1. a) ¿Katlejua ikualneskayo toTajtsin melak ueyi kijtosneki? b) ¿Kenon tomachiliaj ika toTajtsin yejua tlasojtlalistli?

BIBLIA kijtoua ika “Dios yejua tetlajsojtlalistli” (1 Juan 4:8). Yejuin kijtosneki ika tlasojtlalistli se kualneskayotl melak ueyi itech ikualneskayouan. Yejua xsan kipiya tlasojtlalistli, yejua tlasojtlalistli. Nochi tlen kichiua, kichiua pampa tetlasojtla. Tiktlasojkamatij ika okichijchiuj iluikamej niman nochi tlen yoltika pampa tetlasojtla.

2. Pampa tikmatij ika Jehová techtlasojtla, ¿tlenon kuajli tikmatstokej? (Xkita tlaixkopinajli kampa peua tlen tomachtijtokej.)

² Tikmatstoskej ika Jehová kitlasojtla nochi tlen yokichijchiuj. Yejua techtlasojtla niman ika yejon kuajli tikmatstokej ika kichiuas tlen yokijto. Xnemili, pampa yejua tetlasojtla “yokitlalij on tonajli ijkuak nochi tlakatl kiyolkuitis ikan iyolmelaualis itechkopa Cristo” (Hechos 17:31). Kuajli tikmatstokej ika Jesús techyolkuitis ika melajkayotl. Kuakon, nochimej tlaltikpakchanejkej akin tetlakamatij kipiyaskej melak pakilistli kampa melak tlakualtsinkan yes ika tlayekapan.

3. Tla Jehová xtechtlasojtlaskia, ¿kenon tinemiskiaj ika tlayekapan?

³ Tla Jehová xtechtlasojtlaskia, ¿kenon tinemiskiaj ika tlayekapan?  Tlaltikpakchanejkej san yejuamej noyekantoskiaj semej iuan oksekimej ken kineki intajtsin akin kualantika, Satanás (2 Corintios 4:4; 1 Juan 5:19; xpoua Apocalipsis [Revelación] 12:9, 12). ¡Melak xkuajli tinemiskiaj tla Jehová xtechtlasojtlaskia!

4. ¿Tleka Jehová okikauili Satanás makixnamiki?

⁴ Ijkuak Satanás xokitlakamat Jehová, noijki okichiuj ika Adán niman Eva makixnamikikan. Okijto ika toTajtsin xkinamikiya matlayekana ipan iluikak niman ipan tlaltikpaktli. Noijki okijto ika yejua melak kuajli tlayekanketl xijkon ken toTajtsin (Génesis 3:1-5). Pampa Jehová se toTajtsin akin tlamachilise, okikauili mapano tonaltin niman ijkon Satanás makiteititi tla melauak tlen okijto. San ika, yonoteititi ika Satanás nion tlaltikpakchanejkej xuelij tlayekanaj.

5. ¿Tlenon yonoteititi ken youajpanotia tonaltin?

⁵ Ipan yejuin tlaltikpaktli melak ijtlakaujtiuj ken panotiuej tonaltin. Ipan 100 xiuitl tlen youajpanokej, ipantsin 100 millones tlaltikpakchanejkej yomijkej ipampa guerras. Ipan Biblia kijtoua ika ipan itlamiyan tonaltin tlaltikpakchanejkej nokuepaskiaj xkuakualtin (2 Timoteo 3:1, 13). Biblia noijki kijtoua: “Nejua kuajli nikmatstika, Jehová, ika tlaltikpakchane xueli noyekana. Se tlaltikpakchane nion xkimati kanon cholos ijkuak nejnemi” (Jeremías 10:23). Yemelak tlen kijtoua yejuin tlajtoltin. Ken youajpanotiajkej tonaltin yonoteititi ika Jehová xotexchijchiuj san tejuamej matoyekanakan.

6. ¿Tleka yotekauili toTajtsin ika akin xkuakualtin manemikan?

