Se escuela tlen onka Canadá okinuikaka sekimej telpokamej okinpaxaloltito. Niman ijkuak opaxalotoj, omemej telpokamej okinajnauiltijkej se telpokatl. Nochimej yejon telpokamej nomachtiayaj ipan se escuela tlen melak noixmati. Sakin ika opanok yejon, Leonard Stern okijkuilo ipan periódico Ottawa Citizen ika telpokamej xkikajkauaj kichiuaj tlen xkuajli maski melak matlamachilisejkej, melak manomachtikan noso maski melak makipiyakan tomin.

Stern noijki okijto ika tajtin nonekiskia najmanaskej kinmachtiskej inkoneuan makimatikan tlenon kuajli niman tlenon xkuajli. San ika, xijkon panoua. Stern okijto: “Miyekej tajtin melak kinekij ika inkoneuan kuajli makisatij kampa nomachtiaj noso matekitikan kampa kitlaniskej miyek tomin”.

Maski melak tepaleui ijkuak se nomachtia ipan se escuela, yejon tlen nomachtia xkichiua maka ok makileuijto niman makinemilijto kichiuas tlen xkuajli. Kuakon, ¿tlenon uelis techpaleuis matikasikamatikan tlenon kuajli niman tlenon xkuajli?

Biblia kentla se espejo yeskia. Ijkuak tikpouaj, tikitaj tlenon xueli tikchiuaj niman tikasikamatij tleka techtekiyomaka tikchiuaskej tlen kuajli (Santiago 1:23-25). Biblia noijki techpaleuiya matoyektlalikan, matiteiknelikan, matiteijyouikan, sa no tejuamej matoteltikan niman matitetlasojtlakan. Nochi yejuin kichiua matinemikan ika yolseuilistli niman kuajli matouikakan imiuan oksekimej. Biblia kijtoua ika tlasojtlalistli kichiua san sekan matinemikan (Colosenses 3:14). ¿Tleka melak tepaleui titetlasojtlas? Xkita tlen kijtoua Biblia itech yejuin.

• “On yejuan tetlajsojtla tlajtlamach kimijyouilia oksekimej niman yolyemanki. On yejuan tetlajsojtla xnexikolej, niman xnoueyiteneua nion noueyimati [...,] xkitejtemoua on tlen kuajli san para yejua [...,] xsan kuajkualani, niman xsa konelnamiktikaj on tlen oksekimej itlaj xkuajli okichiuilijkej [...,] xpaki  ika on tlen xkuajli kichiuaj oksekimej, yej paki ijkuak kita tetlani on tlen kuajli [...,] kixikoua nochi tlajtlamach tlen xkuajli, [...] kimijyouiya oksekimej. On yejuan tetlajsojtla xkaman tlami itetlajsojtlalis” (1 Corintios 13:4-8).

• “Yejuan tetlajsojtla xkitechiuilia on tlen xkuajli” (Romanos 13:10).

• “In yejua más ueyi kijtosneki. Sanoyej xmotlajsojtlakan iuan oksekimej pampa tla melauak nentetlajsojtlaj nenkitlapojpoluiskej yejuan mechchiuilia tlen xkuajli” (1 Pedro 4:8).

¿Xmelak ika ijkuak tinemij imiuan akin techtlasojtlaj kuajli tomachiliaj? Kema, pampa tikmatstokej ika yejuamej kinekij kuajli matinemikan, xkinekiskiaj texchiuiliskej itlaj tlen xkuajli.

 Ijkuak titetlasojtlaj, tiknektokej topatlaskej niman tikchiuaskej okseki ipan tonemilis. Xkita tlen okichiuj se tlakatl itoka George. Yejua melak kinekiya iuan nemis ixuitsin akin kemach yotlakatka. San ika, George melak pokiya niman imon xkinekiya ixpan mapoki ikonetsin. ¿Tlenon okichiuj George? Maski yejua ikuikaya 50 xiuitl ika pokiya, okikajkauj ika poki pampa kinekiya nemis iuan ixuitsin. ¡Kema! Ijkuak se tetlasojtla, ueli kipatla inemilis.

Tinochimej noneki tomachtiskej titetlasojtlaskej. Tajtin kipiyaj se ueyi tekitl pampa noneki kinmachtiskej inkoneuan matetlasojtlakan. Kinmakaj inkoneuan tlen kikuaskej, kintlajpiyaj niman kinpaleuiyaj ijkuak itlaj inpan nochiua noso ijkuak kualoj. Tlajtouaj imiuan inkoneuan niman kinmachtiaj. Yejuamej noijki kinmelajkatlaliaj niman kimititiaj tlenon kuajli niman tlenon xkuajli. Niman akin kuajli tajtin, nokojtiliaj kichiuaskej tlen kinmachtiaj inkoneuan.

Teajman ika sekimej tajtin xijkon kichiuaj. ¿Kijtosneki yejon ika inkoneuan xkeman ueliskej kichiuaskej tlen kuajli? ¡Ka! Miyekej akin iuejueyimej yonopatlakej maski inchanejkauan melak xkuajli nemiyaj. Aman yejuamej tetlasojtlaj niman kichiuaj tlen kuajli. Ipan yejuin revista tikitaskej kenon sekimej yonopatlakej maski miyekej kinemiliayaj ika xkeman nopatlaskiaj.