ITECH TLEN TLAJTOUA IXPAN
¿Melauak teijtlakoua pornografía?
Pornografía melak yokijtlako tlaltikpaktli. a Nonextia ipan televisión, música, Internet, películas, revistas, videojuegos, celular noso ipan okseki tlemach. Nesi ika yejuin melak yonoixmat. Miyekej tlaltikpakchanejkej yopeuj kitaj más pornografía xijki ken xiujtin tlen youajpanokej (xkita recuadro “Tlen yonoijto itech pornografía”).
Tlen kijtouayaj tlaltikpakchanejkej itech pornografía melak yonopatlak. Se maestra, Gail Dines, okijkuilo: “Tlaixkopinaltin tlen aman noteititiaj melak tsokuiltikej xijkon ken achto, aman san nochi noteititia”.
¿Tejua tlenon tiknemilia? ¿Yejuin teijtlako noso ka? Jesús okijto: “Nochi tlen kuajli kojtlakijlotl kipiya kuajli itlakyo, niman nochi tlen xkuajli kojtlakijlotl kipiya xkuajli itlakyo” (Mateo 7:17). ¿Tlen tlakilyotl kitlakitia pornografía? Matitlajtokan itech yeyi tlemach.
¿Kenon kimijtlakoua akin kitaj pornografía?
TLEN KIJTOUAJ IXTLAMATKEJ: Pornografía melak teijtlako, sekimej akin nomachtiaj itech yejuin, yokitakej ika melak teijtlako ijkon ken droga tlen kitokayotiaj crack.
Brian, b akin melak kuelitaya kitas pornografía, kijtoua: “Xtlaj ueliya nechteltiaya. Yeskia kentla ninemiskia drogado, miyekpa ninotlajtlakoltiaya niman melak nechkokouaya notsontekon. Melak oniuejkauj para ouel onijkajkauj yejon”.
Akin kitaj pornografía xkijtouaj tla ijkon kichiuaj pampa kanaj pijpinauij, ajmankamikij, najmanaj, kualanij niman hasta kanaj uelis kinemiliskej nomiktiskej. Sergio, akin kitemoltiaya pornografía ipan icelular, kijtoua: “Onikintlalkauij nochimej, melak najmankamikiya. Nikmachiliaya ika xtlaj ika nitepaleui, nikmatiya ika san noselti ninemiya. Melak ninomojtiaya nikimijlis oksekimej tlen nopan nochiujtoya”.
Maski san sejpa tikitas pornografía, uelis melak mitsijtlakos. Doctora Judith Reisman, akin onomachti itech pornografía, ijkin okijto ipan comité del Senado tlen onka ne Estados Unidos: “Tlaixkopinaltin itech pornografía, melak kimijtlakoua tlaltikpakchanejkej pampa xuelij nimantsin kilkauaj, xuelij kipopolouaj ipan intlamachilis pampa nochipa kilnamiktokej”. Susan, akin kipiya 19 xiuitl, okitak pornografía ipan Internet maski xkitejtemojtoya niman sakin okuelitak, yejua kijtoua: “Tlen onikitak xueli nikilkaua, san isiujkan nikilnamiki, nesi ika xkeman uelis nikilkauas”.
TLEN TIUELIJ: Pornografía melak teijtlakoua niman kinpiya ken esclavos (2 Pedro 2:19).
¿Kenon pornografía uelis kimijtlakos familias?
TLEN KIJTOUAJ IXTLAMATKEJ: “Pornografía kinxoxotonia familias niman akin yononamiktijkej” (The Porn Trap [Las trampas del porno], okijkuilo Wendy niman Larry Maltz).
Pornografía kintlajyouiltia akin yononamiktijkej niman familias pampa...
... xok kineltokaj ixnamik, niman kichiua ika akin yononamiktijkej maka sa manotlasojtlakan (Proverbios 2:12-17).
... kichiua san intech matlanemilikan niman manopatla tlen kimachiliaj iuan ixnamik (Efesios 5:28, 29).
... kichiua makileuikan tlen xkuajli (2 Pedro 2:14).
... imixnamik kichiualtiaj makichiuakan itlaj tlen xkuajli ijkuak iuan noteka (Efesios 5:3, 4).
... kichiua makikajkayaua ixnamik ika tlen kichiua niman ika tlen kinemilia (Mateo 5:28).
Biblia kijtoua ika akin yononamiktijkej maka manokajkayauakan (Malaquías 2:16). Pampa tla se kikajkayaua ixnamik, inamiktilis xoxotoni pampa noxelouaj niman ikoneuan melak tlajyouiyaj.
