Tlen noijtoua: Iteixpantijkauan Jehová xkiseliaj makinpajtikan pampa xtlaneltokaj itech medicina.

 Tlen melauak: Tiiteixpantijkauan Jehová tiktejtemouaj kuajli matechpajtikan. Ijkuak tejuamej noso yakaj tochanejkauj kualo noso noneki makitekikan, tikintejtemouaj tepajtikej akin melak kuajli kixmatij intekiyo niman xkitekitiltiaj yestli. Melak tiktlasojkamatij tlemach yenkuik tlen yokis niman yokichijchiujkej akin tekitij ipan medicina. Ipan miyek países noijki xkitekitiltiaj yestli ijkuak kinpajtiaj tlaltikpakchanejkej, ijkon ken iteixpantijkauan Jehová kitejtemouaj makinpajtikan. Ipan yejuin tonajli san akinon uelis kitlapejpenis maka makitlalilikan yestli ijkuak kipajtiskej pampa uelis kajsis se kokolistli tlen uajlauj ipan yestli, kemantika xkiselia noso xkinamiki totlalnakayo niman kemantika akin tepajtiaj nopopolouaj ijkuak tetlaliliaj yestli.

 Tlen noijtoua: Iteixpantijkauan Jehová nopajtiaj san ika intlaneltokil.

 Tlen melauak: Tejuamej xtopajtiaj san ika totlaneltokil, xkeman ijkon tikchiuaj.

 Tlen noijtoua: Melak patioj timopajtis tla xtikselia yestli.

 Tlen melauak: Tiktejtemos okse tlen ika timopajtis kampa xnotekitiltia yestli kanaj uelis patioj kisas, san ika, melak tepaleuij. a

 Tlen noijtoua: Miyekej iteixpantijkauan Jehová, maski kokonej, mikij nochi xiujtin pampa xkiseliaj makintlalilikan yestli.

 Tlen melauak: Yejuin tlen noijtoua xmelak. Ipan yejuin tonajli nemij tepajtikej akin xkitekitiltiaj yestli ijkuak yakaj kitekij maski melak ouijtika, tlen noixmatij ken operación ortopédica, operación de corazón niman trasplantes de órganos. b Akin xkiseliaj makintlalilikan yestli, maski kokonej, noijki kuajli pajtij noso kemantika melak kuajli pajtij xijkon ken akin kiseliaj. c Tlen kema, xakaj uelis kijtos tla se pajtis pampa kiselia noso mikis pampa xkiselia yestli.

 Ipampa totlaneltokil niman xipampa medicina. Ipan Tlajkuiloltin ika Hebreo niman ika Griego technauatia ika maka matiktekitiltikan yestli (Génesis 9:4; Levítico 17:10; Deuteronomio 12:23; Hechos 15:28, 29). Noijki, toTajtsin kita yestli ken nemilistli (Levítico 17:14). Ika yejon, iteixpantijkauan Jehová tiktlakamatij tlen technauatia Biblia ika maka makitekitiltikan yestli pampa tiktlakaitaj toTajtsin, akin otechmakak tonemilis.

 Yeuejkaui tepajtikej kijtouayaj ika medicina tlen xkipiya yestli melak xkuajli katka niman tla se xkinotlaliliaya yestli kijliayaj ika kineki mikis. San ika, yejon tlen kijtouayaj yeuejkaui aman yonopatlak. Matikteneuakan yejuin, ipan 2004 se revista tlen tlajtouaya itech medicina okijkuilo yejuin: “Miyek tlemach tlen yononexti niman ika kinpajtiaj iteixpantijkauan Jehová tlen xkitekitiltia yestli uelis ika titepajtiskej ipan xiujtin tlen uajlauej”. d Niman ipan 2010, amoxtli Medicina transfusional okijto ika ipampa yejuin tlen kitekitiltiaj iteixpantijkauan Jehová “uelis tikchiuaskej ika tlen kitokayotiaj ‘cirugía sin sangre’ melak manoixmati niman manotekitilti ipan nochi cirugías”.

 Melak miyekej tepajtikej ipan nochi tlaltikpaktli ijkuak yakaj kitekij maski melak ouijtika, kitