•   Ipan 7 de septiembre de 2022, periódico The Guardian, okijto ika ne China ipan yejuin xiuitl xokiyauj niman melak otonatik ken xkeman panouaya.

•   Ipan 26 de agosto de 2022, noticias ONU, okijto ika ne África ipan seki kalpamej ikuikaya naui xiuitl ika xkiyaui niman nesi ika ipan yejuin xiuitl noijki xkiyauis.

•   Ipan 23 de agosto de 2022, noticias BBC, okijto ika tlajkotipan Europa nesi ika tlauakis, yopanok kanaj 500 xiuitl ika xijkon panouaya.

 Miyekej ixtlamatkej kijtouaj ika yejuin ok nochiujtos niman ika hasta uelis más tlaijtlakauis. ¿Tlenon kijtoua Biblia itech yejuin? ¿Tlenon tikchiaj ika tlayekapan?

 Yejuin tlen okijto Biblia ika panotoskia ipan yejuin tonaltin:

•   “Miyekan, [...] onyas apistli” (Lucas 21:11).

 Pampa tlauaki xonka tlen tikuaskej niman Biblia yokijtojka ika titlajyouiskiaj niman timikiskiaj ipampa yejuin (Apocalipsis 6:6, 8).

 Biblia techijlia tleka ijkon panoua, ompa kijtoua:

•   “Se tlaltikpakchane nion xkimati kanon cholos ijkuak nejnemi” (Jeremías 10:23, Traducción del Nuevo Mundo).

 Yejuin kijtosneki ika tlen kitlapejpeniaj kichiuaskej tlaltikpakchanejkej xkuajli onkisa tla san yejuamej noyekanaj. Tlen kitlapejpeniaj kichiuaskej kichiua maka maonia atl niman melak matlauaki.

•   Miyekej científicos kijtouaj ika tlen tlaltikpakchanejkej kichiuaj, yokichiuj ika melak matonati, yejon kichiua ika miyekan melak matlauaki.

•   Pampa xkuajli tlen kitlapejpeniaj kichiuaskej políticos niman nochimej akin san intech tlanemiliaj, nochi tlen kualtsin onka ipan tlaltikpaktli iijtlakaujtika, xok itlaj atl, xok itlaj kojtin niman xok kuajli kitekitiltiaj tlen kualtsin onka.

 San ika, Biblia, techyolseuiya.

 Biblia kijtoua ika toTajtsin kichiuas maka matitlajyouikan ipampa atl. ¿Kenon kichiuas?

1.  1. ToTajtsin kinpopolos “on yejhuan quixoxotoniaj on tlalticpactli” (Apocalipsis 11:18, In Yencuic Iyectlajtoltzin Dios). Itlaj tlen kichiua maka maonia atl, yejua on tlakamej xkuajkualtin niman akin san intech tlanemiliaj, ika yejon, Jehová kinpopolos (2 Timoteo 3:1, 2).

2.  2. “On xalpatlajkan nochiuas sen amanalko” (Isaías 35:1, 6, 7). ToTajtsin kiyektlalis nochi tlen yoijtlakauj pampa xkiyaui niman kichiuas ika nochi tlaltikpaktli manokuepa se kualtsin xochitlalpan kampa onias ueyi atl.

3.  3. “Tejua ticuidaroua in tlaltikpaktli; ipan titlakiauitia para ma tlatlaki” (Salmo 65:9). Ipan nochi tlaltikpaktli onias miyek tlakuajli niman atl tlen chipauak, pampa toTajtsin tinochimej techteochiuas.