Akin tiiteixpantijkauan Jehová melak tikintlasojtlaj tokniuan niman ipampa tajmanaj (1 Pedro 2:17). Kanaj ijkon tomachiliaj ken Tannis, se tokniuj akin chanti Kenia. Yejua kijtoua: “Melak nikuelita nikmatis tlen inpan nochiuaj tokniuan ipan nochi tlaltikpaktli”. ¿Kenon iteixpantijkauan Jehová kimatij itech tlen inpan panotika tokniuan? Ipampa sección tlen itoka “Tlen panotika”, tlen onka desde 2013 ipan jw.org.

 Ipan yejuin sección noteijlia itech proyectos de construcción, niman kenon notepaleuiya kampa tlaixpoliui noso ijkuak nochiua itlaj tlen ueyi kijtosneki, ken ijkuak kisa se yenkuik Biblia. Niman noijki noijtoua kenon tokniuan tsauktokej ipampa intlaneltok. Ompa noijki noteijlia intech tlen kualtsin inpan nochiuaj tokniuan akin chikauak tenojnotsaj ken ijkuak noilnamiki imikilis Cristo. San ika, ¿akinomej kitejtemouaj tlen noneki manomati niman akinomej kijkuilouaj?

 Grupo akin kiyekana Tekitl itech Grupo akin Tlayekana, yejua kiyekana Oficina de Información Pública, kampa noita tlenon notlalis ipan “Tlen panotika”, yejuin oficina onka kampa noyekanaj nochi sucursales, ompa tlapaleuiyaj ipantsin 100 tokniuan niman sekimej tlapaleuiyaj desde inchan. Yejuin tokniuan kuajli kitaj tlen opanok niman kijkuilouaj, noijki tlajtolkuepaj niman kichijchiuaj tlaixkopinaltin tlen ompa notekitiltiskej. Yejuamej imiuan tlajtouaj tekiuajkej niman akin kipanoltiaj noticias, noijki imiuan temachtijkej. Ipan nochi tlaltikpaktli onka 80 secciones de Información Pública niman miyekej tokniuan ompa tlapaleuiyaj.

 Yejon tokniuan nochimej san sekan tekitij para kuajli kiteijliskej tlen opanok. Ijkuak tokniuan kitaj ika itlaj uelis noteijlis, yejuamej kuajli kitejtemouaj tla yemelak ijkon opanok, ika yejon yejuamej kintlajtoltiaj akin ompa nemiyaj niman ixtlamatkej. Niman ijkuak yokimatkej tlen opanok, yejuamej kijkuilouaj, kiyektlaliaj niman kintlaliliaj tlaixkopinaltin. Sakin kintitlaniliaj Grupo akin kiyekana Tekitl para makita.

 ¿Tlenon kimachiliaj tokniuan ijkuak kitaj tlen onka ipan “Tlen panotika”? Se tokniuj akin chanti Filipinas niman itoka Cheryl, kijtoua: “Melak nikuelita nikitas ika kualkan tlen inpan panotika tokniuan niman tlen kichiujtika ikalpan toTajtsin”.

 Miyekej melak kuelitaj kitaskej tlen kisa ipan “Tlen panotika” pampa yejuin xijkon ken tlen kisa ipan noticias. Tatiana, akin chanti Kazajistán, kijtoua: “Melak nikuelita nikitas tlen noteijlia ipan jw.org pampa ompa san notlalia tlen yemelak opanok”. Tokniuj Alma, akin chanti México, kijtoua: “Ipan noticias, san kisa tlen teajman, san ika, tlen kisa ipan jw.org melak teyolchikaua”.

 Kampa noijtoua “Tlen panotika” melauak niman kichikauas motlaneltokil. Bernard, akin chanti Kenia, kijtoua: “Melak nikuelita tlen noijtoua ipan ‘Tlen panotika’, pampa aman nikimita tokniuan kentla nofamilia maski san kanon manemikan. Noijki nikchiua teoyotl inpampa, niman hasta ueli nikintokayotia para makixikokan tlen ouijtika”. Bybron, se tokniuj siuatl akin chanti Kenia, kijtoua: “¡Melak nechyolpaktia ijkuak kisa se yenkuik Biblia ika okse tlajtojli! Yejon kichiua manikmachili ika toTajtsin tinochimej techtlasojtla”.

 Niman kampa kijtoua kenon tokniuan kintlaueltokaj, noijki uelis techyolchikauas. Se tokniuj akin chanti Kenia, akin itoka Jackline, kijtoua: “Ijkuak nitlanemilia itech kenon tokniuan otlaxikojkej, más kichikaua notlaneltokil. Niman ninokojtilia nikitas tlen okinpaleui matlaxikokan. Aman yonikitak ika tokniuan ouel otlaxikojkej pampa okichiujkej teoyotl, onomachtijkej Biblia niman onokuikatijkej tlakuikaltin”.

 Se tokniuj akin chanti Costa Rica, itoka Beatriz, melak kuelita kitas kampa noijtoua tlen panotika kampa tlaixpoliui, yejua kijtoua: “Nechmojkatlachialtia kenon ikalpan toTajtsin nimantsin kinmaka tokniuan tlen kinpoloua, niman kichiua ika tlasojtlalistli. Yejon kichiua maniknemili ika yemelak ninemi ipan ikalpan toTajtsin”.

 ¡Melak tikuelitaj pampa techijliaj “Tlen panotika”, tlen onka ipan jw.org! Ipampa yejuin uelis tikmatiskej tlen inpan nochiuaj tokniuan ipan nochi tlaltikpaktli. Yejuin xueliskiaj tikchiuaskiaj tla xnenkitemakaskiaj nemotomintsin ijkon ken nonextia ipan donate.pr418.com. Tiktlasojkamatij pampa nenkuelitaj nenkitemakaskej nemotomintsin.