“Ijkuak titeasikamatij ueli kichiua kuajli matouikakan imiuan oksekimej” (Declaración de Principios sobre la Tolerancia de la UNESCO, 1995).

 Ijkuak yakaj xteasikamati, xtetlakaita niman kintlauelita oksekimej. Niman yejon uelis kichiuas manokualanikan, manochikoitakan niman noijki manotlajyouiltikan.

 San ika, miyekej xsan noijki kasikamatij tlenon kijtosneki titeasikamatis. Miyekej kinemiliaj ika yakaj akin teasikamati kita kuajli nochi tlen kichiuaj oksekimej niman xtlaj kimijlia. San ika, miyekej kineltokaj ijkuak Biblia kijtoua ika yakaj akin teasikamati kitlakaita tlen nochimej kitlapejpeniaj kineltokaskej niman kichiuaskej, maski xkichiuaj ken yejuamej.

 ¿Uelis techpaleuis Biblia matiteasikamatikan ipan yejuin tonaltin?

Biblia techpaleuiya matiteasikamatikan

 Biblia techmachtia kenon titeasikamatiskej. Ompa kijtoua: “Nochi tlakatl ma mech[i]ta ika nentenotskej” (Filipenses 4:5). Noijki techijlia matiteijyouikan, matitetlasojtlakan niman matikinchiuilikan tlen kuajli oksekimej. Ika yejon, akin kichiuaj yejuin, xkinchiualtiaj oksekimej makichiuakan tlen yejuamej kinekij maski xtlanemiliaj ijkon ken yejuamej.

 San ika, ipan Biblia techijlia tlen toTajtsin kineki matikchiuakan. Ompa kijtoua: “Yejua [toTajtsin] yomitsijli, tlaltikpakchane, tlen kuajli” (Miqueas 6:8). ToTajtsin noijki techijlia ipan Biblia tlenon noneki tikchiuaskej tla tiknekij tiyolpakiskej (Isaías 48:17, 18).

 ToTajtsin xotechnauati tejuamej matiteyolkuitikan niman matitetlajtlakolmakakan. Biblia kuajli kijtoua: “Pero san Dios okitemakak on tlanauatijli niman san yejua teyolkuitia niman tetlajtlakolmaka, […] ¿tiakinon para tikijtos tla sen tlakatl okichiu on tlen kuajli noso xkuajli?” (Santiago 4:12). Yejua kitekauilia ika cada se makitlapejpeni tlen kichiuas niman makixnamiki tlen xkuajli okitlapejpeni (Deuteronomio 30:19).

Biblia techpaleuiya matitetlakaitakan

 Biblia kijtoua: “Kuajli xkintlakaitakan nochi tlakatl” (1 Pedro 2:17). Akin kitlapejpeniaj kichiuaskej tlen kijtoua Biblia, kuajli kintlakaitaj nochimej tlaltikpakchanejkej maski san tlenon kineltokaj niman kichiuaj (Lucas 6:31). Yejuin xkijtosneki tla kiseliaj nochi tlen oksekimej kineltokaj niman tlen kinemiliaj, noso ika kinpaleuiyaj itech nochi tlen kitlapejpeniaj. San ika, nokojtiliaj kuajli kinnotsaskej niman kintlakaitaskej ijkon ken okichiuj Jesús.

 Sejpatipan, Jesús otlajto iuan siuatl akin kipiaya okse religión tlen yejua xkiseliaya. Noijki, yejon tlakatl akin iuan nemiya xkatka iueuentsin niman Jesús xkuajli kitaya tlen kichiujtoya. San ika, nochi yejuin xokichiuj maka makitlakaita (Juan 4:9, 17-24).

 Ijkon ken Jesús, akin kichiuaj ken Cristo kimijliaj tlen kineltokaj nochimej akin kinekij kinkakiskej, san ika, kichiuaj ika tetlakaitalistli (1 Pedro 3:15). Biblia kinnauatia akin kichiuaj ken Cristo maka makinchiualtikan oksekimej makiselikan tlen yejuamej kineltokaj. Akin itekipanojkauj Cristo “xkitocaroua teuan nokualanijtinemis, yej kemaj, kuajli tenotski yes iuan nochi tlakatl”, niman hasta imiuan akin xsan noijki tlanemiliaj ken yejuamej (2 Timoteo 2:24).

Biblia techpaleuiya maka matitetlauelitakan

 Biblia techijlia: “Xchiuakan kanika para inuan nochimej xnemikan ikan yolseuilistli” (Hebreos 12:14). Akin kitejtemoua kipiyas yolseuilistli, xtetlauelita niman nokojtilia kuajli nouikas imiuan oksekimej. San ika, nochipa kitlakamati tlen kijtoua toTajtsin (Mateo 5:9). Biblia noijki kimijlia akin kichiuaj ken Cristo makintlasojtlakan intlauelikniuan. Yejuin kijtosneki kuajli kinnotsaskej maski kichiuiliaj tlen xkuajli (Mateo 5:44).

 Ipan Proverbios 6:16-19 kijtoua ika toTajtsin “sanoyej kikualania” ika sekimej matetlajyouiltikan niman matepijpinaujtikan. San ika, nikan kitekitiltia tlajtojli “sanoyej kikualania” para kijtos ika toTajtsin kitlauelita tlen xkuajli kichiuaj tlaltikpakchanejkej. Biblia noijki kijtoua ika toTajtsin kinektika kinpaleuis niman kintlapopoluis nochimej akin kinekij nopatlaskej niman akin kinekij kitlakamatiskej itlanauatiluan (Isaías 55:7).

Textos itech Biblia tlen tlajtouaj itech kenon titeasikamatiskej niman titetlakaitaskej

 Tito 3:2: “Ma tenotskej, niman ma kiteititikan yolyemanilistli itech nochi tlakatl”.

 Mateo 7:12: “Ijkon tej, xkinchiuilikan oksekimej on tlajtlamach tlen nemejuamej nenkinekiskiaj ma mechchiuilikan”.

 Josué 24:15: “Xtlapejpenikan aman akinon nenkitekipanoskej”.

 Hechos 10:34: “Dios xkichikoita se tlakatl iuan okse”.

 Habacuc 1:12, 13: “Xuelis tijkauilis [toTajtsin] maonia tlen xkuajli”.

 Romanos 12:19: “Maka sano nemejuamej itlaj xtekuepiltikan, yej xkauilikan Dios ma yejua tetlakuepilti, pampa on Yektlajkuilojli ijkin kijtoua: “Nejua nitetlakuepiltis; nitetlaxtlauilis ken kitocaroua. Ijkin kijtoua toTEKO [Jehová]”. a

 Jehová xtechijlia tejuamej matotlakuepiltikan. Yejua yokitlapejpeni kemanon kichiuas tlen noneki. Tla tikneki tikmatis más, xkita tlamachtijli “¿Alguna vez se hará justicia en el mundo?”.