“Sofía * ouejkauj ika melak kualouaya, niman ijkuak itikpiayaj 39 xiuitl ika otonamiktijkaj, yejua omik. Onikyejyeko maka melak itech yejon nitlanemilis, niman noamigos melak onechpaleuijkej. San ika, opanok kanaj se xiuitl ika melak ninoyolkokouaya. Kemantika kuajli ninomachiliaya niman kemantika melak ninajmanaya. Hasta aman, maski yopanok kanaj yeyi xiuitl, kemantika peua ninoyolkokoua niman xtlaj ueli nechyolseuiya” (Kostas).

¿Yomik yakaj akin melak tiktlasojtlaya? Tla ijkon, yotimomachili ijkon ken Kostas. Sekimej kijtouaj ika xonka itlaj tlen uelis más mitsyolkokos ken ijkuak miki moueuentsin noso mosiuatsin, se mochanejkauj noso se moamigo. Revista The American Journal of Psychiatry kijtoua ika “melak timoyolkokojtos ijkuak yakaj mikis niman ouijtika para tikilkauas”. Ijkuak yakaj ijkon ipan nochiua kanaj uelis notlajtoltis: “¿Nochipa ijkon ninomachilis? ¿Uelis oksejpa niyolpakis? ¿Tlenon uelis nechyolseuis?”.

Yejuin revista mitspaleuis xnankili yejon. Ipan okse tlamachtijli tikitas tlen kanaj tejua tikixnamiktika tla omik yakaj akin tiktlasojtla. Niman ipan okseki tlamachtiltin tikitas tlen uelis mitspaleuis maka melak xmoyolkoko.

Tiknekij ika yejuin revista makinpaleui niman makinyolseui nochimej akin noyolkokojtokej pampa omik yakaj akin kitlasojtlayaj.