“Yonikchiuj makixmatikan motoka”

“Yonikchiuj makixmatikan motoka akin yotinechinmakak ipan tlaltikpaktli. [...] Yonikchiuj makixmatikan motoka niman nochipa nikchiuas makixmatikan” (JUAN 17:6, 26, Traducción del Nuevo Mundo).

¿Tlenon kijtosnekiya Jesús? Yejua okiteijli kenon itoka toTajtsin ijkuak tenojnotsaya. Yejua nochipa kiteneuaya itoka toTajtsin ijkuak kipouaya Tlajkuiloltin ika Hebreo, itlaj tlen miyekpa kichiuaya (Lucas 4:16-21). a Noijki okinmachti inomachtijkauan ijkin makijlikan toTajtsin: “ToTajtsin, akin tinemi iluikak, ma mitsyekteneua nochi tlakatl” (Lucas 11:2).

Tlen okichiujkej akin yeuejkaui kichiuayaj ken Cristo. Ijkuak apóstol Pedro otlajto iuan tlayekankej de Jerusalén, okimijli ika toTajtsin okikixti se kalpan itech nochi países para makuika itoka (Hechos 15:14, TNM). Apóstoles niman inomachtijkauan Jesús kiteijliayaj ika “san akinon yejuan kitlajtlanilis toTEKO [“Jehová”, TNM] para ma makisa, toTEKO kimakixtis” (Hechos 2:21; Romanos 10:13). Ijkuak itlaj kijkuilouaya noijki kitekitiltiayaj itoka toTajtsin. Ipan xiuitl 300 otlan noijkuiloua se amatl tlen itoka Tosefta, kampa onotlali itlanauatiluan judíos. Ompa kijtouaya kenon okintlatijkej inamatlajkuiloluan akin kichiuayaj ken Cristo. Ijkin kijtouaya: “Nochi libros niman Evangelios [tlen intlatki katka akin judíos katkaj niman onochiujkej cristianos] xnoneki nokixtiskej, noneki nochi tlatlaskej niman noijki itoka toTajtsin”.

¿Akinomej noijki ijkon kichiuaj aman? Kampa peua Revised Standard Version tlen Consejo Nacional de las Iglesias de Cristo ne Estados Unidos otlapaleui makisa, kijtoua: “Desde yeuejkaui, ijkuak xinemiya nion se akin kichiua ken Cristo, xok nokuiya itoka toTajtsin niman xnoneki nokuis ipan Iglesia Cristiana. ToTajtsin xnoneki notokayotis pampa xnemi nion se ken yejua, san yejua toTajtsin”. Ika yejon, ipan yejon Biblia kampa nonekiskia notlalis itoka toTajtsin, san kijtoua “Toteko”. Xiuejkaui, Vaticano okimijkuilouili iobispos akin kinyekana: “Ipan iluimej, ipan tlakuikaltin niman oraciones xnoneki notekitiltis itoka toTajtsin tlen ijkuiliujtika ika tetragrammaton YHWH”. b

¿Nemij akin kitekitiltiaj niman temachtiaj itoka toTajtsin? Se telpochtli akin itoka Sergey okitak ika kema. Ijkuak telpochkonetl katka chantiya Kirguistán niman ipan se película okikak ika itoka toTajtsin katka Jehová. Xok kanaj okikak yejon tokayotl hasta ijkuak opanok 10 xiuitl. Ochantito Estados Unidos niman ompa omemej iteixpantijkauan Jehová okitlajpalotoj niman okititijkej ipan Biblia katlejua itoka toTajtsin. Sergey melak oyolpak pampa okinexti se religión tlen kitekitiltiaya itoka toTajtsin. Ipan diccionario Webster’s Third New International Dictionary, tla tiktlalia “Jehová Dios“, tiknextis yejuin: “Se Dios akin melak ueyixtika niman akin san kiueyichiuaj iteixpantijkauan Jehová”.

[Nota]