¿Tleka miyekej xok kitlakaitaj nemilistli?
TLEKA NONEKI TIKTLAKAITASKEJ NEMILISTLI
Ijkuak tikchiuaj seki tlemach tlen uelis kijtlakos totlalnakayo niman tonemilis, tikteititiaj ika xtiktlakaitaj tonemilis nion innemilis oksekimej.
-
Tla tipoki noso titlachichina, uelis mitsajsis cáncer niman ijkuak yomitsajsik yejon kokolistli, motlalnakayo xok uelis mitspaleuis xxiko yejon kokolistli. Ipantsin 90% akin kinmajsi cáncer de pulmón mikij pampa pokiyaj noso pampa kikuiyaj tabaco, noso noijki pampa nemiyaj nisiuj intech akin pokiyaj.
-
Sejse xiuitl, miyekej xuelij kilkauaj kenon onomachilijkej ijkuak onenkej kampa onomotlalok. Universidad de Stanford tlen nokaua ne Estados Unidos, kijtoua: “Maski akin onenkej kampa onomotlalok xtlaj okinchiuilijkej, yejuamej xuelij kilkauaj ken onomachilijkej maski yopanokej miyek xiujtin”.
-
Melak temojti tla yakaj akin melak yotlauan noso yokitekitilti drogas kinejnemiltia se carro pampa uelis kimantikisas akin nemij ipan carretera niman noijki akin nejnentinemij ipan ojtli. Ika yejon, miyekej mikij noso nokokouaj san pampa oksekimej xkitlakaitaj nemilistli.
TLEN TEJUA UELIS TIKCHIUAS
Xtlajpiya motlalnakayo. Tla tikita ika seki tlemach kijtlakoua motlalnakayo uelis tijkajkauas, ken tipokis, tikonis alcohol noso tiktekitiltis drogas. Tla xtikajkaua, uelis tikualos niman tikteititia ika xtiktlakaita monemilis nion innemilis mochanejkauan.
Xkita kenon uelis tiktlajpiyas monemilis niman innemilis oksekimej. Xkita ika kampa tichanti nochi kuajli maonia niman ijkon xakaj uelis nokokos. Kuajli xnejnemilti mocarro niman noijki xkita ika nochi kuajli maonia. Maka xkinkauili oksekimej mamitschiualtikan xchiua itlaj tlen uelis mitskokos noso hasta uelis mitsmiktis.
Xkinchiuili tlen kuajli oksekimej. Tikteititiaj ika tiktlakaitaj nemilistli ijkuak kuajli tikiminotsaj oksekimej maski tlamantikej noso sesejnekamej nesij, maski san kanon ualeuaj, tla onomachtijkej noso ka, noso tla kipiyaj tomin noso tla xkipiyaj. Matikilnamikikan ika titechikoitas niman titetlauelitas yokichiuj ika ipan nochi tlaltikpaktli melak manouisokikan niman maoniakan guerras.
TLEN TIKCHIUAJ AKIN TIITEIXPANTIJKAUAN JEHOVÁ
Tikteijliaj ken tiktlajpiyaskej totlalnakayo ken kinamiki. Ipampa tlen titemachtiaj itech Biblia miyekej youel yokikaujkej miyek tlemach tlen kijtlakouaya intlalnakayo niman yonopatlakej.
Kampa tikalchijchiuaj melak totlajpiyaj. Akin tlapaleuiyaj para kinchijchiuaskej Kaltin kampa tosentlaliaj noso okseki kaltin, kinmachtiaj kenon tekitiskej niman ijkon xnokokoskej. Ijkuak yonochijchiujkej, tokniuan miyekpa kominitaj yejon kaltin niman kitaj tla noneki itlaj noyektlalis niman ijkon tikintlakamatiskej intlanauatiluan tekiuajkej.
Tikinpaleuiyaj oksekimej. Xiuejkaui, akin tiiteixpantijkauan Jehová ipan se xiuitl otikinpaleuijkej akin otlajyouijkej ipan 200 veces kampa otlaixpoliuj ipan nochi tlaltikpaktli. Kanaj 12 millones de dólares itech tomin tlen miyekej kitemakaj ika nochi inyojlo otikuikej para titepaleuiskej.
Ijkuak miyekej opeuj kualoj ika kokolistli Ébola ne África Occidental ipan 2014 niman ipan República Democrática del Congo ipan 2018, akin tiiteixpantijkauan Jehová otikimititijkej oksekimej kenon uelis notlajpiyaskej niman ijkon maka kualoskej itech yejuin kokolistli tlen melak temojti. Otikomintitlankej sekimej tokniuan niman ijkon kitemakaskiaj se tlamachtijli tlen itoka “Titetlakamatis mitsmakixtis”. Ipan nochi kaltin kampa tikueyichiuaj Jehová kiyauak onotlalijkej kampa ueliskiaj nomapajpakaskiaj. Niman otikteijlikej ika melak nonekiyaj nomapajpakaskiaj niman kichiuaskiaj okseki tlemach para ijkon xkualoskiaj.
Ne Sierra Leona, ipan radio okijtokej ika melak kuajli ika iteixpantijkauan Jehová kinpaleuiayaj maka makualokan ika kokolistli Ébola akin imiuan nosentlaliaj niman oksekimej.
Ipan se Kajli kampa tosentlaliaj ne Liberia, okitlalijkej kampa nomapajpakaskej ijkuak opeuj kokolistli Ébola ipan 2014.
a Yeuejkaui ipan Oriente Medio, yejuin tlanauatijli kiteititiaya ika tikintlajpiyas mochanejkauan niman oksekimej para maka manokokokan melak ueyi kijtosnekiya.
