1. ¿Tleka melak noneki matikpiyakan chikauak totlaneltokil?

¿YOTIMOTLAJTOLTIKA tla Jehová mitsmakixtis ijkuak yejkos ueyi tlajyouilistli? Pablo, itlatitlankauj Cristo, okijto ika melak noneki matikpiyakan tlaneltokijli tla tiknekij timakisaskej. Yejua okijto: “Dios xuelis tikpaktiskej tla xitech tikpiaj totlaneltok” (Hebreos 11:6). Kakisti xouijtika, san ika, “xnochimej kipiaj tlaneltoktli” (2 Tesalonicenses 3:2). Yejuin tlaxeloltin techititiaj ika melak noneki matochikauakan matikpiyakan chikauak totlaneltokil.

2, 3. a) ¿Tleka melak noneki matikpiyakan chikauak totlaneltokil? b) ¿Tlenon tiknankiliskej ipan yejuin tlamachtijli?

² Pedro, itlatitlankauj Cristo, okijto ika melak noneki matikpiyakan se tlaneltokijli tlen melak yokitlatlatakej (xpoua 1 Pedro 1:7). Pampa sa nisiuj tinemij ijkuak yejkos tlajyouilistli, tiknekij tikpiyaskej tlaneltokijli tlen matechmakixti (Hebreos 10:39). Ika yejon, noneki tochikauaskej niman ijkon totlaneltokil melak machikaui. Ijkon, Jesús techmakixtis ijkuak kipopolos tlen xkuajli nochiua aman. Kuakon, ijkon ken yejon tlakatl akin okitlajtlanili Jesús makimaka tlaneltokijli, tejuamej noijki uelis tikijtoskej: “Xnechpaleui más ma nitlaneltoka ken melauak noneki” (Marcos 9:24). Noso ken itlatitlankauan Jesús uelis tikijtoskej: “Xtechmaka más tlaneltoktli” (Lucas 17:5).

³ Ipan yejuin tlamachtijli tiknankiliskej yeyi tlajtoltilistin.  ¿Kenon uelis tikpiyaskej chikauak totlaneltokil? ¿Kenon tikteititiaj ika tikpiyaj chikauak totlaneltokil? ¿Niman tleka tikmatstokej ika tla tiktlajtlaniliaj Jehová tlaneltokijli yejua techmakas?

4. ¿Tlenon neskayomej uelis techpaleuis matikpiyakan chikauak totlaneltokil?

⁴ Jehová kineki matikpiyakan chikauak totlaneltokil. Ika yejon, ipan Biblia onka miyek neskayomej itech tlaltikpakchanejkej akin okipixkej chikauak tlaneltokijli. Yejon “tlen ye uejkaui onijkuiloj ipan on Yektlajkuilojli” techpaleuiya (Romanos 15:4). Neskayomej ken Abrahán, Sara, Isaac, Jacob, Moisés, Rahab, Gedeón, Barac niman oksekimej uelis kichikauas totlaneltokil (Hebreos 11:32-35). Noijki techpaleuiya intlaneltokil tokniuan tlen yokiteititijkej ipan yejuin tonajli. *

5. a) ¿Kenon okiteititi Elías ika kipiaya chikauak itlaneltokil? b) ¿Tlenon uelis totlajtoltiskej?

⁵ Elías teotlajtoketl semej itech yejon neskayotl tlen uajlauj ipan Biblia. Matikitakan makuilkan kampa okiteititi ika chikauak itlaneltokil. 1) Ijkuak Elías okijli tekiuaj Acab ika Jehová kichiuaskia matlauaki. Niman okijli ika ijkon panoskia pampa Jehová yokijtoka (1 Reyes 17:1). 2) Elías kineltokaya ika toTajtsin kinmakaskia tlen kinpoloua yejua niman oksekimej ijkuak tlauakiskia (1 Reyes 17:4, 5, 13, 14). 3) Elías kineltokaya ika Jehová ueliskia kiyolitis ikoneuj se siuakauajli (1 Reyes 17:21). 4) Kineltokaya ika Jehová kuajtitlaniskia tlitl tlen kitlatiskia uentli ipan tepetl Carmelo (1 Reyes 18:24, 37). Niman 5) ijkuak xikiyauiya, Elías kimatstoya ika kiyauis oksejpa. Okijli Acab matlakua niman matlaoni pampa iuajkakistitiuj kenon melak chikauak kiyauis (1 Reyes 18:41). Aman ika yotikitakej yejuin neskayomej uelis totlajtoltiskej: “¿Chikauak notlaneltokil ijkon ken Elías?”.

