Ipan xiuitl 2020 miyekan otlaixpoliuj niman noijki opeuj ueyi kokolistli COVID-19. ¿Kenon iteixpantijkauan Jehová okinpaleuijkej akin otlajyouijkej?

 Ipan septiembre de 2019 hasta agosto de 2020 a, Grupo akin kiyekana tekitl okijto ika ueliskia notekitiltiskia 28 millones de dólares b niman ijkon kinpaleuiskej akin chantij kampa tlaixpoliui. Ika yejuin tomin otikinpaleuijkej miyekej akin chantij kampa otlaixpoliuj kentla ipan yejuin kokolistli COVID-2019, kampa melak oajakakiyauj, ijkuak oapachiujkej ne África, ijkuak ne Venezuela xkipiayaj tlen kikuaskej, niman ijkuak otlauak ne Zimbabue. Ika yejuin tomintsin onokouj tlakuajli, atl, tlakentin, tlen ika onopajtikej niman noijki onotlaxtlauj kampa nokauaskiaj. Yejuin tomintsin noijki onotekitilti para onokouas tlen ika tlachipauaskiaj, tlen ika tlayektlaliskiaj niman tlen ika oksejpa tlachijchiuaskiaj. Matikitakan kenon yotepaleuijkej kampa tlaixpoliui.

 COVID-19. Yejuin kokolistli melak yokimijtlako tokniuan ipan nochi tlaltikpaktli pampa miyekej kualoj, melak najmanaj niman sekimej xok kipiyaj miyek tomin. Ika yejon, onotlalijkej 800 Grupos akin Kitaj ken Notepaleuiya. Yejuin Grupos kuajli kitaj tlen kinpoloua tokniuan niman kijliaj Grupo akin kiyekana tekitl niman ijkon kitaskej kenon kinpaleuiskej.

 Ipan yejon xiuitl, Grupos akin Kitaj ken Notepaleuiya okinpaleuijkej miyekej makipiyakan tlakuajli, atl, tlen ika nochipauaj noso naltiaj niman seki tlen ika nopajtiaj. Niman ipan okseki kalpamej, Grupos akin Kitaj ken Notepaleuiya niman tlayekankej, okinpaleuijkej tokniuan makiselikan tlen Gobierno temaka.

 Akin xnomachtiaj kuajli yokitakej kenon tikinpaleuiyaj tokniuan. Kentla Field Simwinga, akin kinyekana policías ne Nakonde (Zambia), yejua okimijli tokniuan: “Melak timechtlasojkamachiliaj pampa nimantsin onenkinpaleuijkej akin tlajyouijtokej”.

 Xkipiyaj tlen kikuaskej ne Angola. Ipampa kokolistli COVID-19, ne Angola, tokniuan xmás kipiayaj tlen kikuaskej nimannochi opatiouak. Tokniuan melak ouijtika okitakej kikouaskej tlakuajli.

 Ika yejon, okitlajtlanilijkej isucursal Brasil, makinpaleui ika despensas on tokniuan akin chantij Angola. Tokniuan okitejtemouilijkej kenon más kuajli kikouaskej niman kontitlaniskej yejon tlakuajli, noijki okijtokej kikouaskej miyek tlakuajli pampa ijkon xmás patioj kisa, niman ijkon kuajli kintekitiltiskiaj donaciones. Ika yejon, okipopolojkej san 22 dólares ipan cada se despensa ijkuak okikoujkej niman okontitlankej. Niman yejuin despensa kipiaya 20 kilos (44 libras) itech tlakuajli, ken arroz, aceite niman yetsintli. Hasta aman yonotitlankej 33,544 despensas noso 654 toneladas (721toneladas americanas). Ika nochi yejuin niman okseki tlen onokouj ne Angola okintlakualtijkej ipantsin 50,000 tlaltikpakchanejkej.