⁶ ¿Tleka Jehová yokinkauili manemikan xkuakualtin tlaltikpakchanejkej? Pampa ijkon yonoteititi ika san iTekiuajyo toTajtsin kuajli tlayekana. Ika tlayekapan, toTajtsin kinpopolos tlaltikpakchanejkej xkuakualtin. Sakin, tla yakaj oksejpa kichiua manoneltoka ika Jehová xkimelaua matlayekana, yejua kichiuas tlen noneki. Ika tlen yopanok yeuejkaui kiteititis ika akin xkuakualtin noneki makinpopolokan. Xok keman kinkauilis oksejpa manemikan xkuakualtin tlaltikpakchanejkej.

7, 8. ¿Kenon techititia Jehová itlasojtlalis?

⁷ Jehová techititia itlasojtlalis itech miyek tlemach. Se neskayotl, xnemili kech ueyi niman kualtsitsintin iluikamej. Ompa melak miyek onka planetas niman sitlalimej. Tonaltsintli semej itech yejon sitlalimej. Tla xoniaskia yejon tonaltsintli, xueliskia oniaskia nemilistli ipan tlaltikpaktli. Itech nochi tlen okichijchiuj nesi ikualneskayouan, ken ikojtilis, itlamachilis niman itlasojtlalis. Kema, “nochi tlen Dios itekiu yejuan xtikitaj ueli tikmatij itechkopa on tlajtlamach yejuan okitlalij. Desde ijkuak in tlaltikpaktli okitlalij, kuajli pantlantitikaj ika yejua Dios niman ika ipoder xkeman tlamis” (Romanos 1:20).

⁸ Jehová okichijchiuj tlaltikpaktli niman ijkon nochimej akin yoltokej kuajli ompa machantikan niman tlaltikpakchanejkej okintlali ipan se xochitlalpan. Noijki okinmakak itlanemilil tlen xkipiya tlajtlakojli niman intlalnakayo tlen ika ueliskiaj nemiskiaj nochipa (xpoua Apocalipsis 4:11). Niman Salmo 136:25 kijtoua: “Yejua kimaka tlakuajli nochi tlen yoltika, itlasojtlalis tlen xtekaua xkeman tlamis”.

9. Maski Jehová se toTajtsin akin tetlasojtla, ¿tlenon kitlauelita yejua?

⁹ Maski Jehová se toTajtsin akin tetlasojtla, kitlauelita nochi tlen xkuajli. Se neskayotl, Salmo 5:4-6 kijtoua: “Tejua xse toTajtsin akin mayolpaki itech tlen xkuajli; [...] tikintlauelita nochimej akin kichiuaj tlen xkuajli”. Noijki kijtoua ika yejua “kitlauelita akin kitoyaua yestli niman tekajkayaua”.

10, 11. a) ¿Tlenon inpan nochiuas xok uejkaujtipan tlaltikpakchanejkej akin xkuakualtin? b) ¿Tlenon kinmakas Jehová tlaltikpakchanejkej akin tetlakamatij?

¹⁰ Ken yotikitakej, Jehová se toTajtsin akin tetlasojtla niman kitlauelita nochi tlen xkuajli. Ika yejon, ijkuak yejua kijtos ika kipopolos nochi tlen xkuajli, kichiuas. Biblia kijtoua: “Akin  xkuakualtin popoliuiskej, san ika, akin tlamachiaj itech Jehová nemiskej ipan tlaltikpaktli. Niman sa achijtsin poliui, akin xkuajli iyojlo xok nemis”. Niman akin kitlauelitaj Jehová popoliuiskej (Salmo 37:9, 10, 20).

¹¹ ¿Tlenon kinmakas Jehová tlaltikpakchanejkej akin tetlakamatij niman kitlasojkamati itlasojtlalis? Kinmakas se kualtsin nemilistli. Biblia kijtoua: “Akin yolmelaujkej nemiskej ipan tlaltikpaktli, niman nochipa ipan chantiskej” (Salmo 37:29). Tlaltikpakchanejkej yolmelaujkej: “Melauak kinextiskej inyolpakilis ika ueyi yolseuilistli” (Salmo 37:11). ¿Tleka? Pampa toTajtsin tetlasojtla niman nochipa kichiua tlen melak kuajli ipampa itekipanojkauan yolmelaujkej. Biblia techijlia: “Dios kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok” (Apocalipsis 21:4). ¡Melak kualtsin nemiskej tlaltikpakchanejkej akin tetlakamatij niman akin kitlasojkaitaj itlasojtlalis toTajtsin!

