¡Kema! Biblia uelis mitspaleuis maka ijkon xtlanemili, pampa Biblia iTlajtol toTajtsin niman kinyolseuiya akin noyolkokouaj (2 Corintios 7:6). Maski Biblia xse libro tlen tlajtoua itech tlenon noneki tikchiuaskej para kuajli matekiti totlamachilis, tlen kijtoua kema yokinpaleui miyekej maka sa makinemilikan nomiktiskej. Niman tejua noijki uelis mitspaleuis.

•  ¿Tlenon techijlia Biblia matikchiuakan?

•  ¿Biblia kinteneua tlaltikpakchanejkej akin kinekiyaj mikiskej?

•  ¿Katlejua tlaxeloltin itech Biblia uelis mitspaleuiskej maka sa xnemili timomiktis?

•  ¿Tlenon uelis tikchiuaskej tla se toamigo techijlia ika xok kineki nemis?

•  ¿Niman tla yonikyejyekojka ninomiktis?

• ● Xkijto kenon timomachilia.

   Tlen Biblia kijtoua: “Sen tetlajsojkaikniu nochipa tenotski, niman ijkuak onkaj ajmantli nochiua ken sen melauak teikniu” (Proverbios 17:17).

   Tlen kijtosneki: Ijkuak melak tajmanaj, noneki yakaj matechyolseui.

   Tla xakaj tikijlia kenon timomachilia, tlen tikmachilia uelis melak mitstlajyouiltis. San ika, tla yakaj tikijlia, xok sajnoye timajmanas niman sejneka tikitas tlen mitsajmantika.

   Xyejyeko yejuin: Amanin yakaj iuan xtlajto, uelis iuan se mochanejkauj noso iuan yakaj akin melak kuajli iuan timouika. a Noijki, uelis tikijkuilos kenon timomachilia.

• ● Xkitati se tlapajtijketl.

   Tlen Biblia kijtoua: “Para on yejuan xkualoj xnoneki sen tepajtijketl, pero para on yejuan kualoj kemaj” (Mateo 9:12).

   Tlen kijtosneki: Ijkuak tikualoj, noneki tikontaskej tlapajtijketl.

   Ijkuak yakaj peua kinemilia nomiktis, kanaj kipiya se kokolistli ipan itsontekon tlen kichiua maka sa kuajli matlanemili. Ijkon ken xtipinauij ijkuak techajsi se kokolistli ipan totlalnakayo, noijki xnoneki tipinauiskej tla tikpiyaj se kokolistli ipan totsontekon. Niman ijkuak ijkon topan panos, tlapajtijkej uelis techpaleuiskej.

   Xyejyeko yejuin: Nimantsin xtejtemo se tlapajtijketl akin uelis mitspaleuis.

• ● Xkilnamiki ika toTajtsin melak mitspatiojkaita.

   Tlen Biblia kijtoua: “¿Tlen xkinnamakaj makuijli tototsitsimej san ika ome centavo? Pero nion semej yejuamej xkimelkaua Dios. Yejua ika maka xmomojtikan pampa nemejuamej más nenueyi kijtosnekij xken miyekej tototsitsinmej” (Lucas 12:6, 7).

   Tlen kijtosneki: ToTajtsin melak mitspatiojkaita.

   Kemantika uelis san moselti timomachilis, san ika, xsan moselti tinemi. ToTajtsin kimatstika tlen mopan panoua. Niman maski xok tikneki tinemis, yejua najmana mopampa. Ipan Salmo 51:17 kijtoua ika toTajtsin xkikaua “yejuan melauak noyolkokoua”. Kuajli xmatsto ika toTajtsin melak mitstlasojtla niman xkineki xmomikti.

   Xyejyeko yejuin: Xtejtemo ipan Biblia kampa kijtoua ika toTajtsin mitstlasojtla. Uelis tikitas libro Acerquémonos a Jehová ipan capítulo 24, niman ompa tiknextis seki tlen mitspaleuis.

