Jehová melak kuelita kinmachtis itekipanojkauan, ika yejon, ikalpan yokintlali miyek tlamachtiltin niman ijkon tokniuan kuajli makichiuakan intekiyo. Se de yejon tlamachtiltin yejon Tlamachtijli tlen kiseliaj akin Tenojnotsaj itech iTekiuajyo toTajtsin. Ipan yejuin xiujtin, ikalpan toTajtsin xsan yokiyenkuili ken temachtia, noijki kinyenkuilijtiuj kaltin kampa kinmachtia tokniuan. Tokniuan kinyektlaliaj yejon kaltin pampa kinekij ika akin ompa nomachtiaj niman akin temachtiaj kuajli manomachilikan. ¿Kenon notekitiltiaj donaciones para uelis ijkon nochiuas?

 Yeuejkaui, akin kiseliayaj se tlamachtijli kinmachtiayaj ipan Kaltin kampa tosentlaliaj noso ipan Kaltin kampa tikpiyaj Toueyitlanechikol. San ika, aman yonochijchiujkej noso yonoyenkuilijkej más kaltin kampa san kinmachtiaj akin kiseliaj se tlamachtijli. ¿Tleka? Matikitakan yeyi tlemach.

 Nonekij más tokniuan akin tepaleuiskej. Tokniuj Christopher Mavor, se itech Tokniuan akin kiyekanaj Tenojnotsalistli itech Grupo akin Tlayekana, okijto: “Sucursales yotechualilijkej ika nonekij más tokniuan tlakamej niman siuamej para tenojnotsaskej. Ipan 2019, sucursal tlen onka Brasil okitak ika nonekiyaj yaskiaj kanaj 7,600 tokniuan ipan Tlamachtijli tlen kiseliaj akin Tenojnotsaj itech iTekiuajyo toTajtsin niman ijkon matlapaleuitij kampa más noneki manotenojnotsa”. Noijki, sucursal tlen onka Estados Unidos kineki miyekej precursores akin uelis kinmachtiskej oksekimej tokniuan niman ijkon uelis tenojnotsaskej ipan carrito kampa tojlan, tenojnotsaskej kampa ajsij barcos niman ipan cárcel. Niman noijki nonekij más tokniuan akin tlapaleuiskej ipan Tekitl tlen nochiua itech Diseño niman Construcción niman kinpaleuiskej Tlayekankej akin Kinpaleuiyaj Tokniuan ipan Hospitales. Niman tokniuan akin yauej ipan se Tlamachtijli tlen kiseliaj akin Tenojnotsaj itech iTekiuajyo toTajtsin yejuamej akin uelis tlapaleuiskej.

 Más miyekej akin kinekij nomachtiskej. Ipan miyek sucursales miyekej tokniuan kinekij kiseliskej se tlamachtijli, san ika, xnochimej ueli kinseliaj. Ijkon opanok ne Brasil, sucursal okitak ika ipan san se xiuitl 2,500 tokniuan kinekiyaj nomachtiskej. San ika, pampa xonkatkaj más kaltin kampa uelis nomachtiskej, sucursal san okinseli 950 tokniuan.

 Más kualtsin kampa nokauaskej. Ijkuak tokniuan akin kiseliaj se tlamachtijli nomachtiaj ipan se Kajli kampa tosentlaliaj noso ipan se Kajli kampa tikpiyaj Toueyitlanechikol, nokauaj inchan tokniuan. Niman yejuin melak kuajli kampa xmiyek tlamachtiltin nopanoltiaj ipan se xiuitl. San ika, kampa miyek nopanoltiaj, kanaj tokniuan xuelis kinseliskej nochimej tokniuan akin onomachtiaj. Ika yejon, ikalpan toTajtsin okijto kinchijchiuas seki kaltin kampa nokauaskej tokniuan niman maonia nisiuj kampa nomachtiskej.

 Melak miyek tomintsin uelis nopopolos para kinchijchiuaskej kaltin kampa nokauaskej niman kampa nomachtiskej kanaj 30 tokniuan niman akin temachtiaj.