12. Tla tiknekij matechita Jehová ika tiyolmelaujkej, ¿tlenon noneki tikchiuaskej?

¹² Biblia techijlia: “Xkita se akin xkipiya tlajtlakojli niman nochipa xkitsto se akin yolmelaujki, pampa ika tlayekapan yejon tlakatl nemis ika yolseuilistli” (Salmo 37:37, 38). Tla tiknekij ika Jehová matechita kentla tiyolmelaujkej, noneki tikixmatiskej iKoneuj niman tiktlakamatiskej nochi tlen kijtoua Jehová (xpoua Juan 17:3). Kuajli matikmatstokan ika yejuin tlaltikpaktli xok uejkauis kipopoloskej, san ika, akin “kichiuas tlen Dios kineki nemis para nochipa” (1 Juan 2:17). Pampa san nisiuj onka ijkuak tlapopoliuis, melak noneki matikchiuakan yejuin: “Xtlamachia ipan Jehová niman xkejyeua ojtli tlen itlatki” (Salmo 37:34).

13. ¿Kenon okiteititi toTajtsin ika melak techtlasojtla?

¹³ Maski titlajtlakolejkej, ueli tiktlakamatij toTajtsin. Noijki uelis iuan touikaskej pampa Jesús onotemakak topampa. ToTajtsin ijkon okiteititi ika melak techtlasojtla. Yejua okuajtitlan iKoneuj mamikiki inpampa tlaltikpakchanejkej tetlakamatkej niman ijkon mamakisakan itech tlajtlakojli niman mikilistli (xpoua Romanos 5:12; 6:23). Jehová kuajli kimatstoya ika Jesús yolmelaujkanemiskia, pampa ijkon yokichiujka uejkaujtipan ipan iluikak. Jehová melak okiyolkoko ijkuak okitak kenon okitlajyouiltijkej iKoneuj akin melak kitlasojtla. San ika, Jesús nochipa okiteititi ika toTajtsin kinamiki tlayekanas. Noijki, okiteititi ika se tlaltikpakchanejkej akin xkipiya tlajtlakojli ueliskia yolmelaujkanemis itech toTajtsin maski melak ouijtika tlen kixnamikis.

14, 15. ¿Kenon techpaleuiya tinochimej imikilis Jesús?

¹⁴ Jesús melak otlajyoui, san ika, oyolmelaujkanen hasta ijkuak omik niman okipaleui itlayekanalis Jehová tlen kinamiki matechyekana. ¿Kenon techpaleuiya imikilis Jesús tinochimej? Ueli kichiua ika tinochimej matiuelikan tinemiskej ipan se xochitlalpan. Pablo, itlatitlankauj Cristo, okijto ika Jehová niman Jesús techititiaj ika melak techtlasojtlaj ika yejon tlaxtlauijli. Yejua okijto: “Ipan on tonajli yejuan Dios okitlapejpenij, ijkuak tejuamej xotiuelkej otitomakixtijkej, Cristo omik impampa on xkuajkualtin tlakamej. Sanoyej ouijtikaj para yakaj mikis ipampa se yolmelajki tlakatl. Kas nemi se yejuan kipia iyojlo para mikis ipampa on yejuan semi sanoyej kuajli tlakatl. Pero maski ok titlajtlakolejkej katkaj, Cristo topampa omik. Ijkin, tej, Dios otechititij ken sanoyej techtlajsojtla” (Romanos 5:6-8). Niman Juan, itlatitlankauj Cristo, okijkuilo: “Dios okipantlantij ken techtlajsojtla ijkuak okuajtitlan isenteKonetsin ipan tlaltikpaktli para itechkopa iKonetsin ma tikpiakan nemilistli para nochipa. Xmatikan tlinon kijtosneki in tetlajsojtlalistli. In tetlajsojtlalistli xkijtosneki ika otiktlajsojtlakej Dios, yej yejua otechtlajsojtlak hasta okuajtitlan iKonetsin para omik” (1 Juan 4:9, 10).

