Onitlakat ipan se kalpan tlen onka ne Sajonia, itech ueyi kalpan tlen noixmatiya ken República Democrática Alemana (RDA). Nofamilia kuajli nouika niman notlasojtla niman notajuan onechmachtijkej manikchiua tlen kuajli. Pampa República Democrática Alemana katka se país comunista, miyekej akin chantiyaj Sajonia kinemiliayaj ika xnonekiya kipiyaskej inreligión. Nejua xnitlaneltokaya itech toTajtsin. Desde nikonetl hasta ijkuak onikajxilti 18 xiuitl niknemiliaya ika xnemiya se toTajtsin niman ika comunismo ueliskia tepaleuis.

¿Tleka niknemiliaya ika comunismo ueliskia tepaleuis? Pampa ompa noijtouaya ika xnonekiya titechikoitaskej. Nejua xnikuelitaya manochikoitalo, niman hasta niknemiliaya ika melak kuajli yeskia tla toxelouiliskiaj nochi tomin tlen onka niman ijkon xok nemiskiaj akin melak kipiyaj tomin niman akin xkipiyaj tomin pampa tinochimej san noijki tikpiyaskiaj. Ika yejon, opeuj nitlapaleuiya ipan se grupo kampa nemiyaj telpokamej akin comunistas katkaj. Ijkuak nikpiaya 14 xiuitl, sajnoye onitlapaleui kampa kisentlaliayaj amatl tlen ueliskia okpa notekitiltis para maka melak maonia miyek tlasojli. Akin tlayekanayaj ipan municipio de Aue melak okuelitakej tlen onikchiuj, ika yejon, hasta onechmakakej se premio. Maski ok nitelpochtli katka, onikimixmat miyekej políticos akin uejueyixtoyaj. Nikmachiliaya ika kuajli tlen nikchiujtoya niman ika kuajli nonkisaskia.

San ika, san totoka nochi onopatlak. Ipan 1989 ouets itepan Berlín niman noijki opopoliuj se grupo comunista akin nemiyaj ne Europa del Este. Sakin onikmat ika miyekej kinchiuiliayaj tlen xkinamiki. Pampa akin xtlapaleuiayaj ipan comunismo kimitayaj ken akin xmás tepaleuijkej. Ijkuakon oninotlajtolti: “¿Tleka ijkon kichiuaj? ¿Xtemachtiaya comunismo ika xnoneki tochikoitaskej? ¿Tlen kijtouayaj comunistas xmelauak nochiuaskia?”. Nochi yejon melak nechajmanaya.

Ipampa nochi yejon, onikpatlak tlen nikchiuaya. Opeuj nikuelita nitlatsotsonas niman nitlatlapaluis. Yejua ika, onikalak ipan se escuela de música niman ijkon ueliskia ninomachtis ipan se universidad. Niknekiya niyes tlatsotsonketl niman nitlatlapaluijketl. Xok nikchiuaya nochi tlen onechmachtijkej ijkuak nipitentsin katka. Aman sa niktejtemouaya kenon ninoyolpaktis, yejua ika, hasta opeuj nikistinemi imiuan miyekej ichpokamej. Nikuelitaya nitlatsotsonas, nitlatlapaluis niman nikchiuas tlen nejua niknekiya, san ika, maski nikchiuaya nochi yejuin, xniyolpakiya. Niman nochi tlen nikmachiliaya nesiya ipan cuadros tlen nikintlapaluiaya. Kema, san nochipa ninotlajtoltiaya: “¿Tlenon panos ika tlayekapan? ¿Tleka otinemikoj?”.

Melak onimojkatlachix ijkuak onikmat tlen ninotlajtoltiaya. Se tonajli, ninemiya noescuela niman yejon teotlak oninotlali iuan sekimej telpokamej, yejuamej tlajtojtoyaj itech tlenon panos ika tlayekapan. Ompa nemiya se iteixpantijkauj Jehová, akin itoka katka Mandy. * Yejua onechijli: “Andreas, tla tikneki tikmatis nochi tlen timotlajtoltia, xkita tlen kijtoua Biblia”.

Xmás nikneltokaya tlen onechijli Mandy, san ika, maski ijkon, opeuj niktejtemoua ipan Biblia tlen niknekiya nikmatis. Ijkuak onikamapouj Daniel capítulo 2, tlen Mandy onechititi, melak onechmojkatlachialti. Yejuin teotlajtojli kinteneua uejueyixtokej tekiuajkej akin tlayekanaskiaj ipan yejuin tlaltikpaktli. Sakin, Mandy onechimititi ipan Biblia seki teotlajtoltin tlen tlajtouayaj itech tlen panoskia ika tlayekapan. Onikmat tlen xnikasikamatiya, san ika, aman ninotlajtoltiaya: “¿Akinon okimijkuilo yejon teotlajtoltin? ¿Akinon okijto nochi tlen panoskia ika tlayekapan? ¿Yejuin kijtosneki ika nemi se toTajtsin?”.

Sakin, Mandy okimijli Horst niman Angelika, akin noijki iteixpantijkauan Jehová katkaj, manechmachtikan itech Biblia. Yejuamej onechpaleuijkej más kuajli manikasikamati tlen kijtoua Biblia. Nimantsin onikitak ika san iteixpantijkauan Jehová melak kikuiyaj itoka toTajtsin, Jehová, niman kimijliayaj oksekimej kenijki itoka toTajtsin (Salmo 83:18, TNM; Mateo 6:9). Oniuel ika Jehová kineki matinemikan ipan se kualtsin xochitlalpan nikan ipan tlaltikpaktli. Ipan Salmo 37:9 kijtoua: “On yejuan kitlaliaj inyojlo itech toTEKO, kinoyaxkatiskej in tlajli”. Melak oniyolpak nikmatis ika nochimej akin kitlakamatij toTajtsin uelis chantiskej ipan se kualtsin tlaltikpaktli.

Niknemiliaya ika xniueliskia niktlakamatis tlen kijtoua Biblia. Nejua melak ninoueyimatiya pampa nitlatsotsonaya niman nitlatlapaluiaya, yejua ika, oninokojtili más niyolyemanki yes. Noijki, xueliya nikajkauaya ika niauilnemiya. Melak niktlasojkamati ika Jehová kintlasojtla, kimasikamati niman kimijyouiya nochimej akin nokojtiliaj kitlakamatiskej tlen kijtoua Biblia.

Desde nikonetl hasta ijkuak onikajxilti 18 xiuitl niknemiliaya ika xnemiya toTajtsin niman ika comunismo ueliskia tepaleuis, san ika, Biblia melak yonechpaleui. Aman yonikasikamat tleka oninemiko niman xok nechajmana tlen panos ika tlayekapan. Ipan 1993 oninoapolakti niman oninochiuj iteixpantijkauj Jehová, niman ipan 2000 oninonamikti iuan Tabitha akin chikauak tlaneltoka itech toTajtsin. Nejua iuan nosiuatsin melak tokojtiliaj tikinmachtiskej oksekimej itech Biblia. Miyekej noijki kinemiliaj ika xnemi toTajtsin niman ika comunismo ueliskia tepaleuis, ika yejon, melak niyolpaki nikinpaleuis makixmatikan Jehová.

Notajuan onomojtijkej ijkuak opeuj ninomachtia imiuan iteixpantijkauan Jehová. San ika, yejuamej yokitakej kenijki melak yonechpaleui ninomachtis Biblia. Aman melak niyolpaki pampa notajuan noijki yopeuj nomachtiaj Biblia niman nosentlaliaj imiuan iteixpantijkauan Jehová.

Nejua iuan Tabitha melak tiyolpakij pampa tokojtiliaj tiktlakamatiskej tlen kijtoua Biblia intech akin yononamiktijkej. Niman noijki tokojtiliaj xtokajkayauaskej, yejuin melak yotechpaleui kuajli matinemikan niman más matotlasojtlakan (Hebreos 13:4).

Xok san niknemilijtika tlenon ueliskia topan nochiuas noso tlenon panos ika tlayekapan. Aman iteixpantijkauan Jehová nikimita ken nofamilia, yejuamej san sekan melak yolpakij niman nopaleuiyaj. Kema, tejuamej xtochikoitaj niman yejuin tlen nejua nochipa oniknek, ninemis kampa xnochikoitalo.