 Yejuin kaltin nochijchiuaj itempan se ueyi kalpan kampa xmás itlaj kinpajsolos tokniuan, san ika, noijki noita ika mapano carro tlen uelis ipan yaskej tokniuan. Notlapejpenia kampa nemij miyekej tokniuan niman ijkon yejuamej uelis tlapaleuiskej ipan yejuin kaltin niman ijkon nochi kuajli maonia.

 Yejuin kaltin kipiyaj kampa onkatij miyek libros, computadoras, impresoras niman kampa tokniuan uelis nomachtiskej. Noijki onka kampa tokniuan akin temachtiaj niman akin nomachtiaj uelis san sekan tlakuaskej. Niman noijki kipiya kampa tokniuan uelis kichiuaskej ejercicio niman kampa uelis noyolpaktiskej.

 San ika, más kuajli noita kenon nochijchiuaskej kampa nomachtiaj tokniuan. Troy, se tokniuj akin tlapaleuiya ipan Tekitl tlen nochiua itech Diseño niman Construcción ne Warwick (Nueva York), kijtoua: “Otikintlajtlanilijkej tokniuan akin tlapaleuiyaj kampa noyekanaj tlamachtiltin itech Biblia matechpaleuikan matikitakan kenon yeskiaj kaltin niman ijkon tokniuan más kuajli ompa nomachtiskiaj. Tokniuan otechijlikej kech ueyi yeskia se kajli, kenon nonekiya titlatlajtlaliskiaj, kanon nonekiya más tlauilpan yes niman kanon tikintlaliskiaj tlen notekitiltia ipan audio niman video”. Zoltán, se tokniuj akin tlamachtia ipan Tlamachtijli tlen kiseliaj akin Tenojnotsaj itech iTekiuajyo toTajtsin ne Hungría, kijtoua: “Yeuejkaui, tejuamej xtikinpiayaj micrófonos, kuakon nonekiya tikimijliskej tokniuan más chikauak matlajtokan. San ika, aman nochimej kipiyaj inmicrófono ipan inmesa”.

 ¿Kenon yokinpaleui nochi yejuin akin nomachtiaj niman akin temachtiaj? Angela, se tokniuj akin oyaj ipan Tlamachtijli tlen kiseliaj akin Tenojnotsaj itech iTekiuajyo toTajtsin ne Palm Coast (Florida, Estados Unidos), kijtoua: “Tokniuan melak kualtsin ken okinchijchiujkej kaltin kampa techmachtiaj niman kampa tokauaj. Ijkon, tejuamej más kuajli tomachtiaj”. Csaba, se tokniuj akin temachtia ne Hungría, melak kuelita tlakuas imiuan tokniuan akin nomachtiaj. Yejua kijtoua: “Ijkuak imiuan titlakuaj, tokniuan más techijliaj tlen inpan yonochiuj. Yejon techpaleuiya más kuajli matikimixmatikan niman ijkon más kuajli tikinmachtiaj”.

 Tokniuan akin temachtiaj niman akin nomachtiaj, kitaj nochi tlen yonochiuj ken itlaj tlen ualeua itech toUeyi Tlamachtijkauj, Jehová (Isaías 30:20, 21). Ne Filipinas onoyektlali se kajli niman ijkon uelis ompa nopanoltiskej tlamachtiltin. Se tokniuj siuatl akin oyajka ipan Tlamachtijli tlen kiseliaj akin Tenojnotsaj itech iTekiuajyo toTajtsin, kijtoua: “Ijkuak ompa tinemiyaj, xtomachiliayaj kentla san akin nomachtiaj, otomachilijkej kentla Jehová otechnots. Yejua kineki melak matikuelitakan ijkuak tomachtiskej iTlajtol”.

 Pampa nemejuamej nenkitemakaj nemotomintsin ueli nochijchiuaj, noyenkuiliaj niman noyektlaliaj kaltin kampa nopanoltiaj tlamachtiltin. Miyekej kitemaka intomintsin ipan donate.pr418.com. Melak timechtlasojkamachiliaj.