Tekoneuan akin iuejueyimej noneki kuajli kintlajpiyaskej intajuan. Biblia kijtoua ika nochimej tekoneuan akin tlaneltokaj itech toTajtsin noneki “ma kintekipanokan infamilia ken kitocaroua. Ijki tej, kintlajsojkamachiliskej on tlen achtopa yejuamej okiselijkej de intajuan ijkuak kojkonej katkaj. Yejua in sanoyej kuajli niman kixpakaita Dios” (1 Timoteo 5:4). Ijkuak tekoneuan kuajli kintlajpiyaj intajuan, kitlakamatstokej Biblia kampa kijtoua ika noneki makintlakaitakan intajuan (Efesios 6:2, 3).

 Biblia xtechijlia kenon noneki tikintlajpiyaskej totajuan akin youeuentsintiakej. San ika, kema kijtoua tlenon okichiujkej sekimej tlakamej niman siuamej akin yeuejkaui onenkej. Noijki ompa tiknextiaj tlen uelis kinpaleuis akin kintlajpiyaj intajuan.

•  ¿Kenon sekimej akin kinteneua Biblia okintlajpixkej intajuan akin youeuentsintiakaj?

•  ¿Kenon techpaleuiya Biblia?

•  ¿Biblia kijtoua ika tekoneuan noneki kintlajpiyaskej intajuan inchan?

 Pampa tlamantik tlen kixnamiktoyaj, xsan noijki tlen okichiujkej.

•   José uejka chantiya itech itataj Jacob ijkuak iueuentsin katka. San ika, ijkuak ouel, okuikak itataj machantiti nisiuj de kampa yejua chantiya. José kuajli okitlajpix itataj, okimakak kanon chantiskia niman tlen kikuaskia (Génesis 45:9-11; 47:11, 12).

•   Rut ochantito iuan imonan niman melak chikauak otekit para kitlajpiyas (Rut 1:16; 2:2, 17, 18, 23).

•   Jesús, achto mikiskia, kuajli okitak ika yakaj makitlajpiya inan, María, pampa isiuakauajli katka (Juan 19:26, 27). a

 Tikintlajpiyas motajuan uelis melak mitssiauitis. Ipan Biblia uelis tiknextis tlen uelis mitspaleuis.

•   Xkintlakaita motajuan.

   Tlen kijtoua Biblia: “Xtlakaita motataj niman monanaj” (Éxodo 20:12).

   Ken uelis tikchiuas: Xkinkauili motajuan makichiuakan tlen ok ueli kichiuaj niman yejuamej makijtokan kenon kinekiskiaj makintlajpiyakan. Xkimasikamati niman ika tetlakaitalistli xkinpaleui ijkuak nonekis.

•   Xteasikamati niman xtetlapopolui.

   Tlen kijtoua Biblia: “Yejuan tlamatki ueli kiteltlalia itlauel. Niman kipiya tlakaitalistli ijkuak tetlapojpoluiya” (Proverbios 19:11).

   Ken uelis tikchiuas: Kanaj motajuan kijtoskej itlaj tlen mitsyolkokos, noso kanaj xmitstlasojkamachiliskej tlen tikchiua inpampa. Ijkuak ijkon panos, xmotlajtolti: “¿Kenon ninomachiliskia tla xmás ueliskia itlaj nikchiuas ken notajuan? ¿Xnitlauelmikiskia?”. Tla tikasimati ken nomachiliaj niman tikintlapopoluiya, xueyiyas tlauejli.

•   Kuajli xtetlajtolti.

   Tlen kijtoua Biblia: “Ijkuak se itlaj kichiuasneki niman xachtoj tetlajtoltia kenijki kuajli kichiuas intech miyekej tlamatkej, xkuajli kisa. Pero tla achtoj kintlajtoltia on yejuan tlamatkej, sanoyej kuajli kisa” (Proverbios 15:22).

   Ken uelis tikchiuas: Uelis titetlajtoltis kenon tikintlajpiyas niman tikinpajtis motajuan. Xkita tla kampa tichanti kinpaleuiyaj akin iueuentsintsintin. Xtlajto imiuan oksekimej akin noijki kintlajpixtokej intajuan. Tla tikinpiya mokniuan, ¿uelis imiuan titlajtos itech kenon uelis nemochimej nenkintlajpiyaskej nemotajuan?

•   Maka xmotekimikti.

   Tlen kijtoua Biblia: “Yejuan noknelia kipiya tlamatkilistli” (Proverbios 11:2).

   Ken uelis tikchiuas: Xmatsto ika xnochi uelis tikchiuas. Xkilnamiki ika tinochimej uelis tonsiauiskej niman kemantika xtechajxilis tiempo para tikchiuaskej nochi tlen tiknekiskiaj inpampa totajuan. Tla tikita ika tikintlajpiyas motajuan melak mitstekipachoua, xkintlajtlanili mochanejkauan mamitspaleuikan noso xtlakeua se akin kintlajpiya ueuentsitsintin.

•   Xmotlajpiya.

   Tlen kijtoua Biblia: “Xakaj nemi yejuan xkitlajsojtla itlalnakayo, yej kitlakualtia niman cuidaroua” (Efesios 5:29).

   Ken uelis tikchiuas: Maski noneki tikintlajpiyas motajuan, tejua noijki noneki timotlajpiyas, niman tla yotimonamikti, noijki noneki tikintlajpiyas mochanejkauan. Kipiya kuajli titlakuas niman kuajli tikochis (Eclesiastés 4:6). Niman kemantika nonekis timoseuis. Ijkon, ijkuak tikintlajpiyas motajuan, tikchiuas ika moyojlo, xmitstekipachos niman xmás tisiauis.

 Biblia xtlaj kijtoua itech yejuin. Sekimej kinkauiliaj intajuan manemikan inchan. San ika, kanaj sakin kitaskej ika intajuan más kuajli nemiskej tla kinuikaj kampa kintlajpiyaj akin iueuentsintsintin. Melak kuajli tla nochi familia nosentlalia para kijtoskej tlenon kichiuaskej niman ijkon nochimej kuajli manemikan (Gálatas 6:4, 5).