ToTajtsin xkuelita matiauilnemikan (1 Tesalonicenses 4:3). Biblia kijtoua ika yakaj auilnemi ijkuak noteka iuan akin xixnamik, ijkuak se tlakatl niman se siuatl san sekan notekaj maski xinonamiktiaj, ijkuak se tlakatl noteka iuan okse tlakatl niman ijkuak se siuatl noteka iuan okse siuatl.

•  ¿Tleka kineki toTajtsin manonamiktikan akin san sekan nemij?

•  ¿Kuajli tla akin xnonamiktiaj kachtopa san sekan nemij niman ijkon kitaskej tla nasikamatij?

•  ¿Tlenon uelis kinpaleuis mayolpakikan akin yononamiktijkej?

•   ToTajtsin okitlali namiktilistli. Yejua ijkon okichiuj ijkuak okinnamikti kachtopa tlakatl niman kachtopa siuatl (Génesis 2:22-24). ToTajtsin xkinekiya ika se tlakatl niman se siuatl san sekan manemikan tla xnonamiktiaj.

•   ToTajtsin kimatstika kenon uelis tiyolpakiskej. Yejua okinamikti se tlakatl iuan se siuatl niman ijkon nochipa san sekan manemikan. ToTajtsin kinekiya ika yejuin namiktilistli makipaleui niman makitlajpiya se familia. San matikonnemilikan yejuin: tla tiknekij tikyektlaliskej itlaj tlen otijkoujkej, nonekis tikitstiaskej amatl tlen kuajkui niman ijkon uelis tikyektlaliskej. Noijki ijkon, tla tiknekij nochipa tiyolpakiskej iuan tofamilia, noneki tikchiuaskej tlen toTajtsin techijlia. Tla ijkon tikchiuaj, nochipa kuajli tonkisaskej (Isaías 48:17, 18).

•   Akin san sekan notekaj maski xinonamiktiaj melak tlajyouiyaj. Uelis mitspanoltiliskej se kokolistli, xkuajli timomachilis niman uelis timopinajtis noso timokoneuajtis.

•   ToTajtsin okinmakak se kualtsin tetlayokolijli tlaltikpakchanejkej: mauelikan makinpiyakan inkoneuan ijkuak notekaskej iuan imixnamik. Matikilnamikikan ika toTajtsin melak kipatiojkaita nemilistli. Ika yejon, yejua kineki ika tinochimej matikpatiojkaitakan yejon tetlayokolijli niman san manotekakan akin yononamiktijkej. Ijkon tiktlakaitaskej namiktilistli (Hebreos 13:4).

 Akin xinonamiktiaj xnoneki san sekan nemiskej niman ijkon kitaskej tla nasikamatij niman noxeloskej tla xnasikamatij. Tla kinekij yolpakiskej, noneki omemej nokojtiliskej para nochipa san sekan nopaleuiskej niman kiyektlaliskej tlauejli. a Niman san uelis ijkon kichiuaskej tla nonamiktiaj (Mateo 19:6).

 Nochimej akin yononamiktijkej kemantika kipiyaj tlauejli. San ika, uelis nochipa yolpakiskej tla kichiuaj tlen Biblia kijtoua. Matikimitakan seki textos:

•   Kachtopa xkita tlen kipoloua moixnamik (1 Corintios 7:3-5; Filipenses 2:3, 4).

•   Nochipa xtlasojtla moixnamik niman xtlakaita (Efesios 5:25, 33).

•   Kuajli xnemili tlen tikijlis moixnamik (Proverbios 12:18).

•   Maka nimantsin xkualani niman nimantsin xtetlapopolui (Colosenses 3:13, 14).