Tla xtiknekij touikaskej imiuan akin xkichiuaj ken tejuamej, uelis más titechikoitaskej. Niman, tla akin imiuan touikaj noijki ijkon ken tejuamej, uelis tiknemiliskej ika tlen tiknemiliaj, tikmachiliaj niman tikchiuaj san yejon tlen kuajli.

“Xtlapokan nemoyojlo” (2 CORINTIOS 6:13, TNM).

¿Tlenon kijtosneki? Ijkuak kijtoua toyojlo kiteneujtika tlen tikmachiliaj. Tla san touikaj imiuan akin kichiuaj ken tejuamej, kentla xtiktlapojtoskiaj toyojlo. Tla xtiknekij ijkon topan manochiua, noneki tiknektoskej touikaskej imiuan akin xijkomej ken tejuamej.

Ijkuak kuajli tikixmatij yakaj, tikasikamatij tleka xijkon kichiua ken tejuamej. Niman ijkuak peua iuan touikaj, tikilkauaj ika yejua tlamantik. Noijki peua tiktlasojtlaj, niman ijkuak yolpaki tejuamej noijki tiyolpakij, niman ijkuak najmana tejuamej noijki tajmanaj.

Matitlajtokan itech Nazaré, yejua kinchikoitaya akin xchanejkej. Yejua techijlia: “Imiuan nitekitiya niman imiuan nitlajtlajtouaya. Ijkuak onikimixmat, onikitak ika yejuamej xijkon katkaj ken yonechijlikaj. Ijkuak timouika imiuan akin oksekan ualeuaj, peua tikintlasojtla niman xok tikinchikoita”.

Xkita kenon uelis titlajtlatos imiuan akin oksekan ualeuaj noso okse tlajtojli tlajtouaj. Uelis tikchiuas yejuin:

• Xkimijli mamitsijlikan itlaj intech yejuamej.

• Xkinnotsa matlakuatij mouan.

• Xkinkaki niman xkita tlenon melak kuelitaj.

Tla tikasikamati tlen inpan yonochiuj, xok tiknemilis tlen xkuajli intech niman tikimasikamatis.