Ka, tlaltikpaktli xkeman popoliuis, tlatlas nion xnopatlas ika okse tlaltikpaktli. Biblia kijtoua ika toTajtsin okichijchiuj tlaltikpaktli para nochipa ipan machantilo.

•   “On yolmelajkej tlakamej kinmakaskej on kuajli tlajli, para ipan chantiskej nochipa” (Salmo 37:29).

•   “Otiktlalij in tlaltikpaktli ipan icimientos para maka kaman ma nejkuani” (Salmo 104:5).

•   “In tlaltikpaktli xkaman nopatla” (Eclesiastés 1:4).

•   “On toTEKO Dios yejuan okichijchiu on cielo, yejuan okichijchiu in tlaltikpaktli, niman kuajli okitlalij xpara san ijki onyas, yej para ipan ma chantikan on tlaltikpaktlakamej” (Isaías 45:18).

 ToTajtsin xkinkauilis tlaltikpakchanejkej makipopolokan yejuin tlaltikpaktli, nion ika guerras, nion ika itlaj okse. Ipan Biblia kijtoua ika toTajtsin kinpopolos on yejua kixoxotoniaj yejuin tlaltikpaktli (Apocalipsis 11:18). ¿Kenon kichiuas?

 ToTajtsin kintekipatlas tekiuajkej akin xuelij kitlajpiyaj yejuin tlaltikpaktli, niman kichiuas ika se Tekiuajyotl tlen onka ne iluikak (Daniel 2:​44; Mateo 6:​9, 10). Jesucristo, ikoneuj toTajtsin, yejua akin tekiuajtis ipan yejuin Tekiuajyotl (Isaías 9:​6, 7). Ijkuak Jesús onen ipan tlaltikpaktli, okintelti ajakakiyaujtin (Marcos 4:​35-​41). Jesús kuajli tlayekanas ipan nochi tlaltikpaktli, niman kichiuas maka sa matlaixpoliui. Kiyenkuilis tlaltikpaktli para nochi maonia ijkon ken katka ipan xochitlalpan Edén (Mateo 19:28; Lucas 23:43).

 Ka. Sekimej ijkon kinemiliaj pampa xkuajli ken kasikamatij 2 Pedro 3:7, ompa kijtoua: “Pero in cielos niman in tlaltikpaktli yejuan amantsin onkaj sano ika itlanauatil Dios kinkajtikaj para kinxoxotonis ikan tlitl”. Aman matikitakan ome tlemach tlen techpaleuis matikasikamatikan yejuin:

1.   Ipan Biblia, tlajtojli cielos, tlaltikpaktli niman tlitl miyek tlen uelis kijtosnekis. Ipan Génesis 11:1, Traducción del Nuevo Mundo kijtoua: “Aman tej, nochi tlaltikpaktli tlajtouaya san se tlajtojli”. Ijkuak nikan kijtoua “tlaltikpaktli” tlajtojtika itech tlaltikpakchanejkej.

2.   Tlen noteneua ipan 2 Pedro 3:7 kuajli techajsikamachiltia tlenon kijtosneki “cielos”, “tlaltikpaktli” niman “tlitl”. Ipan versículos 5 niman 6 tlajtoua itech Apachiuilistli. Ijkuak opanok yejon, nochimej tlaltikpakchanejkej opopoliujkej, san ika, tlaltikpaktli xopopoliuj. Apachiuilistli xokipopolo tlaltikpaktli, yej okinpopolo tlaltikpakchanejkej (Génesis 6:​11). Niman ijkuak kijtoua ika okinpopolojkej “cielos”, kijtosneki ika okinpopolojkej akin tlayekanayaj ipan yejon tonaltin. Aman kuajli tikasikamatij ika tlaltikpaktli xopopoliuj, opopoliujkej tlaltikpakchanejkej. Noé niman ichanejkauan omakiskej ijkuak okinpopolojkej akin xkuajkualtin, niman yejuamej okitemiltijkej tlaltikpaktli (Génesis 8:15-18).

 Ijkon ken ijkuak opanok Apachiuilistli, on “tlitl” noso tlapopolouilistli tlen noteneua ipan 2 Pedro 3:7, kinpopolos xkuajkualtin tlakamej, xkijtosneki tla kipopolos tlaltikpaktli. ToTajtsin techijlia ika onias “yenkuik cielo” niman “yenkuik tlaltikpaktli” kampa “nochimej nouikaskej yolmelajkej” (2 Pedro 3:​13). “Yenkuik tlaltikpaktli” kijtosneki, tlaltikpakchanejkej akin kitlakamatij toTajtsin, niman “yenkuik cielo” kijtosneki se yenkuik gobierno noso iTekiuajyo toTajtsin. Niman yejuin Tekiuajyotl kichiuas ika tlaltikpaktli manokuepa se kualtsin xochitlalpan (Apocalipsis 21:1-4).