Ikipiya kanaj 130 xiuitl ika iteixpantijkauan Jehová kipanoltia uejueyimej tlanechikoltin sejse xiuitl. Ipan yejuin uejueyimej tlanechikoltin, nopanoltiaj 40 tlamachtiltin, tlakuikaltin, videos niman kintlajtoltiaj sekimej tokniuan tlen yokinpanok. Tla nochi yejuin noneki kinyolchikauas akin yaskej, noneki kuajli tlakaktoskej niman kitaskej tlen nopanoltiaj (Lucas 2:20). ¿Kenon notekitiltia nemotomitsin niman ijkon uelis nochimej kinpaleuis yejuin maski san kanon nemiskej?

 Ipan seki kalpamej yokinchijchiujkej yenkuikej estadios niman yokintlalijkej kampa kipanoltiaj audios niman videos. Ijkuak titlaneuij yejon estadios para tikpanoltiskej uejueyimej tlanechikoltin, ¿tleka ok tiktlaliaj on tlen tejuamej tikinkuij para audio niman video? David, akin tlapaleuiya ipan Departamento de Broadcasting ipan oficinas kampa noyekanaj nochi sucursales, kijtoua tleka: “Matikilnamikikan ika nopanoltiaj miyekej tlamachtiltin niman miyekan kampa techtlanejtiaj xkipiyaj tlen noneki para akin ompa nosentlaliaj kuajli matlakaktokan ipantsin 6 horas. Ken bocinas tlen notekitiltiaj ipan estadios, san kitekitiltiaj para kijtoskej niman kintlaliskej tlakuikaltin tlen xuejkauij, niman pantallas kintekitiltiaj para kitlaliskej akinon tetlantiuj, kenon nauiltiaj niman tlen kinemakaj. San ika, ipan toueyitlanechikoluan nopanoltiaj videos tlen uejkauij niman tiknekij ika tlen noijtoua ipan plataforma kuajli makakisti niman manasikamati”.

 Pampa kemantika nopatla kampa tikinpanoltiaj toueyitlanechikoluan, kuakon noijki nopatla ken notlaliaj audio niman video. Niman tekitl peua ijkuak notlapejpenia kanon nopanoltis toueyitlanechikol. Departamento Local de Broadcasting kita kanon nopanoltiskej toueyitlanechikoluan niman kechmej kichiaj nosentlaliskej niman kanon notlaliskej. Sakin tokniuan kitaj kanon uelis kintlaliskej inbocinas niman inpantallas niman kenon kinyektlaliskej. Sa ika tlami kichijchiuaj se lista niman ijkon kitaskej tlenon noneki para kuajli makakisti programa niman kuajli manesi.

 San ika, más achijtsin ouijtika ijkuak toueyitlanechikol nopanoltia ika miyekej tlajtoltin. Ijkuak ijkon panoua, akin tlajtolkuepa kiselijtiuj audio niman video, niman tlen kitlajtolkuepa nopanoltia ipan radio, ijkon nochiua ika nochi tlajtoltin. Kuakon, ika seki reproductores nochiua ika video manesi ijkon ken kakisti ipan audio, niman yejuin ueli nochiua hasta ika 8 tlajtoltin niman ijkon akin ompa nemij san noyejua kitstokej niman kikaktokej ika intlajtol. David kijtoua: “Yejuin aparatos melak ouijtika para tikintekitiltis, ika yejon, tokniuan akin kitekitiltiaj melak noneki nomachtiskej”.

 Miyek sucursales ikipiyaj nochi tlen noneki itech audio niman video tlen notekitiltiaj sejse xiuitl. Niman tokniuan nokojtiliaj kontitlaniskej nochi tlen notekitiltis ipan se toueyitlanechikol. San matikonteneuakan sucursal tlen onka Estados Unidos, tlen kitekitiltia ipantsin 200.000 dólares a ijkuak kontitlani nochi tlen noneki. San ika, yejuin xmás patioj kisa ijkon ken tikinkouas yenkuikej aparatos niman tikinyektlalijtias. Steven, akin otlapaleui para onoitak tla nochi onotlali tlen notekitiltia itech audio niman video para se ueyitlanechikojli ne Canadá, kijtoua: “Tokniuan okitakej para maka itlaj mapoliui, nion se tornillo noso cable. Nochi onopouj niman onotlali ijkon ken noneki niman ijkon uelis notekitiltis ipan okse ueyi tlanechikojli”.

 Melak patioj kisa ijkuak tikintlaneuij tlen notekitiltis ipan audio niman video niman tlen techintlanejtiaj kemantika xkuajkualtin niman seki yoijtlakaujkej. Ika yejon, miyekpa nokoua tlen tiktekitiltiskej. Ipan yejuin tonaltin se pantalla LED tlen melak ueyi, tlen notekitiltia kalijtik niman tlen kipiya 5 por 3 metros (16 por 10 pies) patioj kanaj 24.000 dólares, niman se cable de micrófono tlen kipiya 15 metros ika ueyak (50 pies), patioj kanaj 20 dólares. Ika yejon tiktlajtlaniliaj Departamento de Compras makita kech tikpopoloskej achto titlakouaskej (Lucas 14:28). Kachtopa notlajtoltiaj: ¿kechmej kitekitiltiskej yejuin equipo?, ¿yemelak noneki manokoua?, ¿onka kampa uelis noyejyeuas? Niman ¿nemij tokniuan akin kuajli yonomachtijkej para ijkon kuajli kitekitiltiskej niman kipiyaj tlen ika kinyektlaliskej?

 Para uelis uejkauiskej yejon equipos itech audio niman video, ijkon xmiyek tomin nopopolos itech tomintsin tlen kitemakaj tokniuan, noneki miyekpa noyektlaliskej niman nochipauaskej. Noijki tikintekitiltiaj cajas tlen kixikouaj para notitlaniskej yejuin equipos niman ijkon maka itlaj makinpano, niman kemantika yejuin cajas noijki noneki kinyektlaliskej.

 Sekimej akin xiteixpantijkauan Jehová yokinmojkatlachialtij kenon melak kuajli kakisti audio niman video itech toueyitlanechikoluan. Se matikonteneuakan, se akin tekiti ipan se compañía audiovisual tlen melak ueyi kijtosneki ipan nochi tlaltikpaktli okijto kenon melak kuajli ones niman okakistik nochi tlen onotlali niman onokak. Jonathan, akin otlapaleui kuajli manotlali niman manotekitilti nochi itech audio niman video ipan toueyitlanechikol, techijlia tlen opanok: “Ijkuak yejon tlakatl okimat ika nochimej akin nemiyaj ipan yejon Departamento san tlapaleuijtoyaj niman xnochi kimatiyaj, xueliya kineltokaya. Okijto ika nochi tlen tejuamej otikchiujkej ipan se tonajli uan tlajko, kampa yejua tekitiya uejkauiskiaj makuili tonajli”. Ipan okse toueyitlanechikol, se tlakatl akin kitaya instalaciones okijto: “Nikan melak miyekej panouaj akin yonomachtijkej niman ueltokej itech audiovisual, san ika, xkeman nikitaya sekimej akin melak ueltokej ijkon ken nemejuamej”.

 ¿Niman tejua? ¿Tikuelita tias ipan toueyitlanechikoluan ipampa audios niman videos? Kanaj timomachilia ijkon ken David akin chanti Inglaterra. Yejua kijtoua: “Inikpiya 88 xiuitl niman nochipa niauj ipan toueyitlanechikoluan. Aman melak xouijtika nikita nikasikamatis niman nitlakaktos. Pampa melak miyek videos nopanoltiaj, programa melak kuajli kakisti niman nasikamati. ¡Nochi melak totoka panoua!”. Niman Micheal, akin chanti Nigeria, kijtoua: “Pampa tokniuan xok ouijtika kitaj kikakiskej tlamachtiltin niman kimitaskej videos, uelij kuajli tlakaktokej niman xtlaj kinpajsoloua”.

 Ijkuak tias ipan toueyitlanechikol yeyi tonajli noso tlen nopanoltiaj iuan miyekej países itech yejuin xiuitl “¡Xteijlikan on kuajli tlajtojli!”, xnemili nochi tlen ononek nochiuas para ijkon kuajli tijkakis niman tikitas programa. Yejuin ueli nochiua ipampa tomintsin tlen tiktemaka niman tlen notemaka ipan donate.pr418.com. ¡Melak timechtlasojkamachiliaj!