Biblia okichiuj manopatlakan

¿TLENON okipaleui mayolpaki se siuatl akin melak otlajyoui ijkuak pitentsin katka? ¿Tlenon okipaleui manopatla se tlakatl akin tlauele katka niman kixnamikiya gobierno? Matikitakan tlen inpan onochiuj.

“Niknekiya manechtlasojtlakan”​(INNA LEZHNINA)

IJKUAK OTLAKAT: 1981

PAÍS: RUSIA

TLEN KICHIUAYA: MELAK OTLAJYOUI IJKUAK PITENTSIN

TLEN NIKCHIUAYA: Notajuan xtlakakij niman nejua noijki ijkon onitlakat. Seis xiuitl melak oniyolpak, san ika, ijkuakon notaj niman nonan onoxelojkej niman onokaujkej. Maski nipitentsin katka, kuajli nikmatstoya tlen panotoya niman yejon nechyolkokouaya. Ijkuak onoxelojkej, notaj niman nokniuj akin más ueyi, onokaujkej Troick, niman nonan onechuikak Cheliabinsk. Sakin, oksejpa ononamikti. Notlakpataj tlauaniya niman miyekpa techuisokiya.

Ipan1993, nokniuj akin más iueyi oamimik. Yejon melak otechyolkoko tinochimej. Nonan opeuj tlauani niman noijki opeuj nechuisoki. Nejua niknekiya kuajli ninemis, san ika, más niknekiya manechtlasojtlakan. Pampa niknekiya manechyolseuikan, oniaj ipan tlamantik tlaneltokiltin, san ika, xkanaj onechyolseuijkej.

KEN BIBLIA OKICHIUJ MANINOPATLA: Ijkuak nikpiaya 13 xiuitl, se iteixpantijkauj Jehová akin iuan ninomachtiaya, onechititi historias tlen uajlauj ipan Biblia. Melak nikuelitaya nikakis itech Noé niman Job, pampa yejuamej okitekichiuilijkej toTajtsin, maski miyek tlen okixnamijkej. Nimantsin opeuj ninomachtia Biblia imiuan iteixpantijkauan Jehová niman opeuj niauj ipan intlanechikoluan.

Ipan itlajtol toTajtsin, oniuel miyek tlemach tlen kualtsin. Melak onechyolpakti nikmatis ika toTajtsin kipiya itoka (Salmo 83:18). Onechmojkatlachialti nikitas kenon Biblia xnopopoloua ijkuak tlajtoua itech tlen panoskia ipan itlamiyan tonaltin (2 Timoteo 3:​1-5). Niman melak onechyolpakti nikmatis ika akin yomijkej yoliuiskej. Kuakon, ¡oksejpa nikitas nokniuj! (Juan 5:​28, 29).

San ika, xnochimej yolpakiyaj ken nejua. Nonan niman notlakpataj kimixnamikiyaj iteixpantijkauan Jehová niman nexchiualtisnekiyaj manikajkaua ika ninomachtia Biblia. San ika, nejua melak nikuelitaya tlen ninomachtijtoya niman xniknekiya nikajkauas.

Ouijtika onikitak nikxikos ika nofamilia xnechkauiliayaj maninomachti. Ijkuakon opanok itlaj tlen melak teyolkoko, nokniuj akin más pitentsin, akin nechuikaya ipan tlanechikoltin, noijki oamimik. San ika, iteixpantijkauan Jehová, xkeman onechkaujkej. Yejuamej onechititijkej ika nechtlasojtlaj ijkon ken niknekiya. Kuajli nikmatstoya ika yejuamej nemij ipan tlaneltokijli tlen melauak, ika yejon, ipan 1996, oninoapolakti ken iteixpantijkauj Jehová.

KEN YONECHPALEUI BIBLIA: Ikipiya seis xiuitl ika oninonamikti iuan Dmitry, yejua melak nechtlasojtla. San sekan titlapaleuiyaj ipan isucursal iteixpantijkauan Jehová, tlen onka San Petersburgo. Niman aman, nofamilia ikiseliaj tlen nikneltoka.

¡Melak niktlasojkamati ika onikixmat Jehová! Niktekichiuilis yokichiuj maniyolpaki.

“Miyek xnikasikamatiya”​(RAUDEL RODRÍGUEZ RODRÍGUEZ)

IJKUAK OTLAKAT: 1959

PAÍS: CUBA

TLEN KICHIUAYA: KIXNAMIKIYA GOBIERNO

TLEN NIKCHIUAYA: Onitlakat ipan La Habana (Cuba), niman kampa oninoskalti melak xtlakualkan katka pampa ipan calles miyekpa nouisokiyaj. Ijkuak nitelpochtli katka melak nikuelitaya yudo niman okseki deportes kampa nouisokiyaj.

