Ken onotlajtolkuep iTlajtol toTajtsin ajsi ipan toyojlo
“Itlajtol Dios kipia nemilistli.” (HEBREOS 4:12)
TLAKUIKALTIN 37 NIMAN 116
1. a) ¿Tlenon okijli toTajtsin makichiua Adán? b) ¿Tlenon ika tiktekitiltiaj tlajtojli akin tiitekipanojkauan toTajtsin?
JEHOVÁ otexchijchiuj matiuelikan matitlajtokan. Ipan Xochitlalpan, toTajtsin okijli Adán makintlalili intokayo nochimej yolkamej. Adán okitekitilti tlajtojli tlen toTajtsin yokimakaka niman ijkon ouel okintlapejpenili intokayo yolkamej (Génesis 2:19, 20). Ipan yejon tonajli ika tlayekapan, itekipanojkauan toTajtsin yotiktekitiltijkej tlajtojli tlen Jehová yotechmakak ika tikueyichiuaj niman ika titenojnotsaj itech yejua. Ipan yejuin tonaltin yotiktekitiltijkej ika tiktlajtolkuepaj Biblia niman ika tikinpaleuiyaj oksekimej makixmatikan Jehová.
2. a) ¿Tlenon okinemilijkej kichiuaskej akin okitlajtolkuepkej Traducción del Nuevo Mundo? b) ¿Tlenon tikitaskej ipan yejuin tlamachtijli?
2 Melak miyek Biblias yonotlajtolkuepkej, niman seki melauak tlen kijtouaj xijkon ken okseki. Tokniuan akin okitlajtolkuep Traducción del Nuevo Mundo kinekiyaj ika tlen kitlajtolkuepaskiaj melauak tlen makijto. Ika yejon okinemilijkej kichiuaskej yejuin yeyi tlemach. Kachtopa, manoueyichiua itoka toTajtsin niman manotlali nochipa itoka ken uajnestiuj ipan tlajkuiloltin tlen kachtopa onochijchiujkej (xpoua Mateo 6:9, TNM). Ika ome, tla ueliskia, kitlajtolkuepaskej se tlajtojli ika sa noijki se tlajtojli. Niman tla xueliskia, kitlajtolkuepaskej tlen kijtosneki. Ika yeyi, kitekitiltiskiaj tlajtoltin tlen xouijtika tikpouas niman tikasikamatis *(xpoua Nehemías 8:8, 12). * Iteixpantijkauan Jehová yotikchiujkej yejuin yeyi tlemach ijkuak otiktlajtolkuepkej Biblia ipantsin 130 tlajtoltin. Ipan yejuin tlamachtijli tikitaskej kenon onochiuj yejuin ipan Traducción del Nuevo Mundo tlen onoyektlali ipan 2013 ika inglés niman tikitaskej kenon noijki yokichiujkej akin okitlajtolkuepkej ika okseki tlajtoltin.
SE BIBLIA KIUEYICHIUA ITOKA TOTAJTSIN
3, 4. a) ¿Kanon uajnestiuj itoka toTajtsin ika hebreo? b) ¿Tlenon yokichiujkej ika miyek Biblias?
3 Ika hebreo itoka toTajtsin kipiya naui letras. Yejuin tokayotl uajnestiuj ipan amatlajkuiloltin tlen youejkauj onoijkuilojkej ika hebreo, ken tlajkuiloltin tlen ononextijkej itech mar Muerto. Noijki uajnestiuj ipan tlen okixkopinkej itech Septuaginta tlen okichijchiujkej kanaj itech 200 xiuitl ijkuak xiuajnemiya Cristo niman xiuitl 100 sakin ijkuak yotlakatka. Miyekej tlaltikpakchanejkej tlamojkaitaj ijkuak kitaj ika itoka toTajtsin melak miyekpa uajnestiuj ipan amatlajkuiloltin tlen youejkauj onoijkuilojkej.
4 Kuajli nesi ika itoka toTajtsin noneki onias ipan Biblia. Maski ijkon, ipan miyek Biblias yokipopolojkej. Se neskayotl, ipan 1901 okis American Standard Version. Ipan yejuin Biblia uajnestiaya itoka toTajtsin. Ipan 1950 okis Traducción del Nuevo Mundo de las Escrituras Griegas Cristianas ika inglés, kampa noijki uajnestiaya itoka toTajtsin. Ipan 1952 okis tlen okiyektlalijkej American Standard Version. Niman aman yejuin xok kipiaya itoka toTajtsin. ¿Tleka? Pampa akin okitlajtolkuepkej kinemiliayaj ika xkuajli kitekitiltiskiaj. Miyekej Biblias ika inglés niman ika okseki tlajtoltin noijki yokipopolojkej.
5. ¿Tleka melak noneki ika itoka toTajtsin maonia ipan Biblia?