• ● Xnotsa toTajtsin.

   Tlen Biblia kijtoua: “Xmaktilikan Dios nochi on tlajtlamach yejuan mechyolpajsoloua pampa yejua kineki mechpaleuis” (1 Pedro 5:7).

   Tlen kijtosneki: ToTajtsin kineki xkijli nochi tlen tikmachilia niman tlen mitsajmana.

   ToTajtsin uelis mitsyolseuis niman mitspaleuis xxiko nochi tlen tikixnamiktika (Filipenses 4:6, 7, 13). Ijkon kinpaleuiya toTajtsin akin itech nonisiuiyaj (Salmo 55:22).

   Xyejyeko yejuin: Amanin xnotsa toTajtsin. Xnotsa ika itoka, Jehová, niman xkijli kenon timomachilia (Salmo 83:18). Xtlajtlanili mamitspaleui xtlaxiko.

• ● Xtlanemili itech tlamachialistli tlen kijtoua Biblia.

   Tlen Biblia kijtoua: “Yejua on totlamachalis kimelajkapiya toalma ijkon ken on teposcadena kimelajkapiya on barco ijkuak ika yokisalojkej. Totlamachalis kojtik niman melajkaonkaj” (Hebreos 6:19).

   Tlen kijtosneki: Tlen tikmachilia uelis melak nopapatlas. Kemantika uelis melak tipakis niman kemantika melak timajmanas, kentla tla tlen tikmachilia san kanon ika yomitsuikak, ijkon ken ijkuak chikauak ajakakiyaui, ajakatl san kanon ika yokuikak barco. San ika, ijkon ken se ancla kimelajkapiya se barco, tlamachialistli tlen onka ipan Biblia noijki kimelajkapiyas monemilis.

   Yejuin tlamachialistli xsan tiknejnemiliaj, yejuin tlamachialistli yemelak nochiuas pampa toTajtsin yejua akin kijtoua ika kipopolos nochi tlen techtlajyouiltia (Apocalipsis 21:4).

   Xyejyeko yejuin: Ipan tlamachtijli 5 itech folleto ¡ToTajtsin techijlia tlen kualtsin!, más xkamapoua itech on tlamachialistli tlen techijlia Biblia.

• ● Xchiua itlaj tlen tikuelita.

   Tlen Biblia kijtoua: “On pakilistli yejuan onkaj ipan iyojlo sen tlakatl, yejua nochiua ken sen kuajli pajtli yejuan tepajtia” (Proverbios 17:22).

   Tlen kijtosneki: Ijkuak tikchiuaj itlaj tlen tikuelitaj, totlamachilis más kuajli tekiti niman xtiknemiliaj tlen xkinamiki.

   Xyejyeko yejuin: Xchiua itlaj tlen tikuelita. Uelis titlauelkakis, uelis tikamapouas itlaj tlen mamitsyolchikaua noso uelis tikchiuas itlaj okse tlen mamitsyolpakti. Noijki, más tiyolpakis tla tikinpaleuiya oksekimej.

• ● Xmotlajpiya.

   Tlen Biblia kijtoua: “Tla tikchiua ejercicio, [...] mitspaleuiya ipan motlalnakayo” (1 Timoteo 4:8).

   Tlen kijtosneki: Melak mitspaleuis tla kuajli tikochi, tla kuajli titlakua niman tla tikchiua ejercicio.

   Xyejyeko yejuin: Xkisa niman xnejnemiti. Uelis chikauak tinejnemis maski san quince minutos.

• ● Xkilnamiki ika tlen tikmachilia, niman okseki tlemach, sakin nopatla.

   Tlen Biblia kijtoua: “Nemejuamej xnenkimatij tlinon nochiuas mostla” (Santiago 4:14).

   Tlen kijtosneki: Kemantika san noneki panos tiempo niman ijkon noyektlalis tlen tikixnamikij, hasta on tlen tiknemiliaj ika xkeman uelis nopatlas, kema uelis noyektlalis.

