“¡Melak nikuelita kampa tosentlaliaj!”. Ijkon okijto Nicole, se ichpochtli akin chanti Colombia. ¿Tleka melak kuelita Kajli kampa nosentlalia? Yejua kijtoua: “Ompa nemij nokniuan akin imiuan niktekichiuilia Jehová”. ¿Timomachilia ijkon ken Nicole?

 Ipan nochi tlaltikpaktli, iteixpantijkauan Jehová tikpiyaj kanaj 63,000 Kaltin kampa tosentlaliaj. Ipan yejuin kualtsitsintin Kaltin xsan tikueyichiuaj toTajtsin. David akin precursor regular niman chanti ne Colombia okijto: “Kaltin kampa tosentlaliaj kikualnextia tlen titemachtiaj. Miyekej akin yauej, mojkatlachiaj ijkuak kitaj ken kualtsin nesij yejon Kaltin”. Niman yejon melauak pampa melak tokojtiliaj tikinchipauaskej niman tikintlajpiyaskej Kaltin kampa tosentlaliaj. ¿Kenon tikchiuaj yejuin?

 Tlanechikoltin sa no yejuamej kintlajpiyaj Kaltin kampa nosentlaliaj.

 Ika yejon tokniuan miyekpa kichipauaj niman kiyektlaliaj kampa noneki. Departamento Local de Diseño niman Construcción (LDC) kintlapejpeniaj sekimej tokniuan akin kinmachtiskej oksekimej kenon kintlajpiyaskej Kaltin kampa tosentlaliaj. Cada se de yejuamej kita 6 noso 10 Kaltin kampa tosentlaliaj. Komintlapalouaj niman kominmachtiaj tokniuan kenon kintlajpiyaskej. Cada yeyi xiuitl kominitaj yejon Kaltin niman kijkuilouaj tlenon noneki noyektlalis.

 Nochimej tokniuan akin yokiselijkej yejuin tlamachtijli melak kitlasojkamatij. Indhumathi se tokniuj siuatl, akin chanti India, okijto: “Melak kualtsin tlen otechmachtijkej. Melak onechyolpakti niuelis kenon kuajli niktlajpiyas Kajli kampa tosentlaliaj”. Evans akin chanti Kenia kijtoua: “Otikitakej ika melak noneki nimantsin tikyektlaliskej itlaj achto más ijtlakaujtias, ijkon xtikpopoloskej miyek tomin”.

 Ipan se xiuitl, melak miyek dólares a notekitiltiaj para tikuiskej niman tiktlajpiyaskej se Kajli kampa tosentlaliaj. Niman itech kanon onka yejon Kajli, kech youejkauj, niman kech tlanechikoltin ompa nosentlaliaj noita kech tomin notekitiltis. ¿Kanon tikonkuij yejon tomin?

 Tomin tlen notekitiltia ipan se Kajli kampa tosentlaliaj nokixtia itech donaciones tlen ompa notemaka. Alexander, se tokniuj akin chantij Kazajistán kijtoua: “Seki tomin tlen notemaka ipan donaciones notekitiltia para tiktlaxtlauaskej internet, niman okseki tlemach ken atl, niman tlauijli. Niman okseki tomin notekitiltia para tijkouaskej amatl, guantes, tlapajli niman tlen ika titlachipauaskej”. Niman tomin tlen nokaua notitlani kampa obra mundial para kitekitiltiskej ipan Kaltin tlen más uejueyimej niman patiojkej ipan nochi tlaltikpaktli.

 San ika, kemantika tomin tlen notekitiltia para noyektlalis Kajli kampa tosentlaliaj más ueyi, xijkon ken tomin tlen nopopoloua ipan ome noso yeyi metstin kampa tosentlaliaj. Ijkuak ijkon panoua tokniuan tlayekankej konnotsa tokniuj akin tlapaleuiya ipan LDC. Niman tla tokniuan akin tlapaleuiyaj ipan LDC kitaj ika kema noneki noyektlalis, kitekitiltia tomin tlen onka ipan obra mundial. Ipan xiuitl 2023, onoyektlalijkej 8,793 Kaltin kampa tosentlaliaj, niman onotekitilti 76,6 millones de dólares. Matikitakan ome tlen onoyektlalijkej.

