IPAN yejuin tonaltin, miyekej kijtouaj ika xnoneki tikijtos akinon tiknotsa ijkuak tikchiua teoyotl, pampa kinemiliaj ika toTajtsin kinkaki nochi teoyomej. Akin kineltokaj ika toTajtsin kinseliaj nochi religiones, noijki ijkon kinemiliaj. San ika, ¿yejon yemelak?

Biblia kijtoua ika miyekej akin kichiuaj teoyotl xkichiuiliaj akin melauak kinamiki makichiuilikan. Desde ijkuak onoijkuilo Biblia, miyekej yopeujkaj kinnotsaj tajtsitsintin. San ika, toTajtsin miyekpa okijli ikalpan maka ijkon makichiuakan. Salmo 115:4-6 ijkin kijtoua itech tajtsitsintin: “Kipiyaj innakasuan, pero xuelij tlakakij”. Yejuin kuajli techasikamachiltia, ika xitlaj ika techpaleuis tla tiknotsaj se dios akin xueli techkaki.

Matikitakan tlen ipan onochiuj teotlajtoketl Elías, yejon techpaleuis más matikasikamatikan tlen yotikonteneujkej. Biblia kijtoua ika Elías okimixnamik iteotlajtokauan Baal. Okimijli: “Nejua niknotsas noTajtsin niman nemejuamej xnotsakan nemotajtsin Baal, niman akin tlanankilis kiteititis ika yejua toTajtsin akin melauak”. Iteotlajtokauan Baal okinejkej ijkon kichiuaskej, niman opeuj kitsajtsiliaj intajtsin, san ika, maski melak kitsajtsiliayaj “xakaj dios okinkak niman xakaj okinminankili” (1 Reyes 18:29). ¿Noijki xokinankilijkej Elías?

Ka, san ouajtlan kichiua teoyotl Elías, toTajtsin nimantsin okichiuj mauetsiki tlitl de ne iluikak niman on uentli opeuj tlatla. ¿Tleka Elías kema okinankilijkej? Ipan 1 Reyes 18:36, 37, tiknextiaj iteoyouj Elías, niman ipan yejuin teoyotl, Elías yexpa okinots toTajtsin ika itoka: Jehová.

¿Tleka melak noneki matikmatikan yejuin? Matitlanemilikan itech yejuin, Baal katka itoka intajtsin cananeos niman yejuamej tlatlamantikej Baales kinueyichiuayaj. San ika, xijkon panoua iuan toTajtsin Jehová. Xakaj más itoka Jehová, san yejua kipiya yejon tokayotl. Yejua okijli ikalpan: “Nejua niJehová. Yejuin notokayo; niman xnikmakas yakaj okse noueyilis, nion xnijkauilis makinueyichiuakan tlen san okinmachijchiujkej” (Isaías 42:8, TNM).

¿Uelis tikijtoskej ika Elías niman iteotlajtokauan Baal san no yejua dios okichiuilijkej teoyotl? Ka. Ijkuak kiueyichiuayaj Baal, kinuentlaliayaj tlaltikpakchanejkej niman auilnemiyaj, yejuin melak tepinaujti katka niman kichiuaya ika miyekej makichiuakan tlen xkuajli. San ika, ken noueyichiuaya Jehová melak tlamantik katka, pampa kichiuayaj ika tetlakaitalistli niman Jehová xkeman otlanauati manochiua tlen xkuajli niman tlen ueliskia kimijtlakos oksekimej. Kuajli tikasikamatij ika teoyotl tlen okichiujkej iteotlajtokauan Baal xoajsikej itech toTajtsin Jehová. Yeskia kentla tikontlajkuilouiliskiaj se toamigo akin melak tiktlakaitaj, san ika, yej kiselia tocarta yakaj okse akin xijkon itoka ken toamigo niman yakaj akin melak xkuajli inemilis.

Akin kinotsaj Jehová, kinotsaj toTajtsin akin otexchijchiuj. * Isaías okijto ika Jehová yejua toueyiTajtsin (Isaías 63:16). Jesús itech yejua tlajtotoya ijkuak okimijli inomachtijkauan: “Yeniau itech noTajtsin niman nemoTajtsin, itech noDios niman nemoDios” (Juan 20:17). Kuakon, tla Jesús san okichiuili teoyotl iTaj, Jehová, inomachtijkauan noijki nonekiya san yejua kinotsaskej (Mateo 6:9).

¿Technauatia Biblia matikinnotsakan noso matikinchiuilikan teoyotl Jesús, María, tajtsitsintin niman ángeles? Ka, san noneki tiknotsaskej Jehová. Matikitakan tleka. Kachtopa, pampa ijkuak yakaj tikchiuiliaj teoyotl, noijki tikueyichiuaj, niman Biblia kijtoua ika san Jehová noneki tikueyichiuaskej (Éxodo 20:5). Ika ome, pampa Biblia kijtoua ika san Jehová kikaki “toueyikatsajtsilis” (Salmo 65:2). Maski Jehová yokinkauili itekipanojkauan makichiuakan seki tekitl, xakaj yokitekimakak makinkaki toteoyouan, san yejua kinkaki toteoyouan.

Kuakon, tla tiknekij ika Jehová matechkaki, noneki yejua tiknotsaskej. Biblia kijtoua: “Niman san akinon yejuan kitlajtlanilis toTEKO para ma makisa, toTEKO kimakixtis” (Hechos 2:21). ¿Kijtosneki ika toTajtsin kinkaki nochimej akin kinotsaj? ¿Noso noneki itlaj okse tikchiuaskej?