¿Tiknemilia ika ajsis tonajli ijkuak tlaltikpakchanejkej kiyektlaliskej tlen panoua niman ijkon tinemiskej ika toyojlo? Tla tiknekij tikyektlaliskej tlen xkuajli panoua, noneki tikpopoloskej tlen kichiua ijkon mapano.

Xtlanemili itech yejuin: se tlakatl akin itoka katka Tom okualok niman sakin omik. ¿Tleka omik? Tlapajtiketl akin tekiti ipan hospital kampa okuikakaj Tom okijkuilo: “Ijkuak san kemach opeuj kualo, xakaj okitak tlenon kichiujtoya ika makualo”. Nesi ika akin kachtopa okitakej, okimakakej remedio tlen san okiteltili tlen kimachiliaya.

¿Noijki ijkon kichiujtokej tlaltikpakchanejkej ika tlen panoua ipan tlaltikpaktli? Matiknemilikan itech tlen kichiuaj tekiuajkej niman ijkon maka manochiua tlen xkuajli: yejuamej kitlaliaj tlanauatiltin, cámaras niman más miyekej policías. Maski yejuin tepaleuiya, xkipopoloua tlen xkuajli, pampa tlen kichiuaj tlaltikpakchanejkej ualeua itech tlen kinemiliaj, kineltokaj niman tlen inyojlo kileuiya.

Daniel, akin chanti ipan se país tlen nokaua Sudamérica kampa sajnoye xonka tomin, kijtoua: “Achtopa kuajli tinemiyaj. Xtomojtiayaj tla kemantika techtlachtekiliskej. San ika, aman xok kanaj uelis tinemis ika moyojlo. Miyekej kinpoloua tomin, yejuin yokiteititi tlenon yemelak onka ipan inyojlo: ika san kinekij kipiyaskej miyek tlemach niman ika xtetlakaitaj”.

Se tlakatl akin ouajkis itech Oriente Medio pampa ompa onkatka tlauejli, niman akin sakin opeuj nomachtia Biblia, kijtoua: “Kampa nejua nichantiya, miyekej políticos, teopixkej niman oksekimej kinyolchikauayaj telpokamej mauiyan ipan guerra niman ijkon kintlakaitaskiaj. Niman telpokamej akin imiuan noixnamikiyaj noijki ijkon kimijliayaj. Nochi yejon onechpaleui manikita ika melak xkuajli tla tikinneltoka tekiuajkej”.

Xkita tlen Biblia kijtoua:

• “Pampa sen tlakatl desde ijkuak konetl san kinemilia kichiuas on tlen xkuajli” (Génesis 8:21).

• “Toyojlo melak tekajkayaua xijkon ken itlaj okse, niman teijtlakoua. ¿Akinon uelis kixmatis?” (Jeremías 17:9).

• Itech toyojlo “kisa on xkuajli tlamachilistli, on temiktilistli, [...] on auilnemilistli, on tlachtekilistli [...] niman on tlauijuikaltilistli” (Mateo 15:19).

Tejuamej xtiuelij tikpopolouaj tlen xkuajli kileuiya toyojlo. Ijkuak tikitaj tlen xkuajli panoua ijkon ken yotikteneujkej, tikasikamatij ika más tijtlakaujtiuej (2 Timoteo 3:1-5). Niman ijkin panoua maski melak miyek itikmatij xijkon ken yeuejkaui. Kuakon, ¿tleka xueli tikchiuaj ika ipan yejuin tlaltikpaktli kuajli matinemikan? ¿Uelis tikchiuaskej yejuin? ¿Tikyejyekojtokej itlaj tlen xuelis nochiuas?

Maski tla ika se milagro tikpopoloskiaj tlen xkuajli kileuiya inyojlo nochimej tlaltikpakchanejkej, tlaltikpaktli xnoyektlaliskia. ¿Tleka? Pampa tejuamej xnochi ueli tikyektlaliaj.

 Yejuin tlen panoua: “Se tlaltikpakchane nion xkimati kanon cholos ijkuak nejnemi” (Jeremías 10:23). Kema, xotexchijchiujkej san tejuamej matoyekanakan. Tejuamej xtiuelij toyekanaj ijkon ken xtiuelij tinemij ijtik atl.

Xmotlajtolti, ¿kuelitaj tlaltikpakchanejkej ika oksekimej makimijlikan kenon nemiskej niman tlenon kichiuaskej? ¿Kuelitaj makimijlikan kenon tlanemiliskej ijkuak yakaj kitlajkali ikoneuj noso kenon kinmachtiskej inkoneuan? Yejuin san seki tlemach tlen kichiua maka kuajli matouikakan imiuan oksekimej. Kuakon, maski techtekiyomakas tikneltokaskej, tlen kijtoua Biblia yemelak. Tejuamej xueli san no tejuamej toyekanaj niman nion xtechnamiki tikchiuaskej. Kuakon, ¿akinon uelis techpaleuis?

San toTajtsin uelis techpaleuis pampa yejua otexchijchiuj. Miyekej kinemiliaj ika yotechilkauj, san ika, yejon xmelauak pampa yotechmakak Biblia tlen ika uelis topaleuiskej. Ijkuak tikasikamatij Biblia, noijki más toasikamatij. Noijki tikasikamatij tleka uajnochiujtiuj tlen xkuajli. Se ixtlamatki alemán okijto ika tlaltikpakchanejkej niman tekiuajkej xkeman itlaj uelij itech tlen yopanok.

Se tlakatl akin melak tlamachilise okijto ika tla itlaj kuajli onkisa, kuakon kijtosneki ika onochiuj ika tlamachilistli (Lucas 7:35, TNM). Ipan Isaías 2:22 kijtoua: “Maka sa xtlalikan nemoyojlo itech yakaj tlakatl”. Yejuin tlajtoltin techpaleuiyaj maka matikneltokakan tlen xuelis nochiuas. Kenneth, akin chanti ipan se kalpan itech Norteamérica kampa melak nochiua tlen xkuajli, kijtoua: “Nochimej políticos kijtouaj ika tlayektlaliskej, san ika, xuelij kichiuaj. Yejuin kiteititia ika yemelak tlen kijtoua Biblia”.

Daniel, akin yotikteneujkaj, okijkuilo: “Mojmostla más kuajli nikita ika nion se tekiuaj xuelis kuajli tlayekanas... Tikpiyas motomin ipan banco noso kanaj oksekan tikejyeuas xkijtosneki tla ika tlayekapan kuajli tinemis. Yonikitak ika sekimej yonajmankej pampa xonochiuj tlen kichiayaj”.

Biblia xsan techpaleuiya maka matikneltokakan tlen xuelis nochiuas, noijki techijlia ika uelis itlaj tikchiaskej ika tlayekapan. Sakin itech yejuin titlajtoskej.