   Maski amanin nesi ika tlen tikixnamiktok melak ouijtika, xkilnamiki ika mostla uelis nopatlas. Kuakon, maka xmosiaujkaua (2 Corintios 4:8). Sakin uelis nopatlas tlen mitsajmana, san ika, tla timomiktia, xok yakaj uelis kipatlas.

   Xyejyeko yejuin: Xkamapoua ipan Biblia intech sekimej akin melak onajmankej niman hasta kinekiyaj mikiskej. Xkita kenon onopatlak tlen kixnamiktoyaj. Aman san sekimej matikinteneuakan.

 Kema. Biblia kinteneua sekimej tlaltikpakchanejkej akin okijtokej ika kinekiyaj mikiskej. ToTajtsin ximiuan okualan, yej okinpaleui. Yejua noijki uelis mitspaleuis.

Elías

•  ● ¿Akinon katka Elías? Elías se teotlajtoketl katka niman melak yolchikauak katka, san ika, kemantika noijki onajman. Santiago 5:17 kijtoua ika “yejua sano ijki tlakatl katka ken tejuamej”.

•  ● ¿Tleka kinekiya mikis? Sejpatsin, Elías melak onomojti, san iselti onomachili niman okinemili ika xtlaj kuajli kichiuaya. Ika yejon, okijli Jehová: “¡Ma ijki noTEKO! ¡Xnechkixtili no nemilis!” (1 Reyes 19:4).

•  ● ¿Tlenon okipaleui maka ijkon matlanemili? Elías okinots toTajtsin niman okijli kenon nomachiliaya. ¿Niman kenon okiyolchikauj Jehová? Okititi ika yejua melak kojtik katka niman ika najmanaya ipampa. Noijki okijli Elías ika melak kipatiojkaitaya niman ika melak tepaleuiaya. Niman okititlanili yakaj para makitlajpiya.

•  ▸ Xkamapoua tlen ipan opanok Elías: 1 Reyes 19:2-18.

Job

•  ● ¿Akinon katka Job? Job melak kipiaya tomin. Noijki kinpiaya miyekej ikoneuan niman kitekichiuiliaya toTajtsin.

•  ● ¿Tleka kinekiya mikis? Se tonajli, melak miyek tlen xkuajli ipan opanok Job. Nochi tlen kipiaya okipolo, omijkej nochimej ikoneuan niman okajsik se kokolistli tlen melak tekoko. Niman xsan yejon, noijki okijlikej ika yejua itlajtlakol ika ijkon ipan panotoya. Job melak onajman, hasta okijto: “Xok nikneki ninemis” (Job 7:16).

•  ● ¿Tlenon okipaleui maka ijkon matlanemili? Job okinots Jehová niman otlajto imiuan iamigos (Job 10:1-3). Elihú, akin kuajli iuan nouikaya, okasikamat Job niman okiyolseui. Okipaleui maka kenon matlanemili itech tlen kixnamiktoya. Niman melak kuajli ika Job okinek kikakis tlen Jehová okijli niman okinokauili makipaleui.

•  ▸ Xkamapoua tlen ipan opanok Job: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Akinon katka Moisés? Yejua kiyekanaya kalpan Israel niman se teotlajtoketl katka akin omelajkanen itech toTajtsin.

•  ● ¿Tleka kinekiya mikis? Moisés melak ueyi tekitl kipiaya, miyekpa kitejteneuayaj niman oajsik se tonajli ijkuak nochi yejon melak okisiauiti. Yejua ika, okijli toTajtsin: “Más kuajli para xnechmikti” (Números 11:11, 15).

•  ● ¿Tlenon okipaleui maka ijkon matlanemili? Moisés okijli toTajtsin kenon nomachiliaya. Niman toTajtsin okichiuj ika sekimej tlakamej makipaleuikan Moisés niman ijkon maka melak masiaui.

•  ▸ Xkamapoua tlen ipan opanok Moisés: Números 11:4-6, 10-17.