TLEN NONEKI KICHIUASKEJ TAJTIN
7. Xkinmachtikan nemokoneuan makichiuakan tlen kuajli
¿TLENON KIJTOSNEKI?
Mokoneuj noijki ijkon noyekanas ken tejua timoyekana. ¿Xtitekajkayaua? Tla tejua xtitekajkayaua, kuakon mokoneuj noijki xkichiuas.
Se akin kuajli okimachtijkej desde konetl, yejua kuajli tekiti, xtenexikolita niman nochipa kinchiuilia tlen kuajli oksekimej.
TLEN BIBLIA KIJTOUA: “Xmachti mokoneu ken kuajli nouikas aman chika konetl, niman hasta ijkuak ueuentsintias nochipa ijki nouikas” (Proverbios 22:6).
¿TLEKA MELAK NONEKI?
Kuajli kitekitiltiskej tecnología. “Ipan teléfono noso tableta, tokoneuan uelis kitaskej tlen xkuajli noso tlen kimijtlakos, niman maski tonakastlan nentoskej yejuamej uelis kitstoskej tlen xkuajli”. Yejuin tlen okijto se nantli akin itoka Karyn.
TLEN BIBLIA KIJTOUA: “Pero on yejtik tlakuajli para on yejuan yonoskaltijkej, yejuan yokimachtijkej intlamachilis para kajsikamatij on tlen kuajli niman on tlen xkuajli” (Hebreos 5:14).
Xkinmachtikan matetlakaitakan. Kokonej noijki uelis kiteititiskej ika tetlakaitaj tla nochipa kuajli tetlajtlaniliaj niman tla kijtouaj “tlaxtlaui”. Ipan yejuin tonajli, miyekej xok tetlakaitaj pampa san kitstokej incelulares.
TLEN BIBLIA KIJTOUA: “Xkinchiuilikan tlen kuajli oksekimej ijkon ken nemejuamej nenkinekiskiaj yejuamej ma mechchiuilikan” (Lucas 6:31).
¿TLENON UELIS TIKCHIUAS?
Xkimijli mokoneuan tlen noneki kichiuaskej. Ixtlamatkej yokitakej ika tla tajtin kinmachtiaj inkoneuan maka maauilnemikan, yejuamej kanaj xauilnemiskej.
TLEN UELIS TIKCHIUAS: Ijkuak nenkitaskej noticias, uelis titlajtos iuan mokoneuj itech tlen ompa nesi. Matikonnemilikan ika nenkitstokej se noticia kampa nesi ika notlauelitalo niman nomiktilo, tejua ueliskiaj tikijtos: “¡Melak xkuajli tlen nochiujtok! ¿Tleka tiknemilia ika miyekej ijkon opeujkej kichiuaj?”.
“Tla tiknekij ika tokoneuan kuajli itlaj makitlapejpenikan, noneki kachtopa kimatiskej tlenon kuajli niman tlenon xkuajli” (Brandon).
Xkinmachti matepaleuikan. Hasta akin más kokonej noijki uelis kinpaleuiskej oksekimej tla yejuamej kuajli itlaj tetlajtlaniliaj niman kijtouaj “tlaxtlaui”. “Kokonej noneki kasikamatiskej ika xnochipa nochiuas tlen yejuamej kinekij, noneki kasikamatiskej ika kipiya kinpaleuiskej inchanejkauan niman oksekimej”, yejuin tlen kijtoua libro Parenting Without Borders (Padres sin fronteras).
TLEN UELIS TIKCHIUAS: Xkimijlikan nemokoneuan makichiuakan se tekitl ipan nemochan niman ijkon kasikamatiskej ika noneki kinpaleuiskej oksekimej.
“Tla nemokoneuan kichiuaj tlen nenkinnauatiaj, xkintekiyomakas ijkuak san inselti chantiskej pampa kimatstoskej kenon kichiuaskej se tekitl” (Tara).
