Nochi xiujtin melak miyekej noapolaktiaj. Kuakon, más nonekij kaltin kampa noueyichiuas Jehová. Ika yejon, departamentos locales de Diseño niman Construcción itech nochi tlaltikpaktli okijtokej kichijchiuaskej noso kiyektlaliskej ipantsin 2,700 kaltin kampa tosentlaliaj ipan xiuitl 2020 hasta 2021. a

 Pandemia COVID-19 okitelti tekitl tlen yononemilijka nochiuas. Grupo akin kiyekana tlen nochijchiua ipan nochi tlaltikpaktli okitelti miyek itech yejuin tekitl pampa kineki kintlajpiyas tokniuan niman kintlakamatis tekiuajkej. Maski ijkon, ipan 2020, ijkuak xipeuaya pandemia, ouel onochijchiujkej niman onoyektlalijkej ipantsin 1,700 Kaltin kampa tosentlaliaj. Noijki, otlankej ipantsin 100 proyectos ipan sucursales. Matikitakan ome itech yejuin tekitl niman kenon yonopaleuijkej tokniuan.

 Sucursal de Camerún. Sucursal tlen onkatka Duala, melak pitentsin katka niman nonekiya melak manoyektlali. Grupo akin kiyekana tlen Nochijchiua okinemili kiyektlalis sucursal, san ika, melak patioj kisaskia. Kuakon, okinemilijkej oksekan kichijchiuaskej se yenkuik sucursal noso kikouaskej se edificio niman san kiyektlaliskej. San ika, nion se xouel onochiuj.

 Ijkuakon, tokniuan okimatkej ika tekiuajkej kinemilijtoyaj kichijchiuaskej se carretera ipan norte de Duala, inakastlan se Kajli kampa tikpiyaj Toueyitlanechikol. Yejon carretera tepaleuiskia xouijtika tajsis sucursal niman kipiyaskia nochi servicios públicos. Yejon tlen kinekiya sucursal. Kuakon, Grupo akin Tlayekana otekauili manochijchiua se yenkuik sucursal ipan yejon tlajli, kampa onka Kajli kampa tikpiyaj Toueyitlanechikol.

 Tokniuan okitlakeujkej se empresa de construcción niman ijkon makichiua yejuin tekitl, yejon okichiuj maka ueyi manopopolo tomin niman xouejkaujkej ipan yejuin tekitl. Yejon proyecto xpatioj okis ijkon ken yokinemilijkaj: xonopopolo ipantsin dos millones de dólares. Betelitas oyajkej ipan yenkuik sucursal ijkuak xipeuaya pandemia COVID-19.

 Aman betelitas akin chantij Camerún más kualtsin kampa nemij niman kampa tekitij, niman kitaj sucursal ken se itetlayokolil Jehová. Se tokniuj iuan isiuauj kijtouaj: “Aman más tiknekij titekitiskej niman tikteititiskej ika tiktlasojkamatij tlen yotechtlayokolijkej”.

 Kajli kampa Tlajtolkuepaj ika tlajtojli tojolabal (México). Ipan miyek xiuitl, akin tlajtolkuepaj ika tlajtojli tojolabal tekitiyaj ipan sucursal de Centroamérica, nisiuj Ciudad de México. San ika, tlajtojli tojolabal tlajtouaj ipan municipios de Altamirano niman Las Margaritas, kanaj 1,000 kilómetros (620 millas) itech sucursal. Ika yejon, akin tlajtolkuepaj xkikakiyaj intlajtol. Niman sucursal ouijtika kitaya kintejtemos tokniuan akin nisiuj chantij matlapaleuikan matlajtolkuepakan niman makichiuakan grabaciones.

 Kuakon, Grupo akin kiyekana tlen Noijkuiloua okijto ika tokniuan akin tlajtolkuepaj mayakan kampa chantij akin tlajtouaj tojolabal. Ika yejon, sucursal okikouj niman okiyektlali se edificio. Yejuin xpatioj okis xijkon ken kichijchiuaskiaj noso kintlaneuiskiaj seki oficinas.

 Se tokniuj akin tlajtolkuepa techijlia kenon nomachilia: “Ipan majtlaktli xiuitl tlen onitekit sucursal, xkeman oniknexti se familia akin matlajto notlajtol. Aman oficina onka kampa tlajtouaj tojolabal. Mojmostla ueli nitlajtoua notlajtol imiuan oksekimej. Yejuin yokichiuj maka manikilkaua notlajtol niman yonechpaleui más kuajli manitlajtolkuepa”.

 Ipan xiuitl 2021, tla iuelij titekitij, titekitiskej ipan 75 oficinas de traducción niman kampa nomachtiaj Biblia. Noijki titekitiskej ipan 8 proyectos itech sucursales, se itech yejon ipan Rámapo (Nueva York) niman nejkuaniskej sucursales de Argentina niman Italia. Noijki, nonekij 1,000 yenkuikej Kaltin kampa Tosentlaliaj. Niman, onka ipantsin 6,000 Kaltin kampa Tosentlaliaj tlen xkuajli onkatij niman noneki nopatlaskej, niman okseki 4,000 Kaltin kampa Tosentlaliaj noneki noyektlaliskej.

 ¿Kenon notlaxtlaua nochi yejuin tekitl? Tokniuj Lázaro González, akin tekiti ipan Comité de Sucursal de Centroamérica, technankilia yejuin. Itech Kajli kampa Tlajtolkuepaj ika tlajtojli tojolabal, yejua kijtoua: “Tokniuan akin chantij ipan territorio tlen kiyekana sucursal xmás kipiyaj tomintsin. Tla xtechpaleuiskiaj tokniuan ipan nochi tlaltikpaktli, xueliskia nochijchiuaskiaj kaltin kampa tlajtolkuepaj, kampa matekitikan tokniuan akin tlajtouaj okse tlajtojli. Ipampa nemodonaciones ueli tikintitlanij tlajtolkuepkej kampa tlajtouaj intlajtol. Tikintlasojkamachiliaj nochimej tokniuan tlen ika inyojlo kitemakaj intomintsin. ¿Otikitak? Nochi yejuin construcciones nochiuaj ipampa donaciones tlen notemakaj. Miyek tlen notemaka nochiua ipan donate.pr418.com.