San ika, tla xkuajli kikuij tecnología, uelis inpan nochiuas yejuin:

• Uelis kichiuas maka san sekan manemikan.

• Maski yotlan tekitij ok kinekiskej tekititoskej inchan.

• Uelis kichiuas maka matlaneltokakan itech imixnamik niman hasta uelis nokajkayauaskej.

IJKUAK SAN SEKAN NEMIJ

Se tlakatl akin itoka Michael kijtoua: “Kemantika, ijkuak san sekan ninemi iuan nosiuatsin, yejua nion xnechitasneki pampa san kitstika iteléfono niman nechijlia ‘Xnechtlapopolui, nikinpojtika mensajes tlen onechinuajtitlanilijkej’”. Jonathan, akin noijki yononamikti, kijtoua ika kemantika “uelis omemej san sekan nemiskej, san ika, nomachiliskej kentla uejka nemiskiaj”.

XNEMILI YEJUIN: ¿Tijkauilia ika moteléfono mamitskuili tiempo ijkuak san sekan tinemi iuan moueuentsin noso iuan mosiuatsin? (EFESIOS 5:33).

TEKITL

Sekimej, noneki tekitiskej ika tonajli niman ika yeuajli. Oksekimej kanaj xnoneki tekitiskej miyek tiempo, san ika, ok kinekij tekititoskej ijkuak ajsij inchan. Se tlakatl akin itoka Lee kijtoua: “Ijkuak san sekan ninemi iuan nosiuatsin melak ouijtika nikita xok nitenankilis ijkuak nechnotsaj kampa nitekiti”. Se tesiuauj akin itoka Joy kijtoua: “Pampa nejua nitekiti nochan noneki ninokojtilis niman ijkon xnochipa nitekititos”.

XNEMILI YEJUIN: Ijkuak moueuentsin noso mosiuatsin mitsnotsa, ¿kuajli tikaki? (LUCAS 8:18).

UELIS TIKAJKAYAUAS

Yonoitak ika miyekej akin yononamiktijkej kualanij pampa xkimatij tlen imixnamik kitlaliaj ipan Internet. Niman sekimej okijtokej ika kema okitlalijkej itlaj ipan Internet niman xokijlikej imixnamik.

Redes sociales uelis melak kimijtlakos akin yononamiktijkej niman hasta uelis kichiuas maauilnemikan. Ika yejon, miyekej abogados akin kinpaleuiyaj akin kinekij nokauaskej kijtouaj ika redes sociales melak kimijtlakoua akin yononamiktijkej.

XNEMILI YEJUIN: ¿Xtikneki ika moixnamik makita ijkuak tikontlajkuilouilia yakaj? (PROVERBIOS 4:23).

TLEN KACHTOPA NONEKI TIKCHIUAS

Yakaj akin xkuajli tlakua uelis kualos. Noijki ijkon, tla akin yononamiktijkej xmás tiempo san sekan nemij uelis xika inyojlo nemiskej (Efesios 5:28, 29).

San sekan xtlapejpenikan noso xkijkuilokan tlen nenkuelitaskiaj nenkichiuaskej niman ijkon maka mamechijtlako tecnología.

• San sekan titlakuaskej maski san sejpa ipan se tonajli.

• Tikxeloskej tiempo niman ijkon xok tikinkuiskej toaparatos electrónicos.

• Tonpaxaloskej noso titlakuaskej iuan toixnamik.

• Tikinseuiskej toaparatos electrónicos ika tlayoua niman xok tikinkuiskej.

• Mojmostla tikxeloskej 15 minutos niman ijkon xok tikinkuiskej aparatos electrónicos.

• Tikijtoskej tlen hora xok tikuiskej Internet.