Nejua melak nikuelitaya ninomachtis, ika yejon notajuan onechyolchikaujkej maninomachti universidad. Ompa opeuj nikneltoka ika políticos akin nemiyaj ipan nopaís nonekiya kipatlaskej tlen kichiuayaj, ika yejon opeuj nikimixnamiki. Nejua niman se akin iuan ninomachtiaya otikuisojkej se policía niman otikuilijkej ipistola. Ipampa yejon otechtsajkej niman otechijlikej ika techmiktiskiaj. ¡Kemach nikpiaya 20 xiuitl niman inimikiskia!

Ijkuak san nejua ninemiya ipan cuarto kampa onechtsajkej opeuj niknemilia kenon nikixnamikiskia akin techmiktiskia, pampa xniknekiya nikteititis ika ninomojtiaya. San ika, noijki miyek ninotlajtoltiaya, ken tleka panoua miyek tlen xkuajli ipan yejuin tlaltikpaktli noso tla san pampa yejuin otinemikoj.

KEN BIBLIA OKICHIUJ MANINOPATLA: Sakin otechijlikej ika xok techmiktiskia, san ika, titsauktoskiaj 30 xiuitl. Ijkuakon onikimixmat sekimej iteixpantijkauan Jehová, akin okintsaujkaj ipampa tlen kineltokaj. Onechmojkatlachialti kenon yolchikaujkej niman kenon yolseujkej katkaj. Maski xkuajli tlen okinchiuilijkej yejuamej xnajmanayaj niman xkualaniyaj.

Iteixpantijkauan Jehová onechijlikej tlen toTajtsin kineki topan manochiua. Onechititijkej ipan Biblia kenon yejua kichiuas ika yejuin tlaltikpaktli manokuepa se kualtsin xochitlalpan, kampa xok panos tlen xkuajli niman kampa tinemiskej para nochipa (Salmo 37:29).

Nikuelitaya tlen nechmachtiayaj, san ika, nejua xnikchiuaya ken yejuamej pampa nejua nikuelitaya ninokalaktis ipan política niman ninotlakuepiltis. Kuakon oniknemili san nejua nikpouas Biblia. Ijkuak onitlan nikpoua, onikasikamat ika san iteixpantijkauan Jehová kichiuaj tlen kijtoua Biblia.

Pampa ninomachtiaya Biblia onikitak ika nonekiya ninopatlas. Nonekiya nikpatlas ken nitlajtouaya pampa niteuijuikaltiaya, nonekiya nikajkauas ika nipoki niman xok ninokalaktis ipan política. Ouijtika onikitak, sa ika, pampa Jehová onechpaleui ouel onikajkauj.

Melak ouijtika onikitak xnimantsin nikualanis. Ok niktlajtlanilia Jehová manechpaleui maniueli maninotelti. Yonechpaleuijkej miyek textos, ken Proverbios 16:​32, kampa kijtoua: “Más ueyi kitosneki yejuan xniman kualani xken sen tlakatl yejuan noteneua xmojki. Más kuajli tla se sano yejua noteltlalia xken tla kinoyaxkatia sen ueyikalpan”.

Ipan 1991 oninoapolakti ken iteixpantijkauj Jehová ipan cárcel, ipan se tambo tlen tentoya ika atl. Se xiuitl sakin otechkixtijkej niman otechtitlankej España, pampa ompa nemiyaj tochanejkauan. Ijkuak onajsik opeuj niauj ipan tlanechikoltin. Tokniuan akin ompa nemiyaj kuajli onechselijkej kentla yeuejkaui nechixmatiskiaj. Yejuamej onechpaleuijkej ijkuak ompa opeuj nichanti.

KEN YONECHPALEUI BIBLIA: Aman melak niyolpaki niman niktekichiuilia Jehová iuan nosiuauj niman nokoneuan. Aman ueli nikinmachtia miyekej itech Biblia. Kemantika niknemilia kenon ijkuak nitelpochtli katka inimikiskia, san ika, aman niyoltika niman niktlasojkamati nochi tlen nikpiya. Xsan yejon noijki nikchia itlaj tlen kualtsin. San nikchiatika mayejko xochitlalpan, kampa xnochiuas tlen xkuajli niman “xok onyas mikilistli” (Apocalipsis 21:​3, 4).

[Comentario]

“Melak onechyolpakti nikmatis ika toTajtsin kipiya itoka”

[Tlaixkopinajli]

Noueuentsin niman nejua, melak tikuelitaj tikinmachtiskej itech Biblia akin xtlakakij