Ipan Latinoamérica, miyekej tlaltikpakchanejkej chantij ipan seki comunidades indígenas niman tlajtouaj okse tlajtojli niman noijki kipiyaj costumbres tlen yejuamej kichiuaj. Miyekej tokniuan noijki chantij ipan yejon kalpamej. Iteixpantijkauan Jehová tikinpaleuiyaj oksekimej makixmatikan Biblia, ika yejon tikintlajtolkuepaj seki amatlajkuiloltin niman noijki yonotlajtolkuep ipantsin 130 tlajtoltin ipan Latinoamérica. a Miyekej tokniuan miyek tlemach tlen yokixnamijkej, san pampa kinekij kitekichiuiliskej Jehová, yejuamej xkinekij kichiuaskej seki tlen ompa nochiuaj niman tlen Biblia kijtoua ika xkuajli. ¿Kenon tikintekitiltiaj donaciones niman ijkon tikinpaleuiskej?

 Miyekej tokniuan akin chantij ipan kalpantsin huichol itech tepemej de Jalisco (México), okiteijlikej ika miyek tlakaitalistli, ika xkichiuaskiaj seki costumbres noso iluimej tlen notlajtlaniya, pampa yejon xtemachtia Biblia. b San ika, yejon okichiuj ika miyekej akin ompa chantij melak makualanikan, ika yejon, ipan 4 de diciembre de 2017, miyekej tlakamej akin melak kualantoyaj okinuisokej tokniuan niman akin imiuan nosentlaliayaj, noijki yejuin tlakamej okinkixtijkej tokniuan kampa chantiyaj, okinxoxotonilijkej nochi tlen kipiayaj niman okimijlikej ika tla nokuepayaj kinmiktiskiaj.

 Miyekej iteixpantijkauan akin nisiuj chantiyaj, okinpaleuijkej yejuin tokniuan ika tlen kinpolouaya. San ika, ¿kenon ueliskiaj nokuepaskiaj inchan? Se tokniuj, akin itoka Agustín, okijto: “Xtikpiayaj tomin, ijkon tiktlakeuaskej se abogado noso yakaj akin matlajto topampa. Niman noijki xtikmatiyaj kanon tiktejtemoskej akin matechpaleui”.

 Pampa okitakej ika tokniuan xkinkauiliayaj makiueyichiuakan toTajtsin ken kinekiyaj, isucursal Centroamérica nimantsin okitak kenon ueliskia kinpaleuiskia. Kachtopa okintlajtlanilijkej akin ompa tlanauatiaj, kuajli makitakan tlen opanok. Sakin, Grupo akin kiyekana Tekitl itech Grupo akin Kinyekana iTeixpantijkauan Jehová, okijto ika sucursal ueliskia tekitiskia iuan Departamento de Asuntos Legales tlen onka ipan oficina kampa noyekanaj nochi sucursales, ijkon notlateiluiliskej para kinpaleuiskej tokniuan huicholes. Sakin, nochi yejuin tlen panotoya oajsik hasta ipan Suprema Corte de Justicia de la Nación, yejuin se tribunal kampa teyolkuitiaj niman más ueyixtok ipan nochi México.

 Sekimej abogados akin ualeuayaj ipan miyek países okiyektlalijkej se discurso niman ompa kuajli tetomiliayaj ika, ijkon ken oksekimej tlaltikpakchanejkej noneki kitlakaitaskej costumbres niman akin chantij ipan comunidades indígenas, noijki ijkon, yejon comunidades noneki kitlakaitaskej tlen kineltokaj niman tlen kichiuaj akin ompa chantij, pampa tinochimej tikpiyaj derechos humanos.

 Ipan 8 de julio de 2020, yejon Suprema Corte de Justicia, otlajto inpampa tokniuan iteixpantijkauan Jehová. Otlanauatijkej makinkauilikan oksejpa manokuepakan ipan inkalpan kampa okikixtijkaj. Tokniuj Agustín, akin otikteneujkaj kachtopa, okijto tlen kimachiliaj nochi tokniuan: “Melak tiyolpakij niman timechtlasokamachiliaj nochi tlen onenkichiujkej topampa, xtikmatij tlenon tikchiuaskiaj tla xnentechpaleuiskiaj”.

