Ajakatl melak yotsojkuiliuj niman yejon uelis kimijtlakos nochimej akin kijyotilana ajakatl. Organización Mundial de la Salud okijto ika ipan nochi tlaltikpaktli san achijtsitsintin akin kijyotilanaj ajakatl tlen chipauak.

Pampa ajakatl melak yotsojkuiliuj, miyekej yokinmajsik cáncer de pulmón niman okseki kokolistin tlen kichiuaj maka kuajli manijyotikan noso maka kuajli matekiti inyojlo. Niman pampa melak yotsojkuiliuj ajakatl, sejse xiuitl mikij kanaj 7,000,000 tlaltikpakchanejkej.

Tla xsajnoye tiktsokuilotiskiaj tlaltikpaktli, tlaltikpaktli ueliskia kichiuas ika nochi tlen yoltok, makijyotilana ajakatl tlen chipauak. Matikitakan seki ken tlaltikpaktli kichipaua ajakatl.

• Miyekej kimatstokej ika kojtin ueli kichichinaj dióxido de carbono, san ika, miyekej xkimatij ika kojtin tlen onokej kampa atitlankojyo, más kuajli kichiuaj yejuin tekitl. Yejuin kojtin melak tepaleuiyaj pampa kikixtiliaj ajakatl makuiltipan más dióxido de carbono, xijkon ken kampa kojyo.

• Kemach yonoitak ika seki plantas tlen onokej ijtik mar, ken se tlen itoka quelpo noso kelp, xsan kichichinaj dióxido de carbono, noijki ueli kitlalpachouaj. Yejuin planta ueli apankisa niman uejka yauj pampa imatsitsinuan ijyotemij, san ika, ijkuak ajsi itlajkotian mar, toponij imatsitsinuan niman planta apolaki iuan dióxido de carbono, niman uejkaujtipan ompa nokauaj.

• Ijkuak tikaltsauktoyaj ipampa COVID-19, kuajli ones ika atmósfera ueli noyektlalia. Ipan 2020 xok sajnoye titlatsokuilotiayaj pampa miyek fábricas xok tekititoyaj niman miyekej xok kintekitiltiayaj incarros, ika yejon, ipan yejon xiuitl ochipauj ajakatl. Se organización akin kita tla kuajli onka ajakatl okijto ika ijkuak otechkaltsaukkej ipan 2020 melak nimantsin ochipauj ajakatl tlen sajnoye yotsokuiliujka ipan seki países.

Tekiuajkej kimijliaj empresas makitakan kenon uelis kichiuaskej niman ijkon xsajnoye kitsojkuilotiskej ajakatl. Miyekej ixtlamatkej yokitakej kenon uelis xok melak tiktsojkuilotiskej ajakatl niman kenon uelis nochipauas tlen yotsojkuiliuj. Yejuamej yokitakej ika uelis notekitiltiskej seki yolkatsitsintin tlen xueli tikimitaj para makikuepakan tlen teijtlako ika itlaj tlen xteijtlako. Ixtlamatkej noijki kijtouaj ika maka melak matijkuikan carro, yej más kuajli tla san tinejnentinemij noso tla tijkuij bicicleta, niman ika ipan tochan maka melak matiktekitiltikan tlen kijtlakoua ajakatl.

Yejuin yotepaleui, san ika, noneki okseki itlaj nochiuas. Ijkon okijtojkej agencias internacionales ipan 2022, kampa teuan, Organización Mundial de la Salud niman Banco Mundial.

Noijki okijtojkej ika ipan 2020, casi tlajkotipan tlaltikpakchanejkej tlaikxitiayaj ika tlen kijtlakoua ajakatl. Miyekej xuelij kinokouiliaj se estufa tlen yenkuik, noso xuelij tlaikxitiaj ika okse itlaj tlen xmás kijtlakoua ajakatl.

“ToTEKO Dios, yejuan okitlalij niman okipatlau on cielo, niman okitlalij in tlaltikpaktli niman nochi on tlen ipan noskaltia niman tlaki; on yejuan kichiua para nijyotiaj niman nemij in tlaltikpaktlakamej” (Isaías 42:5).

ToTajtsin okitlali ajakatl niman noijki okitlali nochi tlen noneki para san yejua manochipaua, yejua melak kojtik niman melak techtlasojtla. Kuakon, uelis kuajli tikmatstoskej ika toTajtsin kipopolos nochi tlen kijtlakoua ajakatl. Xkita tlamachtijli “ToTajtsin kijtoua ika tlaltikpaktli makisas”.