Ken mitspaleuis tlen opanok ipan jardín de edén

SEKIMEJ ixtlamatkej kijtouaj ika xnochi Biblia tlajtoua itech jardín de Edén. Paul Morris se tlamachtijketl akin kita kenon temachtiaj religiones okijto: “San ipan amoxtli Génesis tlajtoua itech tlen opanok ipan jardín de Edén niman xok oksekan ipan Biblia noteneua”. Miyekej ixtlamatkej noijki ijkon kinemiliaj. San ika, yejon xmelauak.

Ipan Biblia, miyekan kiteneua jardín de Edén, Adán iuan Eva niman kouatl. a Maski ijkon, hasta nemij miyekej ixtlamatkej niman teopixkej akin kijtouaj ika xmelauak tlen kijtoua Biblia itech jardín de Edén. Yejuamej melak xkuajli tlen kinemiliaj pampa kijtouaj ika Biblia xtemachtia tlen melauak.

Tla tiknekij tikasikamatiskej tlenon kijtoua Biblia, kachtopa noneki tikitaskej tlenon opanok ipan jardín de Edén. Yejuin techpaleuis matiknankilikan tlen kemantika totlajtoltiaj.

● ¿Tleka tiueuentsintiaj niman timikij? Tla Adán iuan Eva kitlakamatiskiaj Jehová, nochipa nemiskiaj. San ika, pampa xokitlakamatkej onokuepkej tlajtlakolejkej niman omijkej (Génesis 2:16, 17; 3:19). Yejuamej otechpanoltilijkej tlajtlakojli, ika yejon, tinochimej titlajtlakolejkej. Biblia kijtoua: “Ipan in tlaltikpaktli on achtoj tlakatl otlajtlakoj niman ipampa on  tlajtlakojli onkaj mikilistli. Yejua ika nochimej mikiskej pampa nochimej tlajtlakouaj” (Romanos 5:12).

● ¿Tleka toTajtsin kikauilia maonia tlen xkuajli? Ipan xochitlalpan Edén, Satanás okijto ika Jehová se tlakajkayaujketl niman ika yejua xkineki matiyolpakikan (Génesis 3:3-5). Okijto, ika toTajtsin xkuajli ken tlayekana. Adán iuan Eva okineltokakej Satanás niman xokitlakamatkej toTajtsin. Pampa ijkon okichiujkej okiteititijkej ika san yejuamej ueliskiaj kitlapejpeniskiaj tlen kuajli niman tlen xkuajli. ¿Tlenon okichiuj Jehová? Pampa yejua melak tlamachilise niman melajki, okinkauili tlaltikpakchanejkej ika sa no yejuamej manoyekanakan. Aman melak xkuajli tlen nochiujtok, yejuin kiteititia ika tlaltikpakchanejkej xuelij sa no yejuamej noyekanaj (Jeremías 10:23).

● ¿Tleka toTajtsin okichijchiuj tlaltikpaktli? ToTajtsin kinekiya ika yejuin tlaltikpaktli kualtsin manesi ijkon ken jardín de Edén. Yejua okijli Adán iuan Eva machantikan ipan yejuin tlaltikpaktli niman makiueyilikan yejon kualtsin jardín (Génesis 1:28). ToTajtsin kinekiya ika yejuin tlaltikpaktli manokuepa se xochitlalpan niman ompa machantikan nochimej ikoneuan Adán niman mayolpakikan. Biblia kijtoua ika toTajtsin kichiuas tlen kachtopa kinekiya.

● ¿Tleka ouajla Jesucristo ipan tlaltikpaktli? Pampa Adán iuan Eva xokitlakamatkej toTajtsin ipan jardín de Edén, yejon okichiuj ika matechpanoltilikan tlajtlakojli niman matimikikan. Pampa toTajtsin melak techtlasojtla okuajtitlan iKoneuj mamikiki topampa niman ijkon techmakixtis (Mateo 20:28). ¿Tlenon okichiuj Jesús para techmakixtis? Matikilnamikikan ika Jesús, akin Biblia kitokayotia “sa ika nochi Adán”, nochipa okitlakamat Jehová xijkon ken Adán. Ika yejon, yejua xkeman okipix tlajtlakojli. Yejua okitemakak inemilis niman ijkon techmakixtis itech tlajtlakojli. Ijkon okichiuj ika akin kitlakamatij toTajtsin manemikan ika tlayekapan ijkon ken Adán iuan Eva nemiskiaj ipan jardín de Edén tla xtlajtlakoskiaj (1 Corintios 15:22, 45; Juan 3:16). Kuakon, Jesús ouajla ipan tlaltikpaktli para manochiua tlen toTajtsin kinekiya. b

Ken yotikitakej, xouijtika tikasikamatiskej tlen toTajtsin kineki kichiuas. Niman kuajli matikmatstokan ika yejua yemelak ijkon kichiuas. Ijkon ken yemelak onkatka jardín de Edén niman nochimej akin ompa nemiyaj, noijki yemelak nochiuas tlen toTajtsin yokijto kichiuas. Tla tiknekij tikitaskej yejon, noneki itlaj tikchiuaskej. ToTajtsin kineki ika nochimej makitakan tlen yejua kichiuas, hasta akin xok kitekichiuiliaj (1 Timoteo 2: 3,4). ¿Kenon tikmatij?

Achto ika mikiskia Jesús, otlajto iuan se xkuajli tlakatl akin inakastlan pilkatoya. Yejon tlakatl kimatstoya ika kinamikiya makimiktikan, san ika, okinots Jesús para makiyolseui niman makipaleui. Niman Cristo okinankili: “Nouan tinemis ipan xochitlalpan” (Lucas 23:43, TNM). Tla Jesús kinekiya ika se xkuajli tlakatl akin yonoyolkuepka nochipa manemi ipan se xochitlalpan, ¿xmelak ika noijki kinekiskia ika tejuamej ompa matinemikan? Kema, niman iTajtsin noijki ijkon kineki. Tla tejua tikneki tikitas nochi tlen toTajtsin kichiuas, kuajli xkixmati Jehová akin okichijchiuj jardín de Edén.

[Notas]

[Recuadro]

KACHTOPA TEOTLAJTOJLI TLEN BIBLIA KIJTOUA

“Niman nikchiuas para tejua [kouatl] iuan on siuatl xmotlauelita. Niman nikchiuas para mouejkakoneuan niman iuejkakoneuan on siuatl ma notlauelitakan. Se iuejkakoneu mitskuatepaxos niman tejua tikotstlankechis” (Génesis 3:15).

Yejuin kachtopa teotlajtojli tlen onka ipan Biblia tlen toTajtsin okiteneuj ipan Edén. San ika ¿akinon siuatl, kouatl niman inuejkakoneuan? ¿Niman kenon notlauelitaskiaj?

KOUATL

Satanás (Apocalipsis 12:9).

SIUATL

Ikalpan toTajtsin tlen onka iluikak, kampa nemij nochimej iluikaktekitkej akin melajkanemij itech Jehová (Gálatas 4:26, 27). Teotlajtoketl Isaías okijto ika iuejkakoneuan yejon siuatl yeskia se nación (Isaías 54:1; 66:8).

IUEJKAKONEUAN KOUATL

Akin kichiuaj tlen Diablo kineki (Juan 8:44).

IUEJKAKONEUAN SIUATL

Jesucristo akin ouajla itech ikalpan toTajtsin tlen onka ne iluikak niman noijki tlapejpeniltin. Yejuamej yokintlapejpeni toTajtsin para iuan matekiuajtikan Jesús ne iluikak niman manokuepakan se nación ken ikoneuan toTajtsin (Gálatas 3:16, 29; 6:16; Génesis 22:18).

IJKUAK OKIKOKOJKEJ

Ijkuak iKoneuj toTajtsin nemiya ipan tlaltikpaktli Satanás okichiuj makimiktikan, maski ijkon, sakin oyoliuj.

KUATEPAXOUA

Jesús kipopolos Satanás niman xok keman nemis. San ika, kachtopa kiyektlalis nochi tlen Diablo yokijtlako desde ijkuak okixnamijkej toTajtsin ipan jadín de Edén (1 Juan 3:8; Apocalipsis 20:10).

Ipan folleto Biblia ¿Tlenon techijlia?, tlen okichijchiujkej iteixpantijkauan Jehová, tikitas itech tlenon tlajtoua Biblia.

[Tlaixkopinajli]

Adán iuan Eva melak otlajyouijkej pampa otlajtlakojkej