5 Ijkuak yakaj kitlajtolkuepa se amoxtli, noneki kimatis tlenon kineki akin okichijchiuj yejon amoxtli niman yejon kitlalis ijkuak tlajtolkuepas. Jehová yejua akin okichijchiuj Biblia. Ipan miyek tlaxeloltin nesi ika yejua melak kineki makixmatikan niman makiueyichiuakan itoka (Éxodo 3:15; Salmo 83:18; 148:13; Isaías 42:8; 43:10; Juan 17:6, 26; Hechos 15:14). Ika yejon melak noneki ika itoka toTajtsin maonia ipan Biblia tlen kitlajtolkuepaj. Jehová okichiuj ika itoka melak miyekpa mauajnestiuj ipan amatlajkuiloltin tlen youejkauj onoijkuilojkej (xpoua Ezequiel 38:23). * Kuakon ijkuak akin tlajtolkuepaj kikixtiaj itoka toTajtsin ipan Biblia, xkitlakaitaj Jehová.
6. ¿Tleka itoka toTajtsin okitlalijkej okseki chikuasenpa ipan Traducción del Nuevo Mundo tlen onoyektlali ipan 2013 ika inglés?
6 Aman tikpiyaj miyek tlen ika tikijtoskej ika itoka toTajtsin noneki onias ipan Biblia. Ipan Traducción del Nuevo Mundo tlen onoyektlali ipan 2013 ika inglés uajnestiuj 7,216, kijtosneki ipan yejuin chikuasenpa onotlalili xijkon ken itech kachtopa. Makuilpa uajnestiuj ipan 1 Samuel 2:25, 6:3, 10:26 niman 23:14, 16. ¿Tleka? Pampa itoka toTajtsin uajnestiuj itech yejon tlaxeloltin ipan tlajkuiloltin tlen ononextijkej itech mar Muerto tlen kemach onoteititijkej. * Niman ika chikuasenpa onotlali itoka toTajtsin ipan Jueces 19:18. Onotlali pampa melak kuajli onomachtijkej amatlajkuiloltin tlen youejkauj onoijkuilojkej.
7, 8. ¿Tlenon kijtosneki itoka Jehová?
7 Akin melauak tikchiuaj ken Cristo melak ueyi kijtosneki kuajli tikasikamatis itoka toTajtsin. Yejuin tokayotl kijtosneki “Yejua Kichiua Manochiua.” * Kachtopa, toamatlajkuiloluan kijtouayaj tlen kijtosneki itech tlen kijtoua Éxodo 3:14, tlen kijtoua ipan nota: “Nejua ninochiuas tlen niktlapejpenis ninochiuas”. Ipan Traducción del Nuevo Mundo ika inglés tlen onochijchiuj ipan 1984 okijto ika Jehová nochiua tlen yejua kineki niman ijkon kichiua tlen yokijto. San ika, itech tlen onoyektlali ipan 2013 kijtoua ika maski itoka Jehová noijki uelis kijtosnekis yejuin, xsan ompa tlami itech tlen yejua kitlapejpenis nochiuas. Noijki kijtosneki ika yejua kichiua tlen yokichijchiuj manochiua itech tlen kineki niman ijkon manochiua tlen yokijto. (Noijki xkita amatlajkuilojli Tlen tepaleuiya timomachtis iTlajtol toTajtsin, página 5.)
8 ¿Kenon kichiua Jehová ika tlen yokichijchiuj manochiua tlen yejua kineki? Xnemili, toTajtsin okichiuj ika Noé manochiua se kuajli tlachijchiujketl ika akajli niman Belzalel manochiua se kuajli artesano. Noijki okichiuj ika Gedeón manokuepa se tlaixnamiketl niman Pablo manokuepa se misionero yolchikauak. Itoka toTajtsin melak ueyi kijtosneki itech itekipanojkauan. Ika yejon tokniuan akin okitlajtolkuepkej Traducción del Nuevo Mundo okitlalijkej itoka toTajtsin kampa nonekiya.
9. ¿Tleka Grupo akin Tlayekana ipan nochi tlanechikoltin kineki manotlajtolkuepa Biblia ika miyek tlajtoltin?
9 Onka miyek Biblias kampa kikixtiliaj itoka toTajtsin. San kitlaliaj “toTeko” noso itokayo se intajtsin tlen yejuamej kixmatij. Ika yejon, Grupo akin Tlayekana ipan nochi tlanechikoltin kineki ika nochimej makipiyakan se Biblia ika intlajtol kampa manoueyichiua itoka toTajtsin (xpoua Malaquías 3:16). * Hasta aman, Traducción del Nuevo Mundo kiueyichiua itoka toTajtsin ipan 130 tlajtoltin.
