Nochi metstin, tinochimej sa tiknektokej tikitaskej JW Broadcasting pampa yejon videos niman programas melak techyolchikauaj. San ika, miyekej tokniuan akin chantij África xueli kimitaj yejuin programas. ¿Tleka?

 Pampa ne África miyekan xmás onka internet. Niman kampa onka internet melak yolik niman patioj kitlaxtlauaj. San xkonemilikan tlen ipan opanok se tokniuj akin tlayekana ipan circuito ne Madagascar, yejua okitemolti se video de Broadcasting ipan se Ciber, niman okitlaxtlauj 16 dólares. ¡Yejuin melak patioj! Ijkon tikijtouaj pampa akin ompa chantij noneki tekitiskej ipantsin se semana para uelis kitlaniskej yejon tomintsin. a

 Niman, maski ouijtika, miyekej akin chantij África ueli kitaj JW Broadcasting maski xkipiyaj internet. ¿Kenon ueli kitaj?

 Desde 2017, akin chantij África subsahariana ueli kitaj JW Broadcasting ipan se canal de televisión ika satélite. Mojmostla, ika tonajli niman ika yeuajli kinpanoltijtokej videos tlen kisaj ipan JW Broadcasting, ika 16 tlajtoltin. ¡Niman xtlaj notlaxtlaua tla se kita yejuin canal!

 Ueli nochiua yejuin pampa iteixpantijkauan Jehová kitlaneuij se canal ika satélite. Yejuin señal ika satélite ajsi ipantsin 35 países tlen onokej ne África subsahariana. Yejuin canal kitlaxtlaujtokej ipantsin 12,000 dólares ipan se metstli. Kemantika más notlaxtlaua ijkuak noneki notekitiltis okse canal. Ipan yejuin ika ome canal, miyekej ueli kitaj touejueyitlanechikoluan, niman noijki ueli kita tlen nopanoltia ijkuak se tokniuj kitemaka se tlamachtijli ijkuak komintlajpaloua ipan sucursal.

 Miyekej tokniuan niman noijki akin xnomachtiaj ueli kitaj yejuin canal ipan intelevisión. San ika, miyekej tokniuan xueli kitaj yejuin canal pampa xkipiyaj tomintsin tlen ika kikouaskej tlen noneki, niman ijkon kitaskej yejon canal. Ika yejon, ipantsin 3,670 kaltin ampa tosentlaliaj, yokitlalijkej tlen noneki, ijkon tokniuan uelis kitaskej JW Broadcasting. Niman tla onka televisión ipan kajli kampa tosentlaliaj, san notlaxtlaua 70 dólares, niman tla xonka, kuakon notlaxtlaua hasta 530 dólares.

 Tokniuan melak kuelitaj pampa onka yejuin canal. Se tlayekanketl akin chanti Camerún kijtoua: “Nochanejkauan kitaj yejuin kentla maná kampa tlauaktok”. Odebode, se tokniuj akin chanti Nigeria, kijtoua: “Tosentlaliaj yexpa ipan se semana ken familia para tikitaskej yejuin canal, tokoneuan melak kuelitaj yejuin programa niman sa kinektokej kitaskej”. Rose, akin noijki chanti Nigeria, techijlia: “Melak nikuelitaya nikitas noticias, san ika, aman más nikuelita nikitas canal JW Broadcasting pampa tlen ompa panoua kichiua kuajli maninomachili niman maniyolpaki. Melak nikuelita yejuin canal, pampa ijkuak nikimitaya noticias kichiuaya nimantsin manikualani niman manajmankamiki”.

 Se tokniuj tlayekanketl ipan circuito akin chanti Mozambique techijlia ika ipan icircuito nochi kaltin kampa tosentlaliaj yokintlalilijkej tlen noneki para maajsi señal itech canal JW. Tokniuan ajsij se hora achto ika peuas tlanechikojli, ijkon uelis kitaskej canal JW Broadsting.

 Ipan toueyitlanechikol 2019, tlen onopanolti ipan Johannesburgo (Sudáfrica), okitekitiltijkej yejuin canal, niman ijkon 9 kalpamej ouel okimitakej tlamachtiltin tlen okipanoltijkej tokniuan itech Grupo akin Tlayekana. Sphumelele, akin tlapaleuiya ipan Departamento Local de Broadcasting de isucursal Sudáfrica, kijtoua: “Achto tikinpanoltiayaj tlamachtiltin san ipan internet. San ika, para ijkon tikchiuaskiaj nonekiya tikpiyaskiaj internet noso tijkouaskiaj datos. San ika, aman más kuajli niman xmás patioj tiktlaxtlauaj pampa tikinpanoltiaj ika satélite ipan se canal”.

 Tiktlasojkamatij ika nenkitemakaj nemodonaciones para tokniuan akin chantij África ueli kitaj JW Broadcasting ika satélite. Noijki, melak tiktlasojkamatij ika nenkitemakaj nemodonaciones ipan obra muldial, niman noijki ika nenkichiuaj ipan donate.pr418.com.