“Kanaj yeuejkaui xtiknemiliayaj ika ueliskia tomachtiskiaj ika toteléfono noso totableta”. ¿Noijki ijkon tiknemilia? Yejuin tlen okijto tokniuj Geoffrey Jackson ipan Grupo tlen Tlayekana kijtoua tlen panotika #6 ipan 2020, noijki okijto: “San ika, kanaj aman totlajtoltiaj tlenon ueliskia tikchiuaskiaj tla xtikpiyaskiaj aplicación JW Library. Ika yolik, Jehová yotechuajmajmachtijtia kenon tijkuiskej yejuin aplicación”.

 ¿Kenon Jehová yotechuajmajmachtijtia? ¿Tlenon ononek niman ijkon kichijchiuaskej aplicación JW Library? ¿Niman tlenon noneki nochiuas, ijkon mojmostla kiyenkuilijtiaskej?

 Ipan mayo de 2013, Grupo akin Tlayekana ipan nochi tlanechikoltin okintlajtlanili akin tekitij ipan Programación de MEPS, ipan oficina kampa noyekanaj nochi sucursales, makichijchiuakan se aplicación tlen makipiya Traducción del Nuevo Mundo. Paul Willies, akin tlapaleuiya ipan grupo tlen tekiti ipan MEPS, okijto: “Xkeman tikchijchiuayaj se aplicación tlen nochimej ueliskiaj kitemoltiskiaj. Para tikchijchiuaskej yejuin aplicación, ononek tikteltiskej seki tekitl tlen tikchiujtoyaj, tikchijchiuaskej se equipo niman titekitiskej iuan oksekimej tokniuan, ijkon ueliskia tikitaskiaj tlenon kipiyas niman kenon nochijchiuas. Miyekpa otikchiuilijkej teoyotl Jehová niman kuajli otikitakej ika yejua otechpaleui, pampa makuijli metstli sakin yejuin aplicación okis ipan reunión anual”.

 Itlaj okse otikixnamijkej, nonekiya tikuepaskiaj JW Library ipan se biblioteca tlen makipiya nochi toamatlajkuiloluan niman ika miyek tlajtoltin. Ipan enero de 2015, yejuin aplicación kipiaya miyekej amatlajkuiloltin ika inglés, niman chikuasen metstli sakin iueliskiaj notemoltiskej seki amatlajkuiloltin ika okseki tlajtoltin.

 Tokniuan más yokiyektlalijkej yejuin aplicación, pampa yokintlalijkej más videos niman se pestaña noso se cuadrito tlen kipiya tlen ika tomachtiskej ipan tlanechikoltin. Niman desde ipan moBiblia uelis tiknextis okseki tlen más mitspaleuis kuajli xkasikamati.

 Ipantsin 15 millones de dispositivos kitlapouaj aplicación JW Library ipan cada metstli, niman itech yejuin, 8 millones kitlapouaj mojmostla. ¿Tlenon noneki nochiuas niman ijkon yejuin aplicación uelis kitlapos maski san katlejua noso miyekej dispositivos? Paul Willies kijtoua: “Yejuin aplicación noneki nochipa noyenkuilijtias, ika yejon, mojmostla tikitaj kenon uelis más kuajli tikyenkuilijtiaskej, ijkon xkintekiyomakas kitekitiltiskej. Niman pampa noyenkuilijtiuj dispositivos, noneki tikitaskej ika yejuin aplicación kuajli matekiti ipan tlen yenkuik kistiuj. Niman pampa onokej noso onkatij más grabaciones niman amatlajkuiloltin tlen notlaliaj ipan JW Library, noneki tikyenkuilijtiaskej software, ijkon más kuajli matekiti”. Ipan yejuin tonaltin JW Library kipiya ipantsin 200,000 amatlajkuiloltin niman 600,000 grabaciones ika audio niman video ika miyek tlajtoltin.

 Tla tiknekij kuajli matekiti yejuin aplicación, xsan noneki tikintekitiltiskej computadoras, noijki noneki tikinkouaskej miyek licencias de software, se licencia tlen uejkaui se xiuitl notlaxtlaua 1,500 dólares. Noijki, grupo itech programación de MEPS kipopoloua kanaj 10,000 dólares ipan se xiuitl, pampa kinkouaj miyekej dispositivos itech tlatlamantikej marcas, ijkon kuajli kitaskej tla yejuin aplicación JW Library kuajli tekiti ipan computadoras, tabletas niman teléfonos tlen más yenkuikej.

