Ipan 24 de febrero de 2022, soldados de Rusia okalajkej Ucrania. Niman pampa yejuin melak yotlaijtlako, miyekej akin ompa chantij yononek kisaskej. a

 “Uajxiniyaj bombas niman okseki tlen toponi. Hasta xueli nikijtoua kenijki melak oninomojti. Ijkuak otikmatkej ika miyekej kistoyaj de Ucrania ipan seki trenes, tejuamej noijki otikiskej. Cada se de tejuamej san nonekiya kitkis se pitentsin mochila kampa nonekiya kikalaktis nochi tlen noneki. San ouel otikimitkikej toamauan, medicinas, atl niman achijtsin tlakuajli. Chika uajxintoyaj bombas tejuamej nochi ompa otijkaujkej niman otiajkej kampa kisaj trenes” (Natalia, de Járkov, Ucrania).

 “Xnikneltokaya tla melauak nochiuaskia guerra. San totoka opeuj nijkaki kenijki chikauak tlatoponiya niman ventanas hasta ooliniyaj, ika yejon, onikis de nochan a las ocho ika kualkan niman san onikitkik tlen más nonekiya. Onikajsik tren tlen yaya para Lviv, niman sakin onikajsik se autobús tlen yaya para Polonia” (Nadia, de Járkov).

Ipan yejuin tlamachtijli tikasikamatis yejuin:

•  ¿Tleka miyekej kistokej de inpaís?

•  ¿Tlenon uelis kinyolseuis akin xchanejkej?

•  ¿Uelis kinpaleuis Biblia akin xchanejkej?

 ¿Tleka miyekej kistokej de inpaís?

 Kuajli tikmatstokej ika tlen panotika Ucrania opeuj pampa soldados de Rusia otlaixnamikitoj, san ika, Biblia techijlia okseki tlen techpaleuiya matikasikamatikan tleka panotika nochi yejuin.

•   Tekiuajkej xueli kinmakaj tlen noneki akin kiyekanaj. Miyekpa tekiuajkej kinchiualtiaj akin kinyekanaj makichiuakan itlaj tlen xkuajli noso kemantika hasta kintlajyouiltiaj (Eclesiastés 4:1; 8:9).

•   Satanás “yejuan tlamandaroua ipan in tlaltikpaktli”, kichiua ika miyekej makichiuakan tlen melak xkuajli, yejua ika, Biblia kijtoua: “On diablo ipan ima kimpiya nochimej on tlakamej de in tlaltikpaktli” (Juan 14:30; 1 Juan 5:19).

•   Desde yeuejkaui uajnochiujtiuj tlen melak xkuajli, san ika, aman tinemij ipan yejon tonaltin tlen Biblia yokinteneujka. Ipan 2 Timoteo 3:1 itech Traducción del Nuevo Mundo, kijtoua: “Ipan itlamiyan tonaltin panos tlen melak xkuajli niman ouijtika yes titlaxikos”. Kema, Biblia yokijtojka ika ipan itlamiyan tonaltin panoskiaj guerras, oniaskia apistli, sajnoye oniaskiaj kokolistin niman miyekan sajnoye tlaixpoliuiskia. Nochi yejuin kichiuaskia ika miyekej makisakan de inchan (Lucas 21:10, 11).

 ¿Tlenon uelis kinyolseuis akin xchanejkej?

 Biblia kijtoua ika Jehová, b akin otlachijchiuj, melak kintlasojtla akin xchanejkej niman noijki kijtoua ika yejua sajnoye kimiknelia (Deuteronomio 10:18). Ipan Biblia miyekpa noteneua iTekiuajyo toTajtsin, yejuin se gobierno tlen Jehová yokitlali. Niman toTajtsin yokijto ika kitekitiltis yejuin Tekiuajyotl niman ijkon kinpaleuis nochimej akin tlajyouijtokej pampa yononek kisaskej de inpaís. Biblia noijki kijtoua ika yejuin gobierno tlen onka ne cielo kintekipatlas nochimej tekiuajkej de yejuin tlaltikpaktli niman san yejua tlayekanas (Daniel 2:44; Mateo 6:10). Jehová kikuis iTekiuajyo niman ijkon kipopolos Satanás (Romanos 16:20). ITekiuajyo toTajtsin kipopolos nochi tlen kichiua ika miyekej manotlauelitakan, niman ijkuak ijkon kichiuas, nochimej noitaskej ken se familia. Xok yakaj nonekis kisas de ichan pampa Biblia kijtoua: “Notlaliskej, inseselti itsintlan ikojyo uva niman itsintlan ikojyo higo, niman xakaj kichiuas makuekuetlakakan; pampa ikamak Jehová akin nochi ueli kichiua yokijto” (Miqueas 4:4, TNM).

 San iTekiuajyo toTajtsin uelis kipopolos nochi tlen kichiua ika miyekej makisakan de inchan. Jehová kitekitiltis yejuin Tekiuajyotl niman ijkon kichiuas tlen yokijto. Matikitakan seki tlen kipopolos:

•   Guerras. Jehová kichiuas ika “nochiuiyan ipan in tlaltikpaktli maka ma onyaj guerras” (Salmo 46:9). Xkita tlamachtijli “¿Cómo llegará a haber paz en la Tierra?”, niman ijkon tikmatis kenijki toTajtsin kipopolos nochi tlen xkuajli.

•   Tlen xkuajli kinchiuiliaj oksekimej. Jehová “kimanauis on yejuan tlajyouiya, yejuan xkipiya akinon kipaleuis” (Salmo 72:14). Xkita revista tlen itoka “Maka sa matitetlauelitakan”, niman ijkon tikitas kenijki sekimej ueli kipatlaj tlen xkuajli kichiuayaj.

•   Mayantli. “Yejua [Jehová] kimanauis on mayanki yejuan kitlajtlanilis ma kipaleui” (Salmo 72:12). Xkita tlamachtijli “¿Es realista esperar un sistema económico justo?”, niman ijkon tikmatis kenijki toTajtsin kichiuas ika akin xkipiyaj tlen ika nopanoltiskej, maka itlaj makinpolo.

•   Apistli. “Onias miyek trigo ipan nochi tlaltikpaktli” (Salmo 72:16, TNM). Xkita tlamachtijli “¿Un mundo sin hambre?”, niman ijkon tikitas tlenon kichiuas toTajtsin para nochimej makipiyakan tlen kikuaskej.

 ¿Uelis kinpaleuis Biblia akin xchanejkej?

 Kema. Biblia kijtouaj ika toTajtsin kinpaleuis nochimej akin yononek kisaskej de inchan, san ika xsan yejon, noijki kimijlia tlenon uelis kichiuaskej niman ijkon kixikoskej nochi tlen aman kixnamiktokej.

 Texto tlen mitspaleuis: “Maka itlaj xkonmatstiakan, yej nochipa xchiuakan oración. Xtlajtlanilikan Dios tlen mechpaloua niman xmakakan tlaxtlauijli. Niman Dios mechmakas yolseuilistli más ueyi yejuan xakaj uelis kajsikamatis. Niman in yolseuilistli kejeuas nemoyojlo niman nemotlamachilis” (Filipenses 4:6, 7).

 Tlen kijtosneki: Nochipa ijkuak itlaj mopan nochiuas xtlajtlanili toTajtsin mamitspaleui nochipa xyolseujto. Xkita tlamachtijli “Filipenses 4:6, 7 | ‘No se inquieten por nada’”.