¡NOCHIPA XKITSTO!
Tlen xkuajli panoua ipampa política | ¿Tlenon kijtoua Biblia?
Ipan nochi tlaltikpaktli, melak miyek tlen xkuajli panoua ipampa política.
Ne México, ipan xiuitl 2023 niman 2024, ijkuak onotlapejpenijkej tekiuajkej, okimiktijkej kanaj 39 candidatos políticos. Tlen opanok melak otemojkatlachialti.
Ne Europa, noijki panoua miyek tlen xkuajli ipampa política. Ipan 15 de mayo de 2024, sekimej okiyejyekojkej kimiktiskej kachtopa ministro de Eslovaquia.
Ipan 13 de Julio de 2024, okiyejyekojkej kimiktiskej akin katka tekiuaj de Estados Unidos, Donald Trump. Yejon melak okinmojkatlachialti tlaltikpakchanejkej.
¿Tleka panoua tlen xkuajli ipampa política? ¿Ajsis se tonajli ijkuak xok ijkon panos? ¿Tlenon kijtoua Biblia?
Biblia yokijtojka ika miyekej noxexeloskiaj ipampa política
Biblia okijtojka ika ipan yejuin tonaltin, tlen noixmati ken “ijkuak nisiu tlatlalpoliuis”, miyekej kichiuaskiaj tlen xkuajli niman xnotlajtolnamikiskiaj.
“Ijkuak nisiu tlatlalpoliuis tlamach nochiuas tlen sanoyej xkuajli. On tlakamej ijkin nouikaskej: sanoyej notlajsojtlaskej sano yejuamej, […] xitlaj kitlajsojkamatiskej, sanoyej xompayejyeuaskej, […] Xkintlajsojtlaskej oksekimej nion xteikneliskej, […] sanoyej xipanteitaskej, […]. teichtakauiskej, xnomojtiskej itlaj kichiuaskej, noueyimatiskej” (2 Timoteo 3:1-4).
Biblia noijki yokijtojka ika ipan yejuin tonaltin, miyekej nouisokiskiaj niman noijki miyekej kixnamikiskiaj tekiuajkej (Lucas 21:9, Nota). San ika, tlen xkuajli panoua niman ken texexeloua política, xuejkaujtipan popoliuis.
Tlamis tlen xkuajli panoua ipampa política
Biblia kijtoua ika toTajtsin kintekipatlas nochi yejuin gobiernos ika iGobierno tlen onias ne cielo.
“ToTajtsin iluikakchane kitlalis se tekiuajyotl […]. Kinkuechos niman kinpopolos nochi tekiuajyomej, niman san yejua nochipa nemis” (Daniel 2:44, TNM).
IGobierno toTajtsin kichiuas ika tinochimej san sekan matinemikan niman matikpiyakan yolseuilistli.
Itekiuaj, Jesucristo, noixmati ken “iKoneuj Tekiuaj akin kuajkuis Yolseuilistli”. Yejua kitas ika nochipa maonia yolseuilistli (Isaías 9:6, 7, TNM).
Aman, akin kipaleuiyaj yejuin Gobierno, nokojtiliaj nemiskej ika yolseuilistli. Biblia kijtoua ijkin itech yejuamej, ika: “Inespadas kinkuepaskej tepostlaxoponaltin, niman inlanzas kinkuepaskej sakatektli yejuan ika pixkaskej. On chanejkej ipan on naciones xokaman nouijsokiskej, nion xok kintlayejyekoltiskej para ueliskej tlauisokiskej” (Isaías 2:3, 4).
Tla tikneki tikmatis más, xkita artículo “¿Qué cosas logrará el Reino de Dios?” niman xkita video ¿Tlenon kijtosneki iTekiuajyo toTajtsin?