“Xok nouikaj ken on tlaltikpaktlakamej”

“On tlaltikpaktlakamej kintlauelitaj pampa yejuamej xok nouikaj ken on tlaltikpaktlakamej” (JUAN 17:14).

¿Tlenon kijtosnekiya Jesús? Jesús ijkon okijto pampa yejua xnokalaktiaya ipan tlen kichiuaj oksekimej nion ipan política. Jesús okijto: “Nejua xnitlamandaroua nikan ipan in tlaltikpaktli ken se rey. Tla nitlamandaroskia nikan, on yejuan nouan kistinemij nechmanauiskiaj para nejua xnechtemakaskiaj intech on hebreos. Pero nejua xnitlamandaroua nikan ipan in tlaltikpaktli” (Juan 18:36). Noijki okinmachti inomachtijkauan maka makichiuakan nion matlajtokan ijkon ken akin xkichiuaj tlen Biblia kijtoua (Mateo 20:25-27).

Tlen okichiujkej akin yeuejkaui kichiuayaj ken Cristo. Ixtlamatki Jonathan Dymond okijto ika akin yeuejkaui okichiujkej ken Cristo xokinejkej yaskej guerra maski ueliskia itlaj kinchiuiliskiaj noso kinpijpinaujtiskiaj, kintsakuaskiaj noso kinmiktiskiaj. Yejuamej xkanaj nokalaktiayaj maski kintlajyouiltiayaj. Niman noijki xauilnemiyaj. Ika yejon, okimijlikej: “Aman yejuamej on yejuan xhebreos, xkajsikamatij tline xok nemonelouaj inuan ipan on miyek xkuajli tlajtlamach yejuan kichiuaj. Yejua ika, yejuamej mechteneuiliaj tlen xkuajli” (1 Pedro 4:4). Ken okijto Will Durant, ken chipaujkanemiyaj akin kichiuayaj ken Cristo kuajli okiteititijkej ika xkuajli tlen kichiuayaj akin san yejuamej noyolpaktiayaj.

¿Akinomej noijki ijkon kichiuaj aman? Ijkuak titlajtouaj ika akin kichiuaj ken Cristo xtlaixnamikij, New Catholic Encyclopedia okijto ika akin xkinekij tlaixnamikiskej xkuajli ken tlanemiliaj. Itech tlen okijto derechos humanos African Rights, se periódico tlen itoka Reformierte Presse okijto ika itech nochimej tlaneltokiltin, san iteixpantijkauan Jehová xteuan otemiktijkej ipan 1994 ne Ruanda.

Se akin temachtia ipan se secundaria melak okiyolkoko ijkuak okimat ika maski nazis melak miyekej okinmiktijkej, xakaj otetlateluili nion xakaj itlaj okijto. San ika, ijkuak otetlajtolti ipan Museo Conmemorativo del Holocausto de Estados Unidos, okijkuilo: “Aman nikmati ika yejon xmelauak”. Okasikamat ika maski miyek okinchiuilijkej iteixpantijkauan Jehová, yejuamej xkeman okikaujkej tlen kineltokaj.

¿Akinomej chipaujkanemij niman kichiuaj ijkon ken akin kachtopa opeuj kichiuaj ken Cristo? Revista U.S. Catholic kijtoua ika miyekej telpokamej católicos xkinekij kitlakamatiskej ika xkipiya iuan yakaj notekaskej tla xinonamiktiaj. Se akin kipaleuiya teopixki okijto: “Tlajkotipan itech akin nikinpaleuiya, ichantitokej san sekan ijkuak uajlauej uajnonamiktiaj”. Ipan The New Encyclopædia Britannica kijtoua ika iteixpantijkauan Jehová melak nokojtiliaj chipaujkanemiskej ipan innemilis.