¹⁵ Jesús okijto: “Dios sanoyej okintlajsojtlak on tlaltikpaktlakamej hasta okitemakak  isenteKonetsin para nochi on akin kineltokas xpoliuis, yej kipias yenkuik nemilistli para nochipa” (Juan 3:16). Maski Jehová melak okiyolkoko, yejua okinek ika iKoneuj mamiki topampa. Yejuin techititia ika melak techtlasojtla, niman yejua xkeman nopatlas. Pablo okijkuilo: “Kuajli nikmatstikaj ika xonkaj on tlen uelis techxelos itech itetlajsojtlalis Dios. On mikilistli, noso on nemilistli xueliskej. Niman yejua on iluikaktekitkej noso [...,] ajakamej [...,] tlen aman nochiua noso on tlen okse tonajli nochiuas [...,] on tlen onkaj ne iluikak noso ipan tlaltikpaktli. [...] On tlajtlamach yejuan Dios okinchijchiu xuelis techxelos itech on itetlajsojtlalis Dios yejuan otechmakak itechkopa toTekotsin Cristo Jesús” (Romanos 8:38, 39).

16. a) ¿Tlenon kijtosneki Tekiuajyotl kampa Cristo tlanauatia? b) ¿Akinon yokitlali toTajtsin matlayekana itech iTekiuajyo?

¹⁶ Ika Tekiuajyotl kampa Cristo tlanauatia Jehová noijki techititia ika techtlasojtla. Yejuin Tekiuajyotl yokitlali toTajtsin, niman yejua yokitlali se tekiuaj akin kintlasojtla tlaltikpakchanejkej niman melak kuajli kinyekanas (Proverbios 8:31). Jesucristo yejua tekiuaj, Mesías. Noijki, toTajtsin yokintlapejpeni 144,000 itech tlaltikpakchanejkej iuan mauajtlanauatikan iluikak. Ijkuak yoliuiskej ipan iluikak, yejuamej kasikamatiskej tlen kimachiliaj tlaltikpakchanejkej pampa onenkej noijki ipan tlaltikpaktli (Apocalipsis 14:1). Ijkuak Jesús onen ipan tlaltikpaktli, sa tenojnotsaya itech iTekiuajyo toTajtsin. Yejua okinmachti inomachtijkauan ijkin makichiuakan teoyotl: “ToTajtsin akin tinemi ne iluikak, machipaui motoka. Mauajla motekiuajyo. Manochiua nikan ipan tlaltikpaktli tlen tejua tikneki, ijkon ken nochiua ne iluikak” (Mateo 6:9, 10, TNM). Melak tiknekij ika yejon teoyotl manochiua niman yejon Tekiuajyotl makuajkui miyek tlateochiualistin.

17. ¿Kenon tlamantik noso sejneka tlayekana Jesús niman tlaltikpakchanejkej?

¹⁷ Melak tlamantik ken Jesús tlanauatia itech ken tlanauatiaj tlaltikpakchanejkej. Tlaltikpakchanejkej san yokinejkej maonia guerras niman san yokichiujkej melak miyekej mamikikan. Jesús techtlasojtla niman kipiya kualtsitsintin kualneskayomej ken Jehová, itech nochi kualneskayomej kipiya tlasojtlalistli (Apocalipsis 7:10, 16, 17). Jesús okijto: “Xuajlakan notech nemochimej yejuan yonensiaukej [...] niman nejua nemechmakas neseuijli. [...] Nejua niyolsejki niman niyolyemanki, niman notech nenkinextiskej neseuilistli para nemoalma. On temachtijli yejuan nejua nemechmaka xtepopoloj [noso xouijtika] para nenkitlakamatiskej” (Mateo 11:28-30). ¡Melak techtlasojtla Jesús!

18. a) ¿Tlenon panotok itech 1914 ika tlayekapan? b) ¿Tlenon tikitaskej ipan okse tlamachtijli?

¹⁸ Biblia temachtia ika iTekiuajyo toTajtsin opeuj tlanauatia itech xiuitl 1914. Itech yejon xiuitl ika tlayekapan kinsentlalijtika 144,000 akin tlanauatiskej iuan Jesucristo. Noijki kinsentlalijtika okse grupo akin makisaskej ijkuak tlapopoliuis niman nemiskej ipan Xochitlalpan. Yejuin grupo kitokayotiaj melak miyekej tlaltikpakchanejkej (Apocalipsis 7:9, 13, 14). ¿Kechmej nemij ipan yejuin grupo? ¿Tlenon kichia toTajtsin makichiuakan? Tikitaskej ipan okse tlamachtijli.