TLEN NONEKI KICHIUASKEJ AKIN YONONAMIKTIJKEJ
3. Xmotlakaitakan
¿TLENON KIJTOSNEKI?
Tla akin yononamiktijkej notlakaitaj, más notlasojtlaskej maski xnotlajtolnamikij. Amoxtli Diez claves para transformar tu matrimonio kijtoua: “Akin notlakaitaj xsan intech tlanemiliaj, niman xsan kichiuaj tlen san se kineki. Yejuamej kuajli kinkakij imixnamik niman san sekan kitlapejpeniaj tlen kinpaleuis”.
TLEN BIBLIA KIJTOUA: “On yejuan tetlajsojtla [...] xkitejtemoua on tlen kuajli san para yejua” (1 Corintios 13:4, 5).
“Pampa niktlakaita nosiuauj, xnikchiua itlaj tlen makiyolkoko niman ijkon nikititia ika niktlasojkaita” (Micah).
¿TLEKA MELAK NONEKI?
Tla akin yononamiktijkej xnotlakaitaj, peuaskej nopijpinaujtiskej noso noyolkokoskej ijkuak tlajtoskej. Ixtlamatkej kijtouaj ika, ijkuak peua ijkon kichiuaj, kijtosneki ika sakin uelis noxeloskej.
“Tla peua tiktejteneua niman tikpijpinaujtia mosiuauj, kimachilis ika xtlaj ika tepaleuiya niman xok motech tlaneltokas” (Brian).
¿TLENON UELIS TIKCHIUAS?
XMOTLAJTOLTI YEJUIN
Xnemili kemanon otimonojnots iuan moixnamik. Niman sakin xnankili yejuin:
-
¿Kechpa otikpijpinaujti niman kechpa otikijli ika kuajli tlen kichiua?
-
¿Kenon otikititi ika tiktlakaita?
SAN SEKAN XMOTLAJTOLTIKAN YEJUIN
-
¿Kenon toititiaj ika totlakaitaj?
-
¿Kenon toititiaj ika xtotlakaitaj?
TLEN UELIS TIKCHIUAS
-
Xkijkuilokan yeyi tlemach tlen nenkinekiskiaj makichiua moixnamik. Sakin, xkitakan tlen onenkijkuilojkej niman xmokojtilikan ijkon nenkichiuaskej.
-
Xkijkuilo tlen kualtsin kichiua moixnamik niman xkijli ika melak tikpatiojkaita.
“Pampa niktlakaita noueuentsin, nikititia ika nochi tlen nikchiua ika nikpatiojkaita niman ika nikneki mayolpaki. Xnoneki itlaj ueyi nikchiuas niman ijkon nikititis ika niktlakaita” (Megan).
Xsan noneki tikijtos ika titetlakaita, noneki makimachili moixnamik ika yemelak tiktlakaita.
TLEN BIBLIA KIJTOUA: “Xmouikakan ikan teiknelilistli, yolkuajlilistli, yolyemanilistli, kuajli tenotsalistli, niman ikan ijyouilistli” (Colosenses 3:12).