 ¿Kenon nomachiliaj tokniuan? Alexandre, akin chanti melak uejka itech Angola, kijtoua: “Kuajli nikita ika Jehová nechtlasojtla, ika xnoselti ninemi niman ika ikalpan Jehová nechpatiojkaita”. Mariza, akin iselti kiskaltia ikoneuj, techijlia: “Jehová okikak noteoyouj, melak niktlasojkamachilia niman noijki ikalpan”.

 Otlauak ne Zimbabue. Ipan septiembre de 2019 hasta agosto de 2020, Melak otlauak ne Zimbabue, yejon okichiuj ika miyekej matlajyouikan pampa melak apismikiyaj. Miyekej tokniuan xmás kipiayaj tlen kikuaskej.

 Onotlalijkej 5 Grupos akin Kitaj ken Notepaleuiya, ijkon kominmakaskiaj tlakuajli tokniuan. Miyekej tokniuan otlapaleuijkej ijkuak okiyektlalijkej noso okinsajsalojkej despensas, niman ijkuak okintlejkoltijkej ipan carros, sekimej hasta otetlaneujtijkej incarros. c Ipan yejon xiuitl onopopolo 691,561 dólares ika okintlakualtijkej 22,700 tlaltikpakchanejkej.

 Ijkuak sekimej tokniuan xok kipiayaj tlen kikuaskiaj, yejon tonajli oajsikej tokniuan akin kitkiyaj despensa. Tokniuan okitlaxtlauilmakakej Jehová niman sekimej hasta opeuj nokuikatiaj totlakuikaluan.

 Ipan se kalpan, sekimej onosentlalijkej pampa kinekiyaj makinpaleui se organización akin xtekiti iuan Gobierno (ONG) niman omemej tokniuan siuakaualtsitsintin noijki oyajkej. San ika, ipan yejon reunión, nimantsin ones ika nonekiya nokalaktiskiaj ipan política tla kinekiyaj makinpaleuikan, ika yejon, tokniuan okitlapejpenijkej xkiseliskej. Ijkuak iyajtoyaj okinpijpinaujtikej niman okimijlikej: “Maka nenuajlaskej nentechuajtlajtlaniliskej tlen nenkikuaskej”. San ika, ome semanas sakin, sekimej tokniuan okinpaleuitoj akin ompa chantiyaj, niman okinmakakej tlakuajli yejon omemej tokniuan siuakaualtsitsintin achto ika ajsiskia yejon organización.

 Ken otepaleuijkej tokniuan okichiuj ika kuajli matlajtokan itech Jehová. Matikitakan tlen ipan opanok Prisca, akin chanti ipan se pitentsin kalpan. Maski kixnamiktoya tlen melak ouijtika pampa otlauak, yejua ontenojnotsayaj miércoles niman viernes maski ijkuakon miyekej yopeujkaj tlaxoponiaj. Akin ompa chantiyaj kipijpinaujtiayaj niman kijliayaj: “Tikinmiktis mochanejkauan ika apistli, pampa titenojnotstinemi”. San ika, Prisca kinankiliaya: “NoTajtsin Jehová xkeman kinkaua akin kitekichiuiliaj”. San ipan seki tonaltin, tokniuan okinmakatoj tlakuajli. Sekimej ivecinos omojkatlachixkej niman okijlikej: “ToTajtsin xkeman mitskaua, tikuelitaskiaj tikmatiskej más itech yejua”. Aman chikome ivecinos kinkakij totlanechikoluan ipan radio.

 Pampa itinemij ipan san itlamiyan tonaltin, melak miyek tlen ouijtika tikixnamikiskej (Mateo 24:3, 7). Melak tiktlasojkamatij pampa nenkuelitaj nenkitemakaskej nemotomintsin, niman pampa noijki nenkichiuaj ijkon ken nonextia ipan donate.pr418.com. Yejuin melak kinpaleuis tokniuan akin kixnamiktokej tlen ouijtika.