6. Tla tiknekij tikpiyaskej chikauak totlaneltokil, ¿tlenon noneki tiktlajtlaniliskej toTajtsin?

⁶ Tla tiknekij tikpiyaskej chikauak totlaneltokil, noneki tiktlajtlaniliskej toTajtsin matechmaka espíritu santo. ¿Tleka? Pampa tlaneltokijli ualeua itech espíritu santo (Gálatas 5:22, TNM). Jesús otechyolchikauj matiktlajtlanilikan Jehová matechmaka iespíritu santo niman okijto ika toTajtsin kinmaka akin kitlajtlaniliaj (Lucas 11:13).

7. Xkijto ika se neskayotl kenon tikpiyaskej nochipa chikauak totlaneltokil.

⁷ ¿Niman tla itikpiyaj chikauak totlaneltokil? Kuakon noneki matikitakan ika nochipa matikpiyakan chikauak. ¿Tleka? Pampa tlaneltokijli ijkon ken tlitl kampa tlatlatilo. Kachtopa uelis tlikuitos chikauak itliuj. San ika, tla tijkajkauaj tiktlaliliaj tlikojtli, peuas seuis. Noijki ijkon panoua ika tlaneltokijli. Tla xtiknekij tikpoloskej totlaneltokil noneki tikpouaskej Biblia mojmostla niman tomachtiskej. Ijkon melak tiktlasojtlaskej Jehová, tiktlasojtlaskej iTlajtol niman totlaneltokil melak chikauis.

8. ¿Tlenon tikchiuaskej niman ijkon tikpiyaskej nochipa chikauak totlaneltokil?

⁸ Tla tiknekij ika totlaneltokil nochipa machikauak, xkipiya ika kuajli tomachiliskej san ika tlen otomachtijkej ijkuak xtoapolaktiayaj. Noneki ok tomachtiskej itech Biblia (Hebreos 6:1, 2). Se neskayotl, uelis tomachtiskej kenon yonochiujkej seki teotlajtoltin. Noijki, ijkuak tomachtiskej Biblia, noneki tikitaskej tla tikteitititokej ipan tonemilis ika tikpiyaj chikauak totlaneltokil (xpoua Santiago 1:25; 2:24, 26).

9, 10. a) ¿Kenon techpaleuiyaj tokniuan matikpiyakan chikauak totlaneltokil? b) ¿Kenon techpaleuiyaj tlanechikoltin machikaui totlaneltokil? c) ¿Kenon techpaleuiya machikaui totlaneltokil tla titenojnotsaj?

 ⁹ Pablo okijto ika “ma titoyoleuakan se iuan okse  ika on tlaneltoktli yejuan tikpiaj” (Romanos 1:12). ¿Tlenon okijtosnek Pablo? Ika totlaneltokil chikaui ijkuak tinemij imiuan tokniuan ipan tlanechikojli. Yejuin ijkon panoua ijkuak iuan tinemij akin yomelaujkanenkej itech tlaueltin (Santiago 1:3). Akin xkuajli touan nouikaj san kiyemaniaj totlaneltokil, san ika, akin kuajli iuan touikaj kichikauaj totlaneltokil (1 Corintios 15:33). Ika yejon, Biblia technauatia nochipa matiakan ipan tlanechikoltin. Ompa toyoleuaj se iuan okse (xpoua Hebreos 10:24, 25). Niman, tlen tomachtiaj ipan tlanechikoltin noijki kipaleuiya machikaui totlaneltokil. Romanos 10:17 kijtoua ika ijkuak tomachtiaj Biblia melak tikpiyaj totlaneltokil chikauak. Ika yejon noneki totlajtoltiskej: “¿Nochipa niauj ipan tlanechikoltin?”.

¹⁰ Noijki chikauis totlaneltokil tla tikinmachtiaj oksekimej tlen Biblia kijtoua. ¿Tleka? Pampa ijkuak titenojnotsaj, tiuelij titlaneltokaj itech Jehová niman matiyolchikaujkej ijkon ken kachtopa tlaneltokakej (Hechos 4:17-20; 13:46).

11. a) ¿Tleka Josué niman Caleb okipixkej chikauak intlaneltokil? b) ¿Kenon uelis tikchiuaskej ken Josué niman Caleb?

¹¹ Ijkuak tikitaj kenon Jehová kinankilia toteoyouan niman techpaleuiya, totlaneltokil melak chikaui. Ijkon ipan onochiuj Josué niman Caleb. Ijkuak oyajkej oichtakatlachiatoj ipan Tlajli tlen Jehová yokimijlika kinmakas, okiteititijkej ika intlaneltokil melak chikauak katka. Ken opanotia xiujtin intlaneltokil ok melak okichikauj pampa kitayaj ika Jehová nochipa kinpaleuiaya. Ika yejon, Josué okimijli israelitas ika Jehová okichiuj tlen kuajli yokimijlika kichiuas. Sakin okimijli: “Kuakon, xmojkaitakan Jehová niman xtekichiuilikan ika yolmelaujkanemilistli niman xmelajkanemikan”. Niman noijki okijto: “Nejua niman nochanejkauan, tiktekichiuiliskej Jehová” (Josué 23:14; 24:14, 15). Tla tejuamej noijki titlaneltokaj itech Jehová niman tikitaj kenon techpaleuiya, totlaneltokil chikauis (Salmo 34:8).

12. ¿Kenon tikteititiaj ika tikpiyaj chikauak totlaneltokil?

¹² Santiago, inomachtijkauj Cristo, okijto: “Nejua nimitsititis notlaneltok itechkopa on kuajli tlajtlamach yejuan nikchiua” (Santiago 2:18). Ika yejuin tlajtoltin, Santiago okijtosnek ika chikauak totlaneltokil tikteititiaj ika tlen tikchiuaj. Matikitakan san seki kenon tikteititiaj totlaneltokil.

13. ¿Tleka tikteititiaj ika tikpiyaj tlaneltokijli ijkuak titenojnotsaj?

¹³ Ijkuak titenojnotsaj, tikteititiaj ika tikpiyaj tlaneltokijli. ¿Tleka? Pampa ijkuak titenojnotsaj tikteititiaj ika tikneltokaj ika sa nisiuj ijkuak tlapopoliuis niman “¡xuejkauis ika yejkos!” (Habacuc 2:3). Tla tiknekij tikmatiskej tla chikauak totlaneltokil, noneki totlajtoltiskej: “¿Niknemilia ika melak noneki manitenojnotsa? ¿Nikchiujtika nochi tlen niueli niman nikinnojnotsas nochimej itech toTajtsin? ¿Niktejtemoua kenon melak kuajli nitenojnotsas?” (2 Corintios 13:5). Tla tochikauaj titenojnotsaj tikteititiskej ika chikauak totlaneltokil (xpoua Romanos 10:10).

14, 15. a) ¿Kenon uelis tikteititiskej totlaneltokil ipan tonemilis? b) Xkijto kenon se tokniuj iuan ichanejkauan kipiayaj chikauak intlaneltokil.

¹⁴ Ijkuak tikxikouaj tlauejli tlen tikpiyaj mojmostla, tikteititiaj ika tikpiyaj totlaneltokil. Tla xtikpiyaj tlen ika topanoltiskej, tikpiyaj kokolistli, melak tajmanaj, toselti tomachiliaj noso okseki tlaueltin ken yejuin, noneki matitlaneltokakan itech Jehová niman Jesús ika “techpaleuis[kej] ijkuak itlaj techpolos” (Hebreos 4:16). Tla tiktlajtlaniliaj Jehová matechpaleui, tikteititiskej ika itech titlaneltokaj. Jesús okijto ika uelis tiktlajtlaniliskej toTajtsin “tlen tikuaskej on yejuan mojmostla ika tipanotokej” (Lucas 11:3). Ipan Biblia onka miyek neskayomej tlen teititia ika Jehová uelis techmakas maski sa tlenon techpoloua. Xnemili, ijkuak melak otlauak ipan Israel, Jehová okimakak Elías atl niman tlakuajli. Biblia kijtoua ika kakalomej kuajkuiliayaj pan niman nakatl ika kualkan niman pan niman nakatl ika yeuajli niman koniya atl ipan se atentli (1 Reyes 17:3-6). Tejuamej noijki uelis titlaneltokaskej ika Jehová techmakas tlen techpoloua ipan tonemilis.

