“Yejuin kuajli tlajtoltin itech Tekiuajyotl notenojnotsas”
“Yejuin kuajli tlajtoltin itech Tekiuajyotl notenojnotsas”
“Yejuin kuajli tlajtoltin itech Tekiuajyotl notenojnotsas ipan nochi tlaltikpaktli niman ijkon nochimej kalpamej makimatikan, niman kuakon tlapopoliuis ipan yejuin tlaltikpaktli” (MATEO 24:14, Traducción del Nuevo Mundo).
¿Tlenon kijtosnekiya Jesús? Ipan Evangelio de Lucas kijtoua ika “Jesús okistinen ipan miyek uejueyikalpanmej niman kalpantsitsimej. Kiteijlijtiaya [...] on kuajli tlajtojli yejuan kiteijlia ken Dios temakixtia” (Lucas 8:1). Jesús noijki okijto: “Nejua no ika onkaj nitemachtis on kuajli tlajtojli yejuan kiteijlia ken Dios temakixtia ipan on oksekimej kalpanmej, pampa yejua ika Dios onechajtitlan” (Lucas 4:43). Kachtopa okimijli inomachtijkauan makiteijlikan yejon kuajli tlajtoltin ipan kalpamej niman kalpantsitsintin tlen nisiuj onkatkaj, san ika, sakin okimijli: “Noka nentenojnotsaskej [...] nochiuiyan ipan in tlaltikpaktli” (Hechos 1:8; Lucas 10:1).
Tlen okichiujkej akin yeuejkaui kichiuayaj ken Cristo. Inomachtijkauan Jesús nimantsin otetlakamatkej. Ipan Hechos 5:42 kijtoua: “Niman mojmostla ne ueyitiopan niman techajchan xkajkauayaj ika temachtiayaj niman tenojnotsayaj itechkopa JesuCristo”. Xsan sekimej akin kichiuayaj ken Cristo ijkon kichiuayaj, nochimej tenojnotsayaj. Ixtlamatki Neander ijkin okijto: “Celsus, yejua akin kachtopa opeuj tlajkuiloua intech cristianos. Kinpijpinaujtiaya pampa sekimej akin tenojnotsayaj xonomachtijkej, sekimej kichipauayaj iichkayo borrego, kinyektlaliayaj zapatos niman sekimej tekitiya ipan molino”. Jean Bernardi akin okijkuilo libro Los primeros siglos de la Iglesia okijto ika akin kichiuayaj ken Cristo “nonekiya nochimej niman nochiuiyan tenojnotsaskej ipan uejueyimej kalpamej, ipan plazas niman techajchan. Ijkuak nochi kuajli onkatka noso xnochi kuajli onkatka”. Niman noijki sakin okijto: “Nonekiya nochiuiyan tenojnotsaskej”.
¿Akinomej noijki ijkon kichiuaj aman? David Watson, se teopixki católico, kinemilia ika“aman miyekej xkineki kimatiskej itech toTajtsin pampa Iglesia xkineki temachtis niman xkineki tenojnotsas”. Ipan ilibro ¿Por qué se van los católicos?, José Luis Pérez Guadalupe okijto ika iteixpantijkauan Jehová nochipa tenojnotsaj techajchan xijkon ken evangélicos, adventistas noso okseki religiones.
Melak temojkatlachialti tlen okijto Jonathan Turley ipan Cato Institute: “Ijkuak tikinteneuaj iteixpantijkauan Jehová, miyekej nimantsin tlanemiliaj intech akin komintlapalouaj ijkuak más xkipiyaj tiempo. Iteixpantijkauan Jehová xsan tenojnotsaj techajchan san para makimatikan tlen kineltokaj, yejuamej ijkon kichiuaj pampa ijkon kiteititiaj ika tlaneltokaj”.
[Recuadro]
¿Yotikitak akinomej melauak kichiuaj ken Cristo?
Ipan okseki tlamachtiltin yotikitakej tlenon kijtoua Biblia ika kichiuaj akin melak kichiuaj ken Cristo, ¿yotikitak akinomej ijkon kichiuaj? Yemelak ika melak miyekej nemij akin kijtouaj ika kichiua ken Cristo, san ika, xkilnamiki tlen Jesús okimijli inomachtijkauan: “Xnochimej on yejuan nechijliaj: ‘NoTEKO, noTEKO’, kalakiskej ne kampa noTajtsin iluikak chanej tlamandaroua, yej san yejuamej on yejuan kichiuaj on tlen kineki noTajtsin iluikak chanej” (Mateo 7:21). Kuakon, tla tiknekij tikseliskej tlen iTekiuajyo toTajtsin kuajkuis ika tlayekapan, noneki tikitaskej akinomej melauak kichiuaj ken toTajtsin kimijlia akin yemelak kichiuaj ken Cristo niman tikchiuaskej ken yejuamej. ¿Tikuelitaskia tikmatis más itech iTekiuajyo toTajtsin niman tlen kuajkuis ika tlayekapan? (Lucas 4:43). Tla ijkon, xtlajto imiuan akin omitsmakakej yejuin revista: iteixpantijkauan Jehová.