Grupo akin Tlayekana ipan nochi tlanechikoltin kita ika melak noneki manotekitilti tomintsin tlen tiktemakaj ipan construcciones tlen techpaleuis ok matitenojnotstokan itech iTekiuajyo toTajtsin. Matikonnemilikan, ipan xiuitl 2023 isucursales iteixpantijkauan Jehová okitekitiltijkej kanaj 500 millones de dólares a niman ijkon kinkouaskej, kinchijchiuaskej niman kinyektlaliskej Kaltin kampa tosentlaliaj niman Kaltin kampa tikinpiyaj toueyitlanechikoluan itech nochi tlaltikpaktli. Niman xtikpoujtokej tomintsin tlen okitekitiltijkej tlanechikoltin niman ijkon kinyektlaliskej Kaltin kampa nosentlaliaj.

 Niman noijki, tomintsin tlen tiktemakaj notekitiltia niman ijkon nochijchiuaskej niman notlajpiyaskej sucursales, yejuin melak noneki pampa ompa noyekana tenojnotsalistli niman kitaj kenon más titenojnotsaskej. Melauak ika yonopatlak ken nochiuayaj miyek tekitl para xmás nopopolos tomintsin, niman ijkon notekitiltis yejuin tomintsin para nochijchiuaskej niman noyenkuiliskej Kaltin kampa tosentlaliaj niman Kaltin kampa tikinpiyaj toueyitlanechikoluan. San ika, ok noneki miyek tomintsin niman ijkon uelis noyektlaliskej, noyenkuiliskej niman kimejkuaniskej sucursales. ¿Tleka melak noneki manochiua yejuin? niman ¿Kenon tlen nochiujtika ipan sucursales kipaleuiya más tenojnotsalistli? Matikitakan.

 Miyek sucursales ikipiyaj kanaj 30 noso 40 xiuitl ika onochijchiujkej. Nicholas, itech Grupo Akin kiyekana Diseño niman Construcción ipan nochi tlaltikpaktli, okijto: “Maski melak tikintlajpiyaj seki edificios, ika yolik ijtlakaujtiuej. Ijkuak tikinyenkuiliaj edificios, kentla oksejpa tikinyolitiaj niman ijkon oksejpa uelis tikintekitiltiskej”.

 Pampa miyek tlen nopatlatiuj, noijki noneki tikpatlaskej seki tlemach tlen onka betel para ijkon uelis tikintekitiltiskej. Desde ijkuak onochijchiujkej yejuin sucursales, akin tenojnotsaj más yomiyekiyakej. Ika yejon, más nonekij akinomej ompa tekitiskej. Yejuin kijtosneki ika maski ijkuakon ipan sucursales kuajli onakiyaj, aman xok onakij pampa miyekixtiuej.

 Noneki más tiktlajpiyaskej tonemilis. Itinemij itlamiyan tonaltin ika yejon ipan tlaltikpaktli panoua miyek tlen tlaixpoloua kuakon, noneki tiktlajpiyaskej tonemilis (Lucas 21:11). Tla ijkuak tikyenkuiliaj se sucursal tiktekitiltiaj on tlen más yenkuik kisa, tikchiuaskej ika más matlaxikokan niman maka nimantsin maijtlakauikan. Niman xsan yejon, tla itlaj xkuajli panoua, yejuin sucursales uelis notekitiltiskej para kinpaleuiskej tokniuan niman maka manotelti yejuin tekitl.

 Ipan xiuitl 2023, Grupo akin Tlayekana ipan nochi tlanechikoltin okitekauili ika kanaj ipan 43 sucursales manoyenkuilikan noso manochijchiuakan seki tlemach. Yejuin kijtosneki ika kanaj ipantsin tlajkotipan sucursales tlen onka itech nochi tlaltikpaktli, itlaj onoyenkuili. Matikitakan seki tekitl tlen nochiujtika niman tleka ueyi kijtosneki.

 Angola. Matt, se tokniuj itech Grupo Akin Kiyekana Sucursal ne Angola okijto: “Melak kuajli tikitstokej ika nochiujtika teotlajtojli tlen nesi ipan Ageo 2:7. ¡San ipan 10 xiuitl, akin tenojnotsaj omiyekiyakej kanaj 60 por ciento! Para ueliskej tikintlajpiyaskej tokniuan, nonekiya más miyekej yeskej betelitas. San ika, pampa xtlaueyi katka kampa tinemiyaj, xueliyaj tikinnotsayaj oksekimej. Ipampa yejon, miyekej betelitas ononek más chikauak tekitiskej”.

 Okintlajtlanilijkej sekimej tokniuan makitakan tla ueliskia noueyilis sucursal. Kachtopa, okitakej ika más kuajli yeskia tla kiyenkuiliskiaj sucursal tlen ionkatka. San ika, sakin okitakej ika tla ijkon kichiuaskiaj, xkuajli kitekitiltiskiaj tomintsin. Okitakej ika más kuajli yeskia tla kikouayaj niman kiyektlaliayaj se edificio tlen nisiuj onkatka. Matt kijtoua: “Ijkuak yejuin tokniuan okijlijkej Comité de Sucursal ika kinekiyaj kikouaskiaj niman kiyektlaliskiaj se edificio, otiknemilijkej ika yejuin xmás techpaleuiskia pampa xtejuamej otikchijchiujkaj, san ika, aman tikitaj ika Jehová okiteochiuj tlen otitlapejpenijkej pampa yejuin edificio yejon tlen tiknekiyaj”.

