Ikipiya diez xiuitl ika tikintekitiltiaj carritos ijkuak titenojnotsaj. Ipan nochi tlaltikpaktli kuajli kimixmatij, itech nonisiuiyaj niman xouijtika tikimitkitinemis. Kanaj noijki titlanemilia ken Asenata, se tokniuj akin chanti Polonia, yejua kijtoua: “Carritos melak kuajli tlachijchiujtin niman melak kualtsitsintin, noijki nimantsin uelis tikintlalis niman san kanon uelis tikimitkis”.

 ¿Kanaj yotimotlajtoltijka kenon niman akinon kinchijchiua yejuin carritos?

 Ipan 2001, Grupo akin Tlayekana, okinkauili tokniuan tlakamej niman siuamej akin chantij Francia sejneka matenojnotsakan kampa tojlan, noijki ika carritos. Okiyejyekojkej ika miyek carritos niman ijkon kitaskej katlejua más kuajli yeskia para ijkon notekitiltiskia ijkuak notenojnotsaskia. Sakin, isucursal Francia okitlapejpeni se carrito tlen okitekitiltijkej miyek xiuitl.

 Tokniuan itech Francia melak okuelitakej tenojnotsaskej kampa tojlan ika carritos. Ika yejon ipan 2011, Grupo akin Tlayekana okijto ika ueliskia ijkon notenojnotsas ne Nueva York (Estados Unidos), ika carritos niman mesas tlen kipiyaskiaj toamatlajkuiloluan. Precursores akin otenojnotskej ika carritos, okijtokej ika xouijtika tikitkis niman ika melak kuajli ika titenojnotsas. San ika, noijki okijtokej itlaj tlen noijki ueliskia tepaleuis para más kuajli makinyektlalikan carritos. Kachtopa carritos melak yetikej katkaj pampa okinchijchiujkej de adera, ika yejon, ouijtika katkaj tikimitkitinemis. Kuakon tokniuan okinyektlalijkej, aman okinchijchiujkej para maka mayetikej, san ika, noijki para maka makitlajkali ajakatl. Noijki okintlalilijkej llantas tlen ueliskiaj tlaxikoskiaj niman ijkon kuajli tikimitkitinemis carritos. Noijki kipiayaj se caja kampa ueliskiaj kimejyeuaskej amatlajkuiloltin.

 Melak kuajli ken onotenojnots ika carritos. Ika yejon, ipan xiuitl 2012 Grupo akin Tlayekana okijto ika ipan nochi tlaltikpaktli ueliskia notekitiltis carritos ipan tenojnotsalistli. Se fábrica kinchijchiuaskia carritos ika materiales tlen tlaxikoskia niman tlen xyetikej.

 Desde ijkuakon, carritos kinyenkuilijtiuej. Ken ipan 2015, okintlalilijkej se plástico tlen kitlapachoua carrito niman ijkon xpapatsiuis. Dina, akin chanti Georgia, kipatiojkaita yejuin. Yejua kijtoua: “Melak kuajli ika carrito kipiya yejon plástico pampa kintlajpiya toamatlajkuiloluan”. Ipan 2017, okinchijchiujkej seki carteles magnéticos ika seki tlajtoltin, yejuin carteles nopepechouayaj ika imanes. Tomasz, se tokniuj akin chanti Polonia, kijtoua: “Carteles tlen achto tikinpiayaj ouijtika katka tikinpatlaskej, san ika, yejuin carteles magnéticos melak kualtsin niman xouijtika tikinpatlas”. Ipan 2019, yejuin carritos onoyenkuilijkej niman ijkon ueliskiaj más tlaxikoskiaj.

 Carritos tlen kipiyaj toamatlajkuiloluan kinchijchiua se fábrica, niman sakin notitlani ipan nochi tlaltikpaktli. Para nochijchiuas se carrito notlaxtlaua 43 dólares niman noijki notlaxtlaua para notitlani. Hasta aman yonotitlankej ipantsin 420 mil carritos ipan tlanechikoltin tlen onkatij ipan nochi tlaltikpaktli, niman yonotlaxtlauj ipantsin 16 millones de dólares para nochijchiuaj carritos.

 Pampa tiknekij más kuajli tikintekitiltiskej donaciones tlen tokniuan kitemakaj, tikintlajtlanij miyekej carritos, ijkon xmás patioj kisa. Noijki, tlanechikoltin uelis san kinyektlaliskej incarritos niman xkitlajtlaniskej okse yenkuik.

 Nochimej akin tenojnotsaj ipan nochi tlaltikpaktli melak kuelitaj tenojnotsaskej ika carritos tlen kipiyaj toamatlajkuiloluan. Martina, akin chanti Ghana, kijtoua: “Ijkuak titenojnotsaj ipan ojtin tejuamej noneki tonisiuiskej itech tlaltikpakchanejkej, san ika, nikuelita ika ijkuak titenojnotsaj ika carritos yejuamej totech nonisiuiyaj niman nochimej akin ompa panouaj uelis tikimijliskej tlen melauak”.

 Ipan África, se tlakatl ononisiui itech se carrito kampa kipiyaj amatlajkuiloltin ika itlajtol niman okimitkik seki amatlajkuiloltin. Onokuep se semana sakin niman okijto: “Onikpouj yejuin amatlajkuiloltin niman onikitak ika melak ueyi kijtosneki, nikneki ika nochanejkauan noijki makimatikan”. Yejuamej chantiyaj kanaj 500 kilómetros (311 millas) ika uejka. Ome metstli sakin, yejon tlakatl onokuep niman okijto: “Kampa nichanti nochimej okipoujkej amatlajkuiloltin niman melak okuelitakej. Niman yejuamej yokijtojkej ika kinekij nochiuaskej iteixpantijkauan Jehová, san ika, miyek tlen notlajtoltiaj. Yejuamej kasikamatij ika noneki noapolaktiskej niman noneki kalakiskej ipan atl, san ika, kampa chantij xtlaj onka atentli. ¿Noneki uajlaskej nikan para noapolaktiskej?”. Sekimej tokniuan okipaleuijkej yejuin tlakatl iuan manonojnotsa se tokniuj akin matlajto itlajtol. Desde ijkuakon yejuamej ok nonojnotsaj.

 Melak techyolpaktia ika carritos tlen kipiyaj toamatlajkuiloluan notekitiltia “ipan in tlaltikpaktli para nochimej países makixmatikan on tlen melauak” (Mateo 24:14). ¿Kenon notlaxtlaua yejuin? Notlaxtlaua ika tomintsin tlen miyekej kitemakaj ika nochi inyojlo, miyek itech yejuin tomintsin notemaka ipan donate.pr418.com. ¡Timechtlasojkamachiliaj ipampa tlen nenkitemakaj!