Akin kichiuaj tlen noneki, intech tlaneltokaj, kichiuaj intekiyo niman totoka tlamij.

Kokonej uelis peuaskej nomachtiskej kenon kichiuaskej tlen noneki ijkuak ok pitentsitsintin. Se libro tlen teititia kenon tikimiskaltis mokoneuan, kijtoua: “Ijkuak se konetsintli ikipiya se xiuitl iuan yeyi metstli, iuelis tepaleuis ika seki tekitl niman ijkuak ikipiya se xiuitl iuan tlajko, ipeua kineki tepaleuis. Miyekan, tajtin peuaj kinmachtiaj inkoneuan matepaleuikan ijkuak kipiyaj 5 noso 7 xiuitl. Kokonej akin kipiyaj yejuin xiuitl iuelij tekichiuaj kampa chantij”.

Aman nemij miyekej telpokamej niman ichpokamej akin kisaj inchan niman sakin oksejpa uajnokuepaj ijkuak kixnamikij tlen ouijtika. Kemantika, ijkon nochiua pampa xakaj okinmachti kenon kitekitiltiskej intomin, kenon tekichiuaskej noso kenon kichiuaskej tlen noneki.

Yejua ika, kuajli tla aman tikmachtia mokoneuj matekichiua, pampa kipaleuis ijkuak iueyi. Se libro tlen temachtia kenon tikinpaleuis mokoneuan, kijtoua: “Tejua xtiknekiskia nochi tikmakatos mokoneuj niman tikchias makajxilti 18 xiuitl niman hasta ijkuakon tijkauilis san iselti manotekipano”.

Xkintekitlali

TLEN BIBLIA TECHMACHTIA: “Tla tichikajkatekiti tikpiyas tlajtlamach on tlen tikneki” (Proverbios 14:23).

Konetsitsintin melak kinektokej kinpaleuiskej intajuan. Ika yejon, xkinkauili makichiuakan seki tekitl ipan nemochan.

Miyekej tajtin xkinekij kintekimakaskej inkoneuan pampa kinemiliaj ika ipan escuela kinkauiliaj miyek tarea niman xkinekij kinsiauitiskej.

San ika, kemantika kokonej akin tlapaleuiyaj inchan más kuajli kasikamatij tlen kinmachtiaj, pampa uelij kiseliaj tekitl tlen kinmakaj niman kichiuaj. Noijki, libro tlen kachtopa otikteneujkej, kijtoua: “Tla xtikinkauiliaj tokoneuan matepaleuikan ijkuak pitentsitsintin niman ijkuak yejuamej kinektokej, kinemiliskej ika xnoneki tepaleuiskej [...]. Noijki nomatiskej makintekichiuilikan”.

Ijkon ken okiteneuj yejuin libro, ijkuak kokonej tepaleuiyaj inchan nomatij tepaleuiskej niman xkichiaj oksekimej makintekichiuilikan. Niman noijki kimititia ika inchan tlasojtij, san ika, noijki kipiyaj tlen noneki kichiuaskej.

 Xpaleui mokoneuj makiyektlali tlen xkuajli okichiuj

TLEN BIBLIA TECHMACHTIA: “Xmokauili ma mitstlakanonotsankan niman ma mitsajuakan, para ijkon timochiuas tlamatki” (Proverbios 19:20).

Ijkuak mokoneuj nopopolos, kanaj ken ijkuak kijtlakos itlaj tlen xitlatki, xyejyeko maka tikiyanas tlen okichiuj. Mokoneuj uelis kiyektlalis tlen xkuajli okichiuj, niman kanaj kitlajtlanis makitlapopoluikan niman hasta kitekuepilis tlen okijtlako.

Tla mokoneuan kiseliaj tlen xkuajli okichiujkej niman ika onopopolojkej, uelis kinpaleuis...

• ... makasikamatikan ika xnoneki tlakajkayauaskej.

• ... maka makintlajtlakoltikan oksekimej.

• ... maka makitejtemokan kenon xkinokuitiskej.

• ... makitlajtlanikan makintlapopoluikan ijkuak nonekis.