SE BIBLIA MELAUAK TLEN KIJTOUA NIMAN XOUIJTIKA TIKASIKAMATIS
10, 11. ¿Tleka ouijtika kitlajtolkuepaskej Traducción del Nuevo Mundo ika okseki tlajtoltin?
10 Tiktlajtolkuepas Traducción del Nuevo Mundo ika inglés ika okseki tlajtoltin kipiya seki tlen ouijtika. Se neskayotl, ipan Eclesiastés 9:10 niman okseki tlaxeloltin Biblia tlen onochijchiuj ipan 1984 ika inglés kitekitiltiayaj tlajtojli ika hebreo Seol. Okseki Biblias ika inglés noijki kitekitiltiaj. San ika, ipan miyek tlajtoltin xuajnestiuj ipan diccionarios niman xnoixmati. Miyekej tlaltikpakchanejkej hasta kinemiliaj ika Seol yemelak onka. Ika yejon, tlajtojli ika hebreo Seol niman tlajtojli griego Hades onotlajtolkuep “tlalkontli”. Ijkin ken onotlajtolkuep melauak niman xouijtika tikasikamatis.
11 Noijki ipan okseki tlajtoltin ouijtika kinmaka kitlajtolkuepaskej tlajtojli ika hebreo niman griego, ken tlajtojli “alma” tlen notlajtolkuepa ika español. Ipan yejuin tlajtoltin, tlajtojli alma nasikamati kentla tlen kisa itech totlalnakayo ijkuak timikij. Ika yejuin, notlajtolkueptok alma tlen yemelak kijtosneki itech tlen noijtoua. Itech apéndice ipan Biblia con referencias noijtoua kenon notekitiltia tlajtojli alma ipan Biblia. Yonotlali ipan notas itech tlaxeloltin kampa uajlauj tlajtoltin hebreas niman griegas niman ijkon maka maouijtika manasikamati.
12. ¿Tlenon onopatlak ipan Biblia tlen onoyektlali ipan 2013? (Noijki xkita “Ken onoyektlali Traducción del Nuevo Mundo” ika inglés.)
12 Tlen tetlajtoltiayaj tlajtolkuepkej ipan Biblia ipan okseki tlajtoltin ones ika onkatka tlajtoltin ipan Biblia ika inglés tlen ueliskia xkuajli nasikamatis. Ika yejon, Grupo akin Tlayekana ipan nochi tlanechikoltin okinemili ika ipan septiembre 2007 manoyektlali Traducción del Nuevo Mundo ika inglés. Tokniuan akin okiyektlalijkej onomachtijkej miyek tlen tetlajtoltiayaj akin kitlajtolkuepaj Biblia ipan nochiuiyan tlaltikpaktli. Okipatlakej tlajtoltin tlen yeuejkaui notekitiltiaya ika tlen aman notekitiltia. Okiyejyekojkej ika tlen kitlajtolkuepaskej makijto melauak niman xouijtika manasikamati. Ken tikitaj, tekitl tlen okichiujkej akin okitlajtolkuepkej ipan okseki tlajtoltin otepaleui manoyektlali Biblia ika inglés (Proverbios 27:11).
TOKNIUAN MELAK KITLASOJKAMATIJ
13. ¿Kenon nomachiliaj sekimej itech Biblia tlen onoyektlali ipan 2013?
13 ¿Kenon nomachiliaj tokniuan akin okiselijkej Biblia tlen onoyektlali ipan 2013? Melak miyekej yokontitlankej amatlajkuiloltin Brooklyn (Nueva York) kampa kijtouaj ika kitlasojkamatij. Se tokniuj siuatl okijto ika Biblia kipiya itlajtoluan toTajtsin, kentla se caja tlen kipiya kualtsitsintin temej. Yejua kita ika xouijtika tikpouas niman tikasikamatis Biblia. Ijkuak yejua kipoua, kimati kentla nochiuiyan kixtlalojtoskia yejuin temej kualtsitsintin, kita itlapalyo niman kenon melak kualtsin. Tlajtojli tlen xouijtika tikasikamatis ipan yejuin Biblia yokipaleui kuajli makixmati toTajtsin. Ijkuak kipoua, kita Jehová kentla se tajtli akin kinapaloua niman kinotsa ika tlasojtlalistli.
14, 15. ¿Kenon nomachiliaj tokniuan akin kipiyaj Traducción del Nuevo Mundo ika intlajtol?
14 Tokniuan akin xtlajtouaj inglés noijki melak kitlasojkamatij ika kipiyaj ika intlajtol Traducción del Nuevo Mundo. Se tlakatl chanej Bulgaria okijto ika miyek xiuitl yokipoujka Biblia, san ika, xkeman kipouaya se Biblia tlen xouijtika, tlen maajsi ipan iyojlo. Se tokniuj siuatl chanej Albania okijto ika Biblia ika albanés melak kualtsin kakisti. Niman okijto: “¡Se ueyi tlateochiualistli tijkakis Jehová ika motlajtol!”.