 Kanaj ika tlayekapan nonekis noueyilis isucursal Angola, san ika, ika yejuin yenkuik edificio niman nochi tlen ompa onochiuj iuelis kinpaleuiskej niman kinmakaskej nochi tlen kinpoloua tokniuan de yejon país, kampa tekitl melak ueyixtiuj.

 Japón. Edificios itech yejon sucursal ikipiyaj kanaj 40 xiuitl ika okinchijchiujkej niman xkeman kuajli nochi kinyektlaliayaj. Nochiua nochi tlen noneki para ijkon kuajli notlajpiyaskej. San ika, maski yejuin edificios melak yotlaxikojkej niman melak yotepaleuijkej, iijtlakaujtokej. Kuakon, inochiujtika nochi tlen noneki para ikiyektlaliskej yejuin sucursal.

 Ipan yejuin xiujtin, innemilis akin chantij ipan sucursales melak yonopatlak. Achto xiuitl 2015, Betel kinchijchiuiliaya tlakuajli nochimej tokniuan akin ompa nemiyaj, ika yejon miyek habitaciones itech yejuin sucursal kipiayaj san se “cocinita”. Aman, Betelitas sa no yejuamej noneki kichijchiuaskej tlen kikuaskej ipan inhabitaciones. Ika yejon, ijkuak okiyenkuilijkej sucursal, noijki okinueyilijkej cocinas. Kumiko, se tokniuj itech isucursal Japón, kijtoua: “Yejuin yenkuik cocina onechpaleui más kuajli maninomati betel niman nechpaleuiya maninomachili kentla nochan ninemiskia”.

 Tekitl tlen nochiua ipan isucursal Japón melak kipaleuiya tenojnotsalistli itech nochi tlaltikpaktli (Mateo 28:19, 20). Ijkin tikijtouaj pampa san ome sucursales ipan nochi tlaltikpaktli kinchijchiuaj Biblias niman isucursal Japón, se de yejuamej. Ika yejon, ijkuak onoyenkuili sucursal okitlalijkej se sistema tlen kajsi niman kejyeua tlalpoktli niman amakuechtli. Okitlaxtlaujkej kanaj se millón de dólares para kikouaskej niman kitlaliskej yejuin máquina. San ika, yejuin kichiua ika akin tekitij ipan imprenta más kuajli manomachilikan niman noijki kichiua ika ok manochijchiujtokan niman manotitlani tlakuajli espiritual.

 Ika yejuin tiknekiyaj ika maka manokajkaua manochijchiuakan Biblias maski tlayektlalijtoyaj. Trey, se tokniuj itech Grupo akin kiyekana Sucursal ipan Japón, kijtoua: “Ijkuak kiyektlalijtoyaj sucursal nonekiya más tikinchijchiuaskej Biblias, pampa ikalpan toTajtsin kintlajtolkueptoya ika más miyek tlajtoltin. Seki departamentos de Betel niman se empresa, san sekan otekitkej niman ijkon kitlaliskiaj yejuin yenkuik máquina niman noijki para xnoteltiskia ika nochijchiuaj amatlajkuiloltin. Maski ouijtika katka, cada metstli de marzo a agosto de 2023 onochijchiujkej kanaj 220,000 Biblias, onochiuj nochi yejuin maski ipan imprenta tlayektlalijtoyaj niman xok sanoyej otikpopolojkej tomintsin”.

 Ika yejuin proyecto noijki otikitakej kenon más tikmaluiskiaj electricidad. Tikintlaliskej yenkuikej paneles solares tlen kichiuaskej maka matikpopolokan kanaj 120,000 dólares ipan se xiuitl. Noijki tikintlaliskej ventanas tlen kipiyaj yeyi capas de cristal, yejon kichiuas maka sanoyej matiktekitiltikan electricidad niman xtikpopoloskej kanaj 10,000 dólares ipan se xiuitl. Maski aman nonekis más tikpopoloskej tomintsin ika nochi yejuin, ika tlayekapan techpaleuis maka matikpopolokan kanaj 3 millones y medio de dólares. Noijki yejon kichiua maka sanoyej makijtlako tlaltikpaktli.

 Tlen nochiujtika Angola niman Japón san seki itech nochi tlen noneki nochiuas ipan miyekej sucursales niman ijkon kinmakatoskej tokniuan tlakuajli espiritual. San ika tekitl ok xtlami. Aaron itech Grupo akin kiyekana Diseño niman Construcción ipan nochi tlaltikpaktli, kijtoua: “Melak miyek tlen yonochiuj. San ika, ok poliui miyek tekitl”. ¿Niman kenon nochiuas yejuin? Yejua oksejpa kijtoua: “Tla tokniuan xkitemakaskiaj intomintsin, xueliskia nochiuas nochi yejuin. Tikintlasojkamachiliaj noijki nochimej tokniuan akin uajtlapaleuiyaj niman akin kichiujtokej tlen noneki niman ijkon más tlapaleuiskej ika tlayekapan. Kuajli nesi ika Jehová kiteochiujtika yejuin tekitl pampa tokniuan tlapaleuiyaj niman kitemakaj intomintsin” (Salmo 110:3).

 Nochi yejuin tekitl ueli nochiua pampa nochimej tokniuan ika nochi inyojlo kitemakaj intomintsin, miyekej kitemakaj ipan donate.pr418.com. Melak timechtlasojkamachiliaj pampa nochipa nenkuelitaj nenkitemakaskej tlen nenkipiyaj.