 Ne Angola, se Kajli kampa tosentlaliaj tlen ikipiya 15 xiuitl ika onochijchiuj nonekiya noyektlalis. Nonekiya noyenkuilis tlauijli niman tepantin melak yotlajtlapanka noso yotsajtsayanka. Niman noijki akin nisiuj chantiya kualaniya pampa kijtouaya ika atl tlen notoyauaya ajsiya kampa inchan. Tokniuan akin tekiti ipan LDC okiyektlalijkej yejuin niman onotekitilti 9,285 dólares. Akin nisiuj chantiya melak omojkatlachixkej itech kenon onochiuj yejuin tekitl niman noijki melak okitlasojkamatkej.

 Ne Polonia, ikuatipan Kajli kampa tosentlaliaj melak kalakiya atl niman alfombra melak yoijtlakaujka. Kuakon tokniuan akin tlapaleuiya ipan LDC okiyektlalijkej para maka sa makalaki atl niman okipatlakej alfombra. Ipan yejuin tekitl tlen onochiuj onotekitilti 9,757 dólares. San ika, ipampa yejuin xok nonekis noyektlalis ipan miyek xiujtin.

 Ijkuak tiktlajpiyaj Kaltin kampa tosentlaliaj, xsan kichiua maka melak matiktekitiltikan donaciones tlen melak tikpatiojkaita, noijki kiueyichiua Jehová. Shaun, se tokniuj akin chanti archipiélago de Tonga, kijtoua: “Pampa tikintlajpiyaj niman tikinchipauaj Kaltin kampa tosentlaliaj ueli tikueyichiua Jehová kampa nochi kuajli onka niman nochi kuajli tekiti. Niman akin nikan chantij kuajli kita ika ompa tikueyichiua Jehová. Tipakij tikiminotsaskej nochimej mauajlakan ipan yejuin Kajli kampa tosentlaliaj”.

 Tinochimej uelis titlachipauaskej niman tiktlajpiyaskej Kaltin kampa tosentlaliaj. Marino, se tokniuj akin temachtia kenon tiktlajpiyas Kaltin kampa tosentlaliaj ne Australia, kijtoua: “Tiktlajpiyaskej Kajli kampa tosentlaliaj melak kualtsin tekitl niman nochimej uelis titlapaleuiskej. Ijkuak titlapaleuiyaj tikchiuaj ika maka melak miyek tomin manotekitilti niman uelis notekitiltis yejon tomin kampa más noneki”

 Joel, akin chanti India niman melak kuelita tlapaleuis ijkuak kinyektlalia Kaltin kampa tosentlaliaj, kijtoua: “Nitekitis iuan tokniuan nechpaleuiya maniknemili kenon titekitiskej ipan xochitlalpan”. Nicole, akin yotikteneujkaj, kijtoua: “Xyeuejkaui, tokniuan okiyektlalijkej baño pampa kalakiya atl niman nejua ononek nitlauatsas. Maski nejua xonikyektlali yejon, kema onitlapaleui maka yakaj mauetsi”

 Tla tejua noijki tikneki titlapaleuis matikintlajpiyakan Kaltin kampa tosentlaliaj xtlajto iuan tlayekankej akin nemij ipan motlanechikol. Maka keman xkilkaua ika tomin tlen tiktlalia ipan donaciones xsan notekitiltia ipan Kajli kampa timosentlalia, noijki tlen onka ipan nochi tlaltikpaktli. Uelis tiktlalis motomin kampa cajitas tlen onka kampa timosentlalia noso tikalakis ipan donate.pr418.com. Tlaxtlaui ipampa tlen tiktemaka.