Tlen kichiuas maka sa manochikoitalo
Melak miyekej yokichiujkej ijkon ken yotikontakej ipan Biblia niman yokinpaleui maka sa matechikoitakan. San ika, tikmatstokej ika san tejuamej xuelis tikchiuaskej ika maka sa manochikoitalo. Kuakon, ¿ajsis tonajli ijkuak xok yakaj techikoitas?
Se gobierno akin kuajli tlayekanas
Tlen yokichiujkej gobiernos kiteititia ika xueliskej kichiuaskej ika maka sa manochikoitakan. ¿Yejon kijtosneki ika nochipa nochikoitalos?
Tla se gobierno kineki ika maka yakaj matechikoita, nonekis kichiuas yejuin:
1. Ika tlaltikpakchanejkej makinekikan kipatlaskej tlen kimachiliaj niman tlen kinemiliaj itech oksekimej.
2. Ika matikilkauakan tlen xkuajli otexchiuilijkej pampa yejon kichiua xkuajli matiteitakan.
3. Ika matechyekanakan akin xtechikoitaj.
4. Ika tinochimej san sekan matinemikan.
Biblia techijlia ika toTajtsin kipiya se gobierno akin kichiuas nochi yejon. Yejuin gobierno itoka “iTekiuajyo toTajtsin” (Lucas 4:43, TNM).
Xkita tlen kichiuas yejuin gobierno.
1. Melak kuajli techmachtis
Nochimej kichiuaskej tlen melajki (ISAÍAS 26:9).
“Pampa nochimej nouikaskej ipan yolmelajkilistli, onyas yolseuilistli niman inyolika nemiskej para nochipa” (ISAÍAS 32:17).
¿Tlenon kijtosneki? ITekiuajyo toTajtsin techmachtis tlen melajki. Ijkuak tikmatij tlen kuajli niman tlen xkuajli, tlen melajki niman tlen xmelajki, nopatla tlen tiknemiliaj itech oksekimej. Tinochimej tikmatstoskej ika noneki totlasojtlaskej.
2. Melak techyolseuis
ToTajtsin “kimpopouilis nochi iminixayo, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok” (APOCALIPSIS 21:4).
¿Tlenon kijtosneki? ITekiuajyo toTajtsin kichiuas maka sa matoyolkokokan ipampa tlen xkuajli otexchiuilijkej. Kuakon, akin yokinyolkokojkej xok tetlauelitaskej pampa kilkauaskej nochi tlen okinchiuilijkej.
3. Techmakas yakaj akin kuajli techyekanas
“Xtetlajtlakolmakas ikan tlaixkajkayaualistli, nion tetlajtlakolmakas san ika on tlen sekimej kijtouaj. Yejua xkitekauilis ma kinchiuilikan tlen xkuajli on yejuan xkojtikej, niman kinmanauis on mayankej yejuan chantij ipan ipaís” (ISAÍAS 11:3, 4).
¿Tlenon kijtosneki? Jesucristo, akin Tekiuaj itech iTekiuajyo toTajtsin, techyekanas ika melajkayotl niman xtechikoitas. Jesús xsan kitlasojtla se país, niman yejua uelis kichiuas ika nochimej makintlakamatikan itlanauatiluan.
4. Kichiuas san sekan matinemikan
ITekiuajyo toTajtsin kichiuas ika matikpiyakan san se tlanemilijli, san se tetlajsojtlalistli, san se toyojlo niman san se tlamachilistli (FILIPENSES 2:2).
¿Tlenon kijtosneki? Ika xsan nesis ika nochi kalpamej san sekan nemij. Yejuamej yemelak san sekan nemiskej pampa yemelak notlasojtlaskej.