 Ipampa JW Library, xok miyek tikpopolouaj tomin ijkuak tikinchijchiuaj toamatlajkuiloluan ika amatl niman ijkuak tikomintitlanij. Matikitakan tlen opanok ika amatlajkuilojli Mojmostla matomachtikan iTlajtol toTajtsin. Ipan xiuitl 2013, onochijchiujkej 12 millones itech yejuin amatlajkuilojli. San ika ipan xiuitl 2020, san onochijchiujkej 5 millones maski melak yotimiyekiyakej kanaj ipantsin 700,000 pampa miyekej yopeujkaj tenojnotsaj ipan nochi tlaltikpaktli. ¿Tlenon opanok? Aman miyekej tokniuan kipouaj yejuin amatlajkuilojli ipan aplicación JW Library. a

 JW Library melak tepaleuiya. Tokniuj siuatl Geneviève, akin chanti Canadá, kijtoua ika yejuin aplicación melak yokipaleui más kuajli manomachti Biblia. Yejua kijtoua: “Nejua xninomachtiskia mojmostla tla nikominkixtijtoskia libros, san ika, yejuin aplicación san noneki niktlikuiltis notableta niman ompa niknextia nochi tlen ika ninomachtis. Pampa mojmostla ninomachtia, yokichikauj notlaneltokil niman yokichiuj más maninonisiui itech Jehová”.

 Aman ika onka yejuin kokolistli COVID-19, yejuin aplicación melak yotepaleui. Charlyn, akin chanti Estados Unidos kijtoua: “Pampa kokolistli COVID-19 onka ipan nochi tlaltikpaktli, nikuika se xiuitl ika xnikita nion se toamatlajkuilol tlen yenkuik kistiuj ika amatl. San ika, ipan JW Library uelis tiknextiskej nochi tlen noneki, ijkon tikchikauaskej totlaneltokil. Melak niktlasojkamachilia Jehová ipampa yejuin kualtsin tetlayokolijli”.

 Miyekej noijki ijkon kinemiliaj ken tokniuj siuatl Faye, akin chanti Filipinas. Yejua kijtoua: “Yejuin aplicación melak kualtsin, pampa kipiya nochi tlen nechpaleuiya maninonisiui itech Jehová. Niktekitiltia ijkuak san kualkantsin nikpoua itlaj, ijkuak nijkaki itlaj tlen manechyolchikaua chika nitlachipaua nochan, ijkuak ninomachtia tlen tikitaskej ipan tlanechikoltin niman ijkuak nikpoua Biblia. Kemantika ijkuak xtlaj nikchiua, niktekitiltia ika nikimita videos, niman ijkuak niauj kanaj, niktekitiltia ika nikpoua Biblia niman toamatlajkuiloluan. ¡Xonka okse aplicación ken yejuin!”.

 Yejuin aplicación noijki melak mitspaleuis ijkuak titenojnotsas. Se tokniuj siuatl akin chanti Camerún melak okuelitak se tlaxelojli tlen okitekitilti se tokniuj akin iuan tenojnotstinemiya. Sakin, yejua noijki kinekiya kitekitiltis yejon tlaxelojli, san ika, xkilnamikiya katlejua katka. Yejua kijtoua: “Onikilnamik se tlajtojli tlen kijtouaya yejon texto, onikalak ipan yejon aplicación, oniaj ipan Biblia niman oniktejtemo. Ipampa yejuin aplicación, ueli nikintejtemoua textos tlen nikimilkaua”.

 Ipampa donaciones tlen nenkitemakaj ijkon ken nonextia ipan donate.pr418.com ouel otikchijchiujkej yejuin aplicación, noijki tikyenkuilijtiuij noso tikyektlalijtiuij aplicación JW Library, ijkon tokniuan ipan nochi tlaltikpaktli melak kinpaleuiya. Melak tiktlasojkamatij ipampa donaciones tlen nenkitemakaj ika nochi nemoyojlo.

1. Octubre de 2013: Okis yejuin aplicación ika yenkuik Biblia itech Traducción del Nuevo Mundo de las Santas Escrituras ika inglés.

2. Enero de 2015: Onotlalijkej okseki amatlajkuiloltin ika inglés niman sakin ika okseki tlajtoltin.

3. Noviembre de 2015: Onotlali tlen ika tiktlapalyotis motexto.

4. Mayo de 2016: Onotlali se pestaña itech “Reuniones”.

5. Mayo de 2017: Onotlali kampa uelis tikintlalis notas.

6. Diciembre de 2017: Onotlali Biblia de estudio ika inglés.

7. Marzo de 2019: Onotlali tlen kichiua xtemolti audios, xkimita videos ipan internet niman xtlapo amoxtli Tlen kinpaleuiya ika nomachtiaj iTeixpantijkauan Jehová.

8. Enero de 2021: Onotlali tlen techpaleuis ijkuak titemachtiaj ika amoxtli ¡Nochipa uelis tiyolpakis!