Ipan marzo 2020, yejon Organización Mundial de la Salud okijto ika onka se kokolistli tlen itoka COVID-19, miyekej nion xkinemiliayaj ika uejkauiskia más de se xiuitl niman ika melak teijtlakoskia. Ipampa yejuin kokolistli, miyekej tlaltikpakchanejkej niman noijki iteixpantijkauan Jehová, melak yotlajyouijkej pampa melak najmanaj niman pampa xkipiyaj tlen ika nopanoltiskej. ¿Tlenon kichiujtokej iteixpantijkauan Jehová ijkon kinpaleuiskej imikniuan akin tlajyouijtokej ipampa yejuin kokolistli?

 Ipampa yejuin kokolistli COVID-19, Grupo akin kiyekana Tekitl itech Grupo akin Kinyekana iTeixpantijkauan Jehová, yokichiuj ika manosentlalikan ipan nochi tlaltikpaktli 950 grupos akin kitaj ken notepaleuiya. Yejuin grupos kinpaleuiyaj akin xmás kipiyaj tlen ompa nisiuj chantij, noijki kemantika oksekimej iteixpantijkauan Jehová kiseliaj tlen gobierno kitemaka. Niman yejuin grupos noijki kitaj kenon uelis nochiuiyan tlapaleuiskej.

 Matikteneuakan tlen opanok ne Paraguay. Se periódico okijto ika ipampa yejuin kokolistli, miyekej paraguayos xkipiayaj tlen kikuaskej. San ika, grupo akin kita ken notepaleuiya ne Paraguay, yopeujkaj kixelouaj despensas tlen kinxikoskia ome semanas. Yejuin despensa nokouaya ika 30 dólares. Ompa kuajkuiya tlen kikuaskej, tlen ika tlachipauaskej niman tlen ika naltiskej, tlen kaxiliskia para se familia kampa chantij nauimej.

 ¿Tlenon kichiuaj akin tlapaleuiyaj ijkon maka kinmajsis yejon kokolistli niman kintlajpiyaskej oksekimej? Kintekitiltiaj cubrebocas niman xmás nonisiuiyaj intech oksekimej. Noijki kuajli kitaj ika akin kinkouiliaj yejon despensas matekitikan kampa tlachipaujkan niman ika kuajli manotlajpiyakan itech yejuin kokolistli. Niman noijki kitaj ika akin kimitkij yejon despensas manotlajpiyakan, makitkikan incubrebocas, inguantes niman okseki tlen makintlajpiya, niman ika makichipauakan incarros niman okseki tlen kitekitiltiaj, noijki noita ika matlachipaujkan kampa kominkauaj despensas. Niman akin kixelotinemij despensas xnonisiuiyaj itech tokniuan ijkuak kominkauiliaj.

 Ipan enero de 2021, Grupo akin kiyekana Tekitl, okijto ika ueliskia notekitiltiskiaj 25 millones de dolares (ipantsin 515 millones de pesos), ijkon kinpaleuiskiaj akin tlajyouijtoyaj ipampa kokolistli COVID-19. Sucursales niman grupo akin kita ken kotepaleuiya kuajli okitakej kenon kitekitiltiskiaj yejuin donaciones niman kichiua nochi tlen ueli, ijkon kinkouiliskej tlen kinpoloua tokniuan kampa xmás patioj kisa. Matikitakan tlen opanok ne Chile, tokniuan akin tlapaleuiyaj kampa tlaixpoliui kinekiyaj kikouaskiaj 750 kilos de lentejas, san ika, san ipan se metstli melak opatiouak. Tokniuan okijtokej ika ijkon kikouaskiaj, san ika, ome horas sakin akin kintlanemakiltiskia okimijli ika xmás patioj kinmakaskia, pampa yakaj akin yokikoujka lentejas oksejpa okinkuepilito.

 Ijkuak tokniuan konkuiskiaj yejon lentejas, akin kintlanemakiltiskia okimijli ika xok kiminemakiltiskia, pampa okimijli ika yejuamej xkuajli kinxelouayaj yejon despensas ijkon ken oksekimej organizaciones. Se tokniuj san de isiujkan okitlajtlanili toTajtsin makipaleui, sakin okijli yejon tlakatl ika achto kixeloskiaj despensas, kuajli kitayaj ipan nochi tlanechikoltin akinomej yemelak noneki makinpaleuikan. Tokniuan okijlikej ika ijkuak kinyektlaliayaj yejon despensas san kitlaliayaj tlen yemelak kitekitiltiayaj tokniuan. Ika yejon, se despensa san kitkiya tlen se familia kintekitiltiaya. Sakin okijlikej ika nochi yejon donaciones tlen kiseliaj iteixpantijkauan Jehová, ken tomintsin niman yejon tekitl tlen kichiuaj, kisa ipan inyojlo. Yejon tlakatl melak omojkatlachix. Kuakon, yejua xsan okinmakak ijkon ken yokimijlika, noijki, ijkuak tokniuan oksejpa okikouatoj lentejas, okintlayokoli 400 kilos.

 Lusu, se tokniuj siuakauajli akin iueyi, chanti iuan makuijli ichanejkauan ne Liberia. Se tonajli ika kualkan chika tlakuayaj niman kipouayaj yejon amatlajkuilojli Mojmostla matomachtikan iTlajtol toTajtsin, ixuiuj akin kipiaya siete xiuitl, okitak ika xok kipiayaj tlen kikuaskiaj ika teotlak, yejua otetlajtolti: “¿Niman aman, tlenon tikuaskej?”. Nimantsin iabuelita okiyolseui ijkuak okijli ika yejua yokinotska Jehová niman yokitlajtlanilijka makinpaleui, niman kuajli kimatstoya ika yejua kinmakaskia tlen kinpolouaya, yejon teotlak, sekimej tokniuan tlayekankej okonnotskej Lusu niman okijlikej ika ueliskia konkuiskia se bolsa de despensa. Yejua techijlia: “Noxuitsin aman kimatstika ika Jehová kinkaki toteoyouan pampa yejua onechnankili”.

 Se siuatsintli ipan República Democrática del Congo, chanti inakastlan se familia akin iteixpantijkauan Jehová. Ijkuak okitak ika ivecinos kiselijtoyaj despensa itech okseki iteixpantijkauan, yejua okijto: “Ijkuak panos yejuin kokolistli tochiuaskej iteixpantijkauan Jehová, pampa yejuamej melak najmanaj inpampa imikniuan ipan yejuin tonaltin tlen melak tetlajyouilti”. Iueuentsin okitlajtolti: “¿Timochiuas iteixpantijkauj Jehová san ipampa se bolsa de arroz?”. Yejua okinankili: “Ka, xsan ipampa yejon, san ika, yejon bolsa de arroz kiteititia ika yemelak notlasojtlaj”.

 Ipampa donaciones tlen nemejuamej nenkitemakaj, iteixpantijkauan Jehová youel nimantsin kinpaleuiyaj imikniuan akin tlajyouijtokej ipampa yejuin kokolistli. Melak tiktlasojkamatij ipampa donaciones tlen nenkitemakaj ipan donate.pr418.com.