauak. Kemantika, tlaltikpakchanejkej kinkajkayauaj oksekimej niman ijkon kipiyaskej itlaj tlen yejuamej kinekij noso pampa xkinekij kiseliskej se tlajyouilistli. San ika, matiktlakamatikan Jehová, akin techijlia: “Maka titekajkayauas”. Tiknekij tikchiuaskej tlen yejua kijtoua kuajli niman chipauak (Romanos 6:19).

20, 21. Tla tiktlasojkamatij iteiknelilis toTajtsin tlen xtechmelaua, ¿tlenon noijki noneki maka matikchiuakan?

²⁰ Kema, xtikajkayauaj toixnamik, xtitlauanij niman xtikchiuaj okseki uejueyimej tlajtlakoltin. San ika, xsan yejon noneki, tejuamej xtlaj tiknekij tikchiuaskej tlen xkiyolpaktis Jehová. Se neskayotl, xsan xtikchiuaj auilnemilistli, noijki xtoyolpaktiaj ika tlen tsokuiltik. Xsan xtitlauanij, noijki xtikonij hasta kentla titlauaniskiaj. Kanaj melak ouijtika tochikauaskej tikmapeuaskej nochi tlatlatalistin ken yejon, san ika, kema tiueliskej tikmapeuaskej.

²¹ Uelis tiknemiliskej tikchiuaskej ken Pablo ijkuak okijto: “Ma ka sa xkauilikan ma mechtilana on tlajtlakojli ipan nemotlalnakayo para nenkitlakamatiskej on xkuajkualtin eleuilistin” (Romanos 6:12; 7:18-20). Tikmatij ika kemantika xuelis tikmapeuaskej nochi tlajtlakojli. San ika, ijkuak tochikauaj tikmapeuaskej nochi tlajtlakojli, tikteititiaj ika melak tiktlasojkamatij teiknelilistli tlen xtechmelaua tlen toTajtsin niman Cristo yotechititijkej.

22. ¿Tlenon uelis tikchiaskej ika tlayekapan tla melauak tiktlasojkamatij iteiknelilis toTajtsin tlen xtechmelaua?

²² Jehová yokitlapopolui totlajtlakoluan niman uelis nochipa techtlapopoluis. ¡Melak tiktlasojkamatij iteiknelilis toTajtsin tlen xtechmelaua! Ika yejon, matochikauakan ika maka tikchiuaskej tlen yejua techijlia ika xkuajli, maski tla oksekimej kitaj ika yejon tlemach xtlajtlakojli. ¿Tlenon uelis tikchiaskej ika tlayekapan tla ijkon tikchiuaj? Pablo okijto: “Aman xok nentlanamaktin ipan on tlajtlakojli, yej nentlanamaktin itech Dios. Yejua ika nemonemilis kuajli yejyejtias [...] itech Dios niman ijkon, tej, no nenkiseliaj on nemilistli yejuan para nochipa” (Romanos 6:22).