¿Tleka noneki tikmatiskej yejuin?
¿Tleka noneki tikmatiskej tla nemi yakaj akin otexchijchiuj? Pampa tla tikmati ika yemelak nemi toTajtsin, kanaj noijki tiknekis tikmatis tla Biblia ualeua itech toTajtsin. Niman tla tikneltoka tlen Biblia kijtoua, tikitas ika melak mitspaleuis. Matikitakan kenijki uelis mitspaleuis.
Más tiyolpakis
BIBLIA KIJTOUA: “Dios nochipa kintitiaya ika nemi ika on tlen kuajli kichiuaya impampa. Yejua kichiua para ma kiaui niman para kuajli ma tlatlaki. Yejua tej, techmaka on tlen tikuaj para kuajli tinemij niman tipakij ikan nochi toyojlo” (Hechos 14:17).
¿TLENON KIJTOSNEKI? ToTajtsin okichijchiuj nochi tlen onka. Más tikuelitas nochi tlen toTajtsin yokichijchiuj ijkuak tikitas ipan Biblia kenijki yejua melak mitstlasojtla.
Tikitas tlen mitspaleuis
BIBLIA KIJTOUA: “No ijki tikajsikamatis on melajkanemilistli, nochi tlen kuajli, niman tikmatis kenijki xok titechikoitas” (Proverbios 2:9).
¿TLENON KIJTOSNEKI? Pampa toTajtsin omitschijchiuj, yejua kimati kenon uelis más tiyolpakis. Tla timomachtia tlen Biblia kijtoua, tikitas miyek tlen uelis mitspaleuis.
Uelis tiknankilis nochi tlen timotlajtoltia
BIBLIA KIJTOUA: “Tikmatis kenijki tikixmatis Dios” (Proverbios 2:5).
¿TLENON KIJTOSNEKI? Tla tikmati ika nemi yakaj akin otexchijchiuj, mitspaleuis tikasikamatis tleka otinemikoj, tleka titlajyouiyaj niman tlenon topan nochiua ijkuak timikij. Biblia mitspaleuis xkasikamati nochi yejon.
Xtimomojtis ipampa tlen tikixnamikis ika tlayekapan
BIBLIA KIJTOUA: “Nejua nikpiya planes para nemechchiuilis tlen kuajli, xpara nemechchiuilis tlen xkuajli, niman ijkon más sankin nochi kuajli kisas niman nenkipiyaskej on sanoyej kuajli tlamachalistli. Nejua nemoTEKO ijki nikijtoua” (Jeremías 29:11).
¿TLENON KIJTOSNEKI? ToTajtsin kijtoua ika kichiuas maka matitlajyouikan niman maka matimikikan. Tla tikneltoka tlen toTajtsin kijtoua kichiuas, uelis tikxikos tlen mojmostla tikixnamiki.