 ¹⁵ Kuajli tikmatstokej ika tla tikchiuaj itlajtolyekanalisuan Biblia, uelis tikinmakaskej tochanejkauan tlen kinpoloua. Rebecca, se tokniuj akin yononamikti chanej Asia, kijtoua kenon yejua iuan ichanejkauan okichiujkej tlen kijtoua Mateo 6:33 niman Proverbios 10:4. Yejua kijtoua ika iueuentsin kipiaya itekiyo tlen ueliskia kijtlakos ken iuan nouika Jehová. Kuakon okikauj itekiyo. San ika, yejuamej kipiayaj naui inkoneuan tlen kintlakualtiskiaj. Kuakon opeujkej kichijchiuaj tlakuajli niman opeuj kinemakaj. Pampa chikauak otekitkej ouelkej okitlankej tomin niman ijkon kinmakaskej inchanejkauan tlen kinpoloua. Yejua kijtoua ika Jehová xkeman okinkauj niman xkeman okinpolo tlen kikuaskej. ¿Noijki ijkon mopan yonochijchiujka tlen yokichikauj motlaneltokil?

16. ¿Tlenon panos tla titlaneltoka itech Jehová?

¹⁶ Nochipa matikneltokakan ika Jehová techpaleuis tla tikchiuaj tlen yejua techtlajtlanilia. Yejon okijtosnek Pablo ijkuak otechilnamikti tlen okijto teotlajtoketl Habacuc: “San akin on yejuan itechkopa itlaneltok yolmelajki, nemis para nochipa” (Gálatas 3:11; Habacuc 2:4). Pablo okijto ika toTajtsin kipiya kojtilistli tlen ika techpaleuis hasta itech ken nion tejuamej xtiknemiliaj kenon (Efesios 3:20). Tejuamej tikchiuaj nochi tlen tiuelij ipan itekiyo toTajtsin. San ika, tikmatij ika xuelis tikchiuaskej nochi. Ika yejon, tikchiuaj tlen tiuelij niman tikneltokaj ika Jehová techteochiuas ipampa nochi tlen tikyejyekouaj tikchiuaj. Niman, melak tiktlasojkamachiliaj ika yejua techpaleuiya.

17. a) ¿Kenon okinnankili Jesús itlatitlankauan ijkuak okitlajtlanilijkej tlaneltokijli? b) ¿Tleka tikmatstokej ika Jehová techmakas tlaneltokijli tla tiktlajtlaniliaj?

¹⁷ Aman ika yejuin tlamachtijli tlen yotomachtijkej, kanaj tomachiliaj ken itlatitlankauan Jesús akin okijlikej: “Xtechmaka más tlaneltoktli” (Lucas 17:5). Jesús melak kualtsin okinnankili ipan Pentecostés xiuitl 33. Ipan yejon tonajli okinmakak espíritu santo niman okinpaleui makasikamatikan tlen kijtoua toTajtsin, niman yejon melak okinchikauili intlaneltokil. Niman yejuamej opeujkej tenojnotsaj ken xakaj kichiuaya niman xkeman nochiuaya (Colosenses 1:23). Jehová techijlia techmakas maski san tlenon tla tiktlajtlaniliaj “ijkon ken yejua kineki” (1 Juan 5:14). Ika yejon, tikmatstokej ika tla tiktlajtlaniliaj tlaneltokijli yejua techmakas.

18. ¿Kenon kinteochiua Jehová akin kipiyaj chikauak intlaneltokil?

¹⁸ Tla melak titlaneltokaj itech Jehová, yejua techteochiuas niman ijkuak tiktlajtlaniliskej tlaneltokijli, yejua techmakas. Kuakon, tikpiyaskej chikauak totlaneltokil niman tikseliskej itlateochiualis toTajtsin (2 Tesalonicenses 1:3, 5).