 Ijkon opanok iuan tokniuan de San Juan de Ilumán, se kalpan tlen nokaua ipan Otavalo, del Ecuador, kampa chantij miyekej indígenas, ipan xiuitl 2014, ijkuak yokinkauilijkaj makichiuakan se Kajli kampa tosentlaliaj, se teopixki okinuikak kanaj 100 tlaltikpakchanejkej ijkon okinchiualtijkej tokniuan maka san makichijchiuakan yejon kajli. Noijki, akin chantij ipan yejon kalpan, okinnauati iteixpantijkauan Jehová maka san manosentlalikan.

 Tokniuan akin tlapaleuiyaj ipan departamentos de Asuntos Legales itech sucursal del Ecuador niman oficina kampa noyekanaj nochi sucursales, san sekan otekitkej ijkon kinpaleuiskej tokniuan akin xkinkauiliaj makiueyichiuakan toTajtsin. Tlen panotoya onouikak imixpan tribunales, yejuin okichiuj ika yejon kalpan makinkaua tokniuan niman matlamikan makichijchiuakan kajli kampa tosentlaliaj. Niman para uelis kinpaleuiskej tokniuan ika tlayekapan, maka ijkon oksejpa mapano, abogados akin okinpaleuijkej tokniuan, okimijlikej tribunales makitakan tlenon panotoya niman makitakan ika yejon kalpamej indígenas, makintlakaitakan yejon derechos humanos internacionales.

 Ipan 16 de julio de 2020, yejon Corte Constitucional del Ecuador, tribunal tlen más ueyixtok ipan país, okitak tlen opanok. Tokniuan abogados del Ecuador ipampa otlajtokej tlanechikojli niman imiuan nemiyaj okseki naui tokniuan abogados, akin miyekan otlapaleuijkaj ipan okseki países. Ipampa kokolistli COVID-19, onosentlalijkej san ika videollamada desde inpaíses. Xkeman ijkon panouaya, ika tribunal makinkauiliani ika tokniuan makijtokan tlen opanok san ika videollamada. c Tokniuan abogados otlajtokej itech tlen autoridades legales ipan nochi país yokijtokaj niman ijkon, makasikamatikan ika se tlaltikpakchane xkipoloua iderechos humanos san pampa chanti ipan se comunidad.

 Tokniuan akin chantij ne Otavalo sa kichiatokej tlen kijtos Corte Constitucional, niman yejuamej melak kitlasojkamatij pampa yokinpaleuijkej. César, se tlayekanketl ipan tlanechikojli Ilumán Quichua, kijtoua: “San itechkopa ikalpan Jehová, melak nochiua miyek san inpampa sekimej”.

 Nochimej abogados akin otlapaleuijkej katkaj iteixpantijkauan Jehová, yejuamej ika nochi inyojlo okichiujkej yejon niman xtlaj okintlaxtlaxtlauilijkej. San ika, ononek kuajli noyektlaliskej, ijkon kimatiskej tlenon kijtoskej ixpan tribunales, ipampa yejon ononek tiempo niman tomin. Tokniuan abogados niman okseki tokniuan, opanojkej 380 horas ijkon kitaskej tlen opanok ne México, niman okseki 240 horas ijkuak okitlajtolkuepkej yejon documentos. Okseki 40 abogados ipan nochi tlaltikpaktli, miyek tiempo opanokej para kitaskej tlen opanok ne Ecuador. ¿Kenon ouel otiktlaxtlaujkej nochi tlen onotekitilti, ijkon tikinpaleuiskej tokniuan? Ipampa donaciones tlen nemejuamej nenkitemakaj, ijkon ken uajnestiuj ipan donate.pr418.com. Tiktlasojkamatij pampa nenkuelitaj nenkitemakaskej.