Pornografía sejneka noso tlamantik ken kimijtlakoua kokonej. Brian, akin yotikteneujkaj, oksejpa techijlia: “Ijkuak nikpiaya 10 xiuitl ninauiltijtinemiya niman oniknexti se revista tlen itlatki katka notaj niman kipiaya pornografía. Opeuj nikimita maski xnikmatiya tleka nikuelitaya yejon tlaixkopinaltin. Ijkon opeuj nikchiua tlen melak xkuajli hasta ijkuak iniueyi katka”. Miyekej yokitakej ika pornografía kichiua ika akin kemach noskaltijtokej manotekakan iuan yakaj, makistinemikan iuan miyekej, kimijtlakoua intlamachilis niman xok kuajli nomachiliaj.
TLEN TIUELIJ: Pornografía ken se veneno tlen kichiua ika familias maka sa manotlasojtlakan niman matlajyouikan (Proverbios 6:27).
¿Tlenon kijtoua iTlajtol toTajtsin itech pornografía?
TLEN KIJTOUA BIBLIA: “Yejua ika tej, xpopolokan nochi tlen xkuajli nemotech onkaj yejuan kisa ipan in tlaltikpaktli. Maka yakaj ma auilnemi. Xkixtikan nochi on tlen xchipauak ipan nemonemilis. Maka xkauilikan nemoeleuilis ma mechyekana, nion maka xnejnekikan on yejuan tlen xkuajli, nion maka xnekikan nochi nenkimoyaxkatiskej. Tla nenkinekij nochi nenkimoyaxkatiskej, on sano ijki ken nenkimauistiliskiaj on ídolos” (Colosenses 3:5).
Jehová c kitlauelita pornografía, san ika, xkichiua san pampa kitlauelita sexo. Pampa ijkuak yejua okinchijchiuj tlaltikpakchanejkej, kinekiya ika akin yononamiktijkej manotekakan, ijkon noititiskiaj ika notlasojtlaj niman ijkon noijki ueliskiaj kipiyaskej inkoneuan (Santiago 1:17).
Kuakon, ¿tleka tikijtouaj ika Jehová kitlauelita pornografía? Matikitakan tleka.
Jehová kimatstika ika pornografía uelis kichiuas maka sa kuajli manemikan tlaltikpakchanejkej (Efesios 4:17-19).
Yejua techtlasojtla niman xkineki matitlajyouikan (Isaías 48:17, 18)..
Kineki kintlajpiyas familias niman akin yononamiktijkej (Mateo 19:4-6).
Yejua kineki matichipaujkanemikan niman matiktlakaitakan ken nomachiliaj oksekimej (1 Tesalonicenses 4:3-6).
Kineki matiktlakaitakan totlalnakayo niman matiktekitiltikan ijkon ken yejua kineki (Hebreos 13:4).
Kimatstika ika pornografía kichiua matikitakan sexo ijkon ken Satanás kuelita (Génesis 6:2; Judas 6, 7).
TLEN TIUELIJ: Pornografía kichiua maka sa kuajli matouikakan iuan toTajtsin (Romanos 1:24).
San ika, Jehová kimiknelia akin kinekij kikajkauaskej yejuin. Biblia kijtoua: “ToTEKO teikneliani niman kuajli iyojlo. Yejua xniman kualani niman nochipa kipiya ueyi tetlajsojtlalistli yejuan xkaman tlamis. Pampa yejua kimatstikaj kenijki otechchijchiu. Kimatstikaj ika tejuamej titlachijchijtin ika tlalkuechtli” (Salmo 103:8, 14). ToTajtsin kimijlia akin yolyemankej intech manonisiuikan, tla ijkon tikchiuaj, yejua techmakas “iteiknelilis niman iueyi tetlajsojtlalis yejuan techpaleuis ijkuak itlaj techpolos” (Hebreos 4:16; xkita recuadro “ Kenon uelis tijkajkauas pornografía”)
¿Yokinpaleui tlaltikpakchanejkej akin okinokauilijkej toTajtsin makinpaleui? Biblia kijtoua: “Itechkopa toTEKO JesuCristo, niman itechkopa on iEspíritu toDios, yomechyolchipajkej niman nenmejejtokej itech Dios, niman sano Dios yokijtoj ika nochi nemotlajtlakoluan yokintlapojpoluij” (1 Corintios 6:11). Yejuamej nomachiliaj ijkon ken okijto Pablo: “Nochi niueli nikselia tlen nopan nochiua pampa Cristo yejua nechpaleuiya” (Filipenses 4:13).
Susan, akin ouel okikajkauj ika kita pornografía, techijlia: “San Jehová uelis mitspaleuis xkajkaua xkita pornografía. Tla tiktlajtlaniliaj matechpaleui, kuajli tomachiliskej niman kuajli iuan touikaskej. ToTajtsin xkeman techkauas”.