15 Ipan miyek países, xmiyekej kipiyaj Biblia, pampa patioj niman ouijtika tiknextis. Se neskayotl, ipan Ruanda, miyekej akin nomachtiayaj imiuan iteixpantijkauan Jehová xueliyaj noskaltiayaj itech intlaneltokil pampa xkipiayaj Biblia. Tlen kinemakayaj ipan teopan melak patioj katka niman ouijtika tikasikamatis. Ijkuak okis Traducción del Nuevo Mundo ika intlajtol, se familia tlen kipiaya naui ikoneuj okitlasojkamachili Jehová niman tekitketl yolmelauak. Yejuamej xueliyaj kikouayaj se Biblia, san ika, aman nochimej kipiyaj. Aman mojmostla kipouaj san sekan niman ijkon kititiaj Jehová ika kitlasojkamatij.
16, 17. a) ¿Tlenon kineki Jehová itech tinochimej? b) ¿Tlenon tiknekij tikchiuaskej?
16 Traducción del Nuevo Mundo tlen onoyektlali nochijchiuas ika miyek tlajtoltin ika tlayekapan. Satanás xkineki manochijchiua, san ika, Jehová kineki ika nochimej itekipanojkauan makipouakan itlajtol tlen xouijtika niman kuajli manasikamati (xpoua Isaías 30:21). * Xuejkauis, “tlaltikpaktli temis ika itlaixmatilis Jehová ijkon ken mar tentika ika atl” (Isaías 11:9).
17 Kuajli matiktekitiltikan tlen Jehová techtlayokolia, ken Traducción del Nuevo Mundo tlen kiueyichiua itoka. Matijkakikan mojmostla tlen techijlia ipan Biblia. Niman yejua nochipa kikakis toteoyouan. Tla kuajli iuan tonotsaj, melak kuajli tikixmatiskej niman tiktlasojtlaskej (Juan 17:3).
“¡Se ueyi tlateochiualistli tijkakis Jehová ika motlajtol!”
^ párr. 2 Xkita tlamachtijli “Cómo escoger una buena traducción de la Biblia”, itech Amatl Tekakistilijketl 1 Mayo 2008 (xonka ika náhuatl de guerrero). Noijki xkita ipan apéndice A1 Traducción del Nuevo Mundo tlen onoyektlali ipan 2013 ika inglés.
^ párr. 2 Nehemías 8:8, 12: “Niman ok chikauak kipoujtoyaj yejuin amoxtli, iTlanauatil toTajtsin akin melauak, kuajli kitetomiliayaj niman kiteijliayaj tlen kijtosneki; kuakon okinpaleuijkej tlaltikpakchanejkej makasikamatikan tlen kipoujtoyaj. Kuakon nochimej tlaltikpakchanejkej oyajkej otlakuatoj niman otlaonitoj niman okititlankej seki tlakuajli niman opeuj melak yolpakij, pampa yejuamej yokasikamatkaj tlajtoltin tlen okimijlikaj”.
^ párr. 5 Ezequiel 38:23: “Yemelak ninoueyichiuas niman ninochipauas niman imixpan miyekej países nikchiuas manechixmatikan; niman kipiya kimatiskej ika nejua niJehová”.
^ párr. 6 Tlajkuiloltin tlen ononextijkej itech mar Muerto youejkaujkaj ipantsin 1,000 xiuitl ika yonoijkuilokaj xijkon ken tlajkuiloltin ika hebreo tlen onotekitilti ipan Traducción del Nuevo Mundo.
^ párr. 7 Sekimej tlaixmatkej noijki ijkon kijtouaj, maski xnochimej.
^ párr. 9 Malaquías 3:16: “Ipan yejon tonaltin akin kimojkaitayaj Jehová otlajtokej se iuan okse, se iuan akin kistinemij, niman Jehová xnoteltiaya ika kuajli kinkakiya. Niman se amoxtli tlen tetlalnamiktia onoijkuilo ixpan inpampa akin kimojkaitayaj Jehová niman akin tlanemiliayaj itech itoka”.
^ párr. 16 Isaías 30:21: “Niman nemonakasuan kikakiskej se tlajtojli nemokuitlapan tlen kijtos: ‘Yejuin ojtli. Ipan yejuin xnejnemikan’, tla nenyaskiaj ipan nemoyekmakopa noso nenyaskiaj ipan nemoopochmakopa”.
Puede que también le interese
TLEN MIYEKPA NOTLAJTOLTILO
¿Kuajli onotlajtolkuep Traducción del Nuevo Mundo?
¿Tleka Traducción del Nuevo Mundo xijkon ken okseki biblias?
