¿Tiknemilia ika kemantika ouijtika tikitas tla itlaj melauak noso xmelauak? Aman miyekej kineltokaj san tlen kinemiliaj niman kimachiliaj niman xkitejtemouaj tla tlen kineltokaj melauak noso xmelauak. Yejuin, ika inglés noixmati ken “post-truth,” niman melak notekitiltia. Ipan 2016 onotlali ipan diccionario Oxford, ipampa yejon melak miyekej xok kineltokaj tla onka tlen melauak.

 Desde yeuejkaui miyekej ijkon tlanemiliayaj. Ikipiya kanaj 2,000 xiuitl ika tekiuaj itech Roma Poncio Pilato okitlajtolti Jesús: “¿Niman katlejua on tlen melauak?” (Juan 18:38). Maski Pilato xkichiaya makinankilikan, tlen otetlajtolti melak ueyi kijtosneki. Biblia technankilia yejuin, niman tlen ompa tiknextiaj uelis techpaleuis matikneltokakan ika uelis tiknextiskej tlen melauak maski miyekej xkineltokaj yejuin.

¿Onka tlen melauak?

 Kema. Biblia kikui tlajtojli melauak ijkuak kiteititia ika itlaj yemelak opanok niman ijkuak yakaj kichiua tlen kuajli. Noijki temachtia ika itech Jehová a ualeua tlen melauak, ika yejon, kiteneua ken se toTajtsin akin nochipa kichiua tlen kijtoua (Salmo 31:5). Noijki, Biblia techijlia tlen melauak itech toTajtsin niman kijtoua ika tlen melauak yeskia ken se tlauijli tlen techtlauiluiya niman techyekana ipan yejuin xkuajli tlaltikpaktli (Salmo 43:3; Juan 17:17).

¿Kenon uelis tiknextiskej tlen melauak?

 ToTajtsin xkineki matikneltokakan tlen kijtoua Biblia san ipampa tlen tikmachiliaj. Yejua kineki kuajli matomachtikan niman itech matitlanemilikan (Romanos 12:1). Yejua kineki matikixmatikan niman matiktlasojtlakan ika nochi totlamachilis. Noijki kineki matikitakan ika tlen tiueltiuej ipan Biblia yejua tlen melauak (Mateo 22:37, 38; Hechos 17:11).

¿Akinon kachtopa otekajkayauj?

 Biblia kijtoua ika Diablo noso Satanás yejua akin kachtopa otekajkayauj. Ika yejon, kiteneua ken “imintataj on yejuan tlakajkayauaj” (Juan 8:44). Yejua okimijli tlen xmelauak itech toTajtsin kachtopa tlakatl niman siuatl akin onenkej ipan tlaltikpaktli (Génesis 3:1-6, 13, 17-19; 5:5). Desde ijkuakon, Satanás xkijtoua tlen melauak itech toTajtsin niman nochimej kinkajkayaua (Apocalipsis 12:9).

¿Tleka aman miyekej tekajkayauaj?

 Tinemij ipan tiempo tlen Biblia kiteneua ken “itlamiyan tonaltin”. Satanás melak miyekej yokinkajkayauj, ika yejon, noijki miyekej tekajkayauaj (2 Timoteo 3:1, 13). Hasta ipan tlaneltokiltin tekajkayauaj. Biblia kijtoua ika yejkoskia tiempo ijkuak tlakamej “kinekiskej kinkakiskej miyekej temachtijkej para ma kinmachtikan on tlen yejuamej kinekiskej ika inyoltechikaualis. Kitlalkauiskej on tlen melauak” (2 Timoteo 4:3, 4).

¿Tleka ueyi kijtosneki tlen melauak?

 Tla yakaj kijtoua tlen melauak, itech tlaneltokaj. Tla se xakaj itech tlaneltoka, xuelis kinextis iuan akinon nouikas niman xuelis san sekan nopaleuiskej imiuan oksekimej. Biblia temachtia ika toTajtsin kineki matikueyichiuakan ika tlen melauak. Ompa kijtoua: “Dios yejua Espíritu, niman on yejuan kimauistiliaj ika onkaj kichiuaskej ikan iminespíritu niman ika tlen melauak ken Dios kineki” (Juan 4:24). Tikmatis tlen melauak itech Biblia, uelis mitspaleuis tikitas tlen xkuajli yokijtojkej tlaneltokiltin. Uelis tikpouas serie itech tlamachtiltin tlen itoka: “Tlen miyekej yokiteneuilijkej toTajtsin”.

¿Tleka kineki toTajtsin manikixmati tlen melauak?

 ToTajtsin kineki nochipa xnemi. Ika yejon, noneki tikixmatis tlen melauak itech toTajtsin (1 Timoteo 2:4). Tejua uelis kuajli iuan timouikas toTajtsin, tla tikixmati tlen kuelita niman tlen xkuelita niman tla timokojtilia tikchiuas tlen kuajli (Salmo 15:1, 2). Pampa toTajtsin kineki matikixmatikan tlen melauak, okuajtitlan Jesús ipan tlaltikpaktli. Ika yejon, kineki matijkakikan tlen Jesús otemachti (Mateo 17:5; Juan 18:37).

¿Ajsis se tonajli ijkuak toTajtsin kinpopolos akin tlakajkayauaj?

 Kema. ToTajtsin xkuelita ijkuak yakaj tlakajkayaua. Yejua yokijto ika kinpopolos akin ijkon kichiuaj (Salmo 5:6). Ijkuak ijkon kichiuas, nochiuas tlen kijtoua Proverbios 12:19: “On tlen melauak xkaman nopatla”.