Yejuin año iteixpantijkauan Jehová sa kichiatoyaj kitaskej tlamauisojli: Tlen opanok ipan inemilis Jesús: Capítulo 1. Melak miyekej yokitakej, niman ok poliui 17 capítulos. San ika, ¿tlenon kichiuaj tokniuan para kichijchiuaskej yejuin película? ¿Niman kenon nemejuamej noijki yonentepaleuijkej?

 Ipan sucursal de Australasia, kampa nochijchiujtika yejuin película tlapaleuiyaj kanaj 50 niman 80 tokniuan ijkuak nochiuaj grabaciones. a Nochimej kintlakualtiaj ika kualkan, niman ika teotlak. Kuakon, kuajli kitaj tlenon kinkualtiskej. Se tokniuj akin itoka Esther, niman tlapaleuiya ipan Departamento de Servicios de Alimentación, kijtoua: “Ijkuak tikitaj tlen titekualtiskej tiktejtemouaj kampa xmás patioj niman ijkon xmás miyek tomin nopopolos. Noijki san tikitaj kech tlakuajli tikchijchiuaskej para ijkon xtlaj notlajkalis”. Mojmostla nopopoloua naui dólar para san se titlakualtiskej. b

 Akin kisaj ipan película niman akin kichiuaj grabación xsan noneki tikintlakualtiskej noijki noneki tikintlajpiyaskej. ¿Tleka ijkon tikijtouaj? Pampa, ne Australia, kemantika melak seua noso melak tona niman tonaltsintli melak tetlatia. Ika yejon, sekimej tokniuan chikauak tekitij para kintlaliaj carpas kampa uelis noseuiskej akin ompa nemij para xtonalmikiskej. Noijki, kitaj ika maonia cremas solares, sombrillas niman atl. Kevin akin tlapaleuiya ipan Servicios de Audio y Video, kijtoua: “Techuajpaleuiyaj sekimej tokniuan akin tlapaleuiyaj Betel desde inchan. Yejuamej melak yolyemankej niman melak kuelitaj tekitiskej. Xueliskia tikchiuaskej yejuin tekitl tla xtechpaleuiskiaj”.

 Oksekan nochiua grabación maski uejka, pampa tla nikan tikchiuaskiaj noso ipan sucursal xkualtsin nesiskia noso nesiskia ika xijkon katka ken yeuejkaui. Pampa yeuejkaui xonkatka luz, carreteras nion kaltin ken aman onokej. Noijki noneki kuajli kejyeuaskej tlakentin niman nochi kitkiskej tlen notekitiltis. Achto nochiuas grabación, kitaj ika maonia luz, atl niman baños. Nochimej akin tlapaleuiyaj kochij inchan tokniuan noso kochij ipan remolques, hoteles noso cabañas.

 Ijkuak oksekan nochiua grabación melak patioj kisa, noijki noneki tiempo niman melak siauij akin ompa tlapaleuiyaj. Ika yejon, ipan 2023 Grupo akin Tlayekana ipan nochi tlanechikoltin okijto ika ueliskia nokouas se pared de video (video wall), yejuin okikoujkej ika dos millones y medio de dólares. Yejuin pantallas de video kintekitiltia tlaixkopinaltin niman tlauijli tlen melak kuajli nesi, ken tla kiyauak nemiskiaj. Pampa ijkon tikchiuaj xmiyek tomin tikpopolouaj. Darren, akin tlapaleuiya ipan Grupo akin kiyekana Sucursal ipan Australasia, techijlia: “Pampa aman ijkon tikchiuaj grabaciones, tokniuan xmás siauij niman ueli miyekpa tikyektlaliaj tlen uajnesis. San matikonnemilikan, tla tikchiuaskiaj se grabación ne kiyauak, tikpiyaskiaj san seki minutos para tikixkopinaskiaj ijkuak kalaki tonaltsintli pampa xuejkaui. San ika, ika yejuin tecnología ueli miyekpa tiktlaliaj ijkuak kalaki tonaltsintli hasta keman kuajli kisa tlen uajnesis”.

 Para nochiuas cada grabación itech tlamauisojli “Tlen opanok ipan inemilis Jesús”, noneki melak miyekej tokniuan akin uajnesiskej niman oksekimej akin noijki tlapaleuiskej ipan equipo. ¿Kenon nomachiliaj tokniuan pampa melak kuajli kintlajpiyaj?

 Se tokniuj siuatl akin ualeua Melbourne niman itoka Amber ononek yas kanaj 700 kilómetros (435 millas) para ontlapaleuis ipan yejuin tekitl. Yejua okijkuilo: “Tokniuan de Betel melak kuajli onechtlajpixkej desde ijkuak onajsik ipan aeropuerto. Miyekej onechnotskej manitlakuati niman manikoniti té imiuan, nochi equipo melak onechtlasojtlakej niman okichiujkej kuajli maninomachili. Nejua xtlaj onikpolo ijkuak oniaj, pampa melak miyek tlateochiualistin onikseli”.

 Se tokniuj akin itoka Derek, niman tlapaleuiya kampa nochijchiuaj videos, okijto: “Desde ijkuak otipeujkej, miyek equipos touan yotekitkej. Nikintlasojkamachilia nochimej tokniuan tlakamej niman siuamej pampa yokikaujkej intiempo, yokitemakakej intomintsin niman inkojtilis ipampa yejuin tekitl. Nochipa melak kuajli tenotsaj niman kinektokej tlapaleuiskej. Kuajli nesi ika Jehová yokinteochiuj yejuamej niman noijki tejuamej, yejua xsan najmana ipampa ken kisa tekitl, noijki ipampa ken tikchiuaj”.

 Videos itech “Tlen opanok ipan inemilis Jesús” xueliskia nochijchiuaskia tla xnenkitemakaskiaj nemodonaciones, noijki tlen nenkitemakaj itechkopa donate.pr418.com. Tlaxtlauikan nokniuan, pampa nentlapaleuiyaj.