TLEN NONEKI KICHIUASKEJ TELPOKAMEJ NIMAN ICHPOKAMEJ
9. Kuajli xmoixmati
¿TLENON KIJTOSNEKI?
Kuajli timoixmatis xsan kijtosneki tikmatis kenon motoka noso kenon titlachia, noijki kijtosneki tikmatis tlenon tikchiua, tlenon tikneltoka niman tlen tlanauatiltin mitsyekanaj.
¿TLEKA MELAK NONEKI?
Ijkuak kuajli timoixmati, tikmati tlen tikneltoka niman tlen tikchiua, yejon mitspaleuis maka xchiua tlen oksekimej telpokamej noso ichpokamej mitschiualtiaj.
“Miyekej nion xkimatij tlenon kuelitaj nion tlenon kinekij, hasta oksekimej kintlapejpeniliaj tlen tlakentli kitlaliskej” (Adrian).
“Ninokojtilia nikchiuas tlen kuajli maski kemantika ouijtika. Kuajli nikmatstika akinomej melauak noamigos ipampa tlen yejuamej kichiuaj niman tlen nejua nikchiua ijkuak imiuan ninemi” (Courtney).
TLEN BIBLIA KIJTOUA: “Maka sa xmouikakan ken on tlaltikpaktlakamej nouikaj, yej xkauilikan Dios ma yejua kiyenkuili nemotlamachilis” (Romanos 12:2).
¿TLENON UELIS TIKCHIUAS?
Uelis timoixmatis aman niman tikmatis kenon noneki tiyes ika tlayekapan, tla tikita tlen kuajli tikchiua, tlen mitstekiyomaka niman tlen tikneltoka. Tla tikneki tikmatis yejon, uelis timotlajtoltis yejuin tlen amantsin tikteneuaskej.
Tlen ueli tikchiua: “¿Xnimantsin nikualani? ¿Nitekitki? ¿Nikuelita niktemakas tlen nikpiya? ¿Nimantsin najsi kampa nechnotsaj? ¿Tlenon ueli kuajli nikchiua?”.
TLEN UELIS TIKCHIUAS: Tla mitstekiyomaka tikitas tlenon kuajli tikchiua, uelis tikintlajtlanilis motajuan noso moamigos mamitsijlikan noso mamitspaleuikan.
TLEN BIBLIA KIJTOUA: “Cada se sano yejua ma notlatlata tla kuajli nouika. Tla kuajli nouika ipan inemilis, pakis niman xnoneki kinemilis ika yejua más ueyixtikaj xken okse tlakatl” (Gálatas 6:4).
Tlen mitstekiyomaka: “¿Noneki nikpatlas itlaj tlen nikchiua? ¿Onka itlaj tlen nechyoltilana manikchiua tlen xkuajli? ¿Kemanon noneki ninoteltis?”.
TLEN BIBLIA KIJTOUA: “Tla tikijtouaj xtitlajtlakolejkej, sano tejuamej titokajkayauaj” (1 Juan 1:8).
Tlen tikneltoka: “¿Katlejua tlanauatiltin nikuelita niktlakamatis niman tleka? ¿Nitlaneltoka itech toTajtsin? Niman, tla kema, ¿kenon nikmati ika yemelak nemi? ¿Tlenon xnikuelita makinchiuilikan oksekimej niman tleka? ¿Tlenon nikneki mapano ika tlayekapan?”.
TLEN BIBLIA KIJTOUA: “Ken tiktekitiltis motlanemilil mitstlajpiyas niman asikamatilistli mitsmakixtis” (Proverbios 2:11, TNM).
Puede que también le interese
NONANKILIAJ 10 TLEN NOTLAJTOLTIAJ TELPOKAMEJ NIMAN ICHPOKAMEJ
¿Akinon melauak nejua?
Tikmatis tlenon kuajli tikchiua niman tlenon mitstekiyomaka, niman tikmatis tlenon tikneki tikchiuas niman itech tlenon titlaneltoka mitspaleuis kuajli xtlapejpeni ijkuak mitschiualtiskej xchiua itlaj.
