Biblia okichiuj manopatlakan

¿TLENON okipaleui manopatla se tlakatsintli akin kuelitaya nauiltis ipampa tomin niman tlachtekis? Matijkauilikan yejua matechnankili.

“Melak nikuelitaya nias kampa notlatlanij caballos” (RICHARD STEWART)

IJKUAK OTLAKAT: 1965

PAÍS: JAMAICA

TLEN KICHIUAYA: NAUILTIAYA IPAMPA TOMIN NIMAN TLACHTEKIYA

TLEN NIKCHIUAYA: Oninoskalti kampa xonkatka tomin, ipan se ueyi kalpan tlen itoka Kingston ipan icapital Jamaica. Ompa xonkatka tekitl niman melak nochiuaya tlen xkuajli. Nochimej akin ompa chantiyaj melak nomojtiayaj pampa mojmostla nomotlalouayaj.

Nonan melak chikauak tekitiya niman ijkon techtlakualtis nejua niman nokniuan. Yejua kinekiya kuajli matomachtikan ipan escuela. Nejua xnikuelitaya nias ipan escuela pampa más nikuelitaya nias kampa notlatlanij caballos. Niman ijkuak ompa niaya kemantika hasta nitlejkouaya ipan seki caballos.

Sakin opeuj nikuelita ninauiltis ipampa tomin niman nikinpiyas miyek siuamej. Noijki nipokiya noso nichichinaya marihuana. Niman pampa niknekiya nikpiyas nochi yejon, opeuj nitlachteki niman opeuj nikinpiya miyek armas. Niktlasojkamachilia toTajtsin ika xakaj onikmikti ijkuak onitetlachtekili.

Sakin onechajsikej niman onechtsajkej. Ijkuak onikis oksejpa opeuj nikchiua tlen xkuajli. San ika, ijkuakon opeuj nikchiua tlen más xkuajli. Nesiya ika melak nitetlakaitaya, san ika, nochi nechkualaniaya niman nitetlaueltsatsiliaya. San notech nitlanemiliaya.

KEN BIBLIA OKICHIUJ MANINOPATLA: Ijkuak ijkon nikchiujtinemiya, nonan opeuj nomachtia Biblia niman onochiuj iteixpantijkauj Jehová. Ijkuak onikitak kenon onopatlak, opeuj nikneki nikmatis tlenon okipaleui manopatla, ika yejon, opeuj ninomachtia Biblia imiuan iteixpantijkauan Jehová.

Nimantsin onikitak ika yejuamej xtemachtiayaj ijkon ken oksekimej tlaneltokiltin niman nochi tlen kijtouayaj kikixtiayaj ipan Biblia. Yejuamej temachtiayaj techajchan niman kiteijliayaj ijkon ken okichiujkej tokniuan akin onenkej ipan kachtopa siglo (Mateo 28:19; Hechos 20:20). Ijkuak onikitak kenon yejuamej melak notlasojtlaj onikijto: “Yejuin tlaneltokijli tlen melauak” (Juan 13:35).

Ijkuak ninomachtijtoya Biblia, onikasikamat ika nonekiya ninopatlas. Jehová kitlauelita auilnemilistli niman tla nejua niknekiya nikyolpaktis nonekiya nikajkauas nochi tlen kijtlakoua totlalnakayo (2 Corintios 7:1; Hebreos 13:4). Más oajsik ipan noyojlo ijkuak onikmat ika Jehová uelis nikyolpaktis noso nikyolkokos ika tlen nikchiua (Proverbios 27:11). Ika yejon oniknemili nikajkauas ika nikpokis marihuana, nikintlajkalis nochi armas niman ninokojtilis ninopatlas. Más ouijtika onikitak nikajkauas ninauiltis ipampa tomin niman nikinkauas siuamej.

Nejua xniknekiya ika noamigos makimatikan ika nejua ninomachtijtoya Biblia imiuan iteixpantijkauan Jehová. San ika, nochi onopatlak ijkuak onikamapouj tlen okijto Jesús ipan Mateo 10:​33: “Pero on yejuan nechnenekiskej imixpan on tlakamej, nejua no nikinnenekis ixpan noTajtsin iluikak chanej”. Nimantsin onikimijli noamigos tlen nikchiujtoya, san ika, yejuamej omojkatlachixkej niman xueliyaj kineltokayaj ika yakaj ken nejua kinekiya tlaneltokas itech toTajtsin. Maski ijkon, onikimijli ika nejua niknekiya ninopatlas.

KEN YONECHPALEUI BIBLIA: Nonan melak oyolpak ijkuak okimat ika inikchiujtoya tlen kijtoua Biblia. Aman xsan konnemilijtika tlen nikchiua, melak tikuelitaj titlajtoskej itech kenon melak tiktlasojtlaj Jehová. Ijkuak nontlanemilia itech tlen nikchiuaya, nikita kenon Jehová melak yonechpaleui, aman xok nikneki niauilnemis niman nikinpiyas miyek tlemach tlen patioj.

Tla nejua xninomachtiskia Biblia, aman kanaj ninemiskia ipan carcel noso yonimijka. San ika, tlen melauak, yonechpaleui maniyolpaki imiuan nofamilia, nikpiya se nosiuauj akin melak nechpaleuiya, se nochpoch akin tetlakaita niman san sekan tikueyichiuaj Jehová ika nochi toyojlo. Xnikmati kenon niktlasojkamatis pampa yakaj onechmachti itech Biblia, ika yejon, nochipa ijkuak niueli nikimijlia oksekimej tlen kijtoua Biblia. Melak niktlasojkamachilia Jehová pampa nechkauilia maninemi ipan ikalpan, san ika, más niktlasojkamachilia pampa nechkauilia iuan maninouika.

[Comentario]

“Más oajsik ipan noyojlo ijkuak onikmat ika Jehová uelis nikyolpaktis noso nikyolkokos ika tlen nikchiua”

[Tlaixkopinajli]

Ijkuak onikitak kenon nonan onopatlak, opeuj nikneki nikmatis tlenon kipaleuijtoya

[Tlaixkopinajli]

Iuan nosiuatsin niman nochpoch