Ipan septiembre de 2020 hasta agosto de 2021, a yejuin kokolistli COVID-19 okichiuj ika melak matitlajyouikan. Ipan tlamachtijli “Titlapaleuiyaj ipan nochi tlaltikpaktli ipan yejuin pandemia”, onoijkuilo ika yotikpopolojkej millones de dólares b ijkon otikinpaleuijkej tokniuan ipan yejuin pandemia, niman ika yonotlalijkej 950 grupos akin kitaj ken notepaleuiya.

 Xsan yejuin kokolistli melak yotlaijtlako, miyekan melak otlaixpoliuj, niman yejuin noijki okimijtlako tokniuan. Ika yejon, Grupo akin kiyekana Tekitl itech Grupo akin Tlayekana okijto ika maski noxelouaya tomintsin para yejuin pandemia, aman noijki notekitiltiskia 8 millones de dólares kampa yotlaixpoliuj. Matikitakan kenon notekitiltiaj nemodonaciones kampa tlaixpoliui.

 Ipan 22 de mayo de 2021, otopon volcán Nyiragongo, tlen onka ipan República Democrática del Congo. Yejon tlitl tlen kikixtia volcán okinxoxotoni kaltin, escuelas niman kampa kipiayaj atl. Niman xsan yejon, pampa volcán ouejkauj ika kikixtiaya tlikonextli tlen teijtlakouaya niman onxiniya ipan kalpan Goma niman noijki miyekpa otlalolin. Miyekej akin ompa chantiyaj ononek kisaskej niman sekimej hasta oajsikej Ruanda.

 Kanaj ipantsin 5,000 iteixpantijkauan Jehová, noijki ononek kisaskej inchan. Miyekej okipolojkej inkaluan ijkuak otopon volcán, niman oksekimej okintlaxtekilijkej ijkuak yejuamej xompa nemiyaj. Ika yejon, grupos akin kitaj ken nopaleuiya de Ruanda niman de República Democrática del Congo san sekan otekitkej. Isucursal del Congo techijlia tlen okichiujkej tokniuan itech yejuin grupos: “Achto ika tekiuajkej teijliskiaj makisakan, grupos akin kitaj ken nopaleuiya, opeuj kixelouaj tlakuajli, atl, sábanas niman tlakentin, maski kampa nemiyaj melak yoijtlakaujka”. Ipan se kalpan kampa nemiyaj ipantsin 2,000 tokniuan, grupo akin kita ken nopaleuiya okintlali kampa nokauaskiaj, okintemakakej cubrebocas, niman noijki okimijlikej tlenon ueliskiaj kichiuaskiaj niman ijkon xkualoskia de COVID-19 nion de cólera.

 San ipan yeyi metstli, tokniuan okixelojkej ipantsin 6 toneladas de arroz, 6 toneladas de tlayojli, ipantsin 8,000 litros de aceite para tlakualchiuaskej niman ipantsin 8,000 litros de atl. Noijki para xmiyek kipopoloskej tomin, sucursal okikouj miyek tlakuajli ipan yejon kalpan kampa chantiyaj tokniuan.

 Se tokniuj kijtoua: “Melak toyolkokouayaj niman titlajyouijtoyaj”. Volcán okixoxotoni inkal tlen yenkuik katka, san ika, sakin yejua iuan ifamilia okinmakakej tlen kinpolouaya. Aman yejua kijtoua: “Niktlasojkamachilia Jehová, pampa otechmakak tlen techpoloua. Kuajli yonikitak ika Jehová techpaleuijtiuj niman yejon kichiua matikxikokan tlen tikixnamikij”.

 Akin chantij Venezuela ikipiyaj miyek xiujtin ika xkipiyaj tlen ika nopanoltiskej, noijki xonka miyek tlen kikuaskej niman melak nochiua tlen xkuajli. Tokniuan noijki ouijtika kitaj kinextiskej tlen ika nopanoltiskej, san ika, ikalpan Jehová xkeman kinkaua san inselti.

 Ipan septiembre de 2020 hasta agosto de 2021, onotlaxtlauj ipantsin 1.5 millones de dólares para onokouj tlakuajli niman xapo, niman ijkon okimitkilijkej tokniuan akin más kinpoloua. Isucursal Venezuela kijtoua: “Ouijtika tikxelojtinemis nochi metstin 130 toneladas de despensa niman tikitas akinomej tokniuan melak kinpoloua”. Tokniuan kikouaj despensas tlen xsan isiujkan ijtlakaui. Yejuamej noijki kijtouaj: “Tijkouaj tlakuajli ijkuak más onka niman ijkon xmás patioj kisa, sakin kuajli tikitaj kenon tikontitlaniskej”.

 Leonel melak kuelita tlapaleuis ipan se grupo akin kita ken notepaleuiya ne Venezuela. Yejua techijlia: “Nosiuatsin omik ipampa COVID-19. Ika yejon melak nechyolseuiya niman nechyolchikaua nitlapaleuis kampa tlaixpoliui. Noijki nochipa onka miyek tlen nikchiuas niman ijkon nikinpaleuis nokniuan. Kuajli yonikitak ika Jehová nochipa kitlajpiya ikalpan”.

 Noijki se tokniuj akin achto yotlapaleui ipan se grupo akin kita ken notepaleuiya, kijtoua: “Aman nejua akin nonekiya manechpaleuikan. Tokniuan otechmakakej nochi tlen techpolouaya, noijki otechpaleuijkej nejua niman nosiuatsin niman ijkon maka matajmanakan, yejuamej otechyolseuijkej, otechtlajpixkej niman otechyolchikaujkej”.

 Xtikmatij kemanon niman kanon tlaixpoliuis, maski ijkon, ikalpan Jehová nochipa nimantsin tlapaleuiya ika tlen noneki, pampa nemejuamej nenkitemakaj donaciones ipan tlen ika nochiua tekitl ipan nochi tlaltikpaktli. Ipan donate.pr418.com tikmatis kenon uelis titlapaleuis ika motomintsin. ¡Melak timechtlasojkamachiliaj pampa nenkuelitaj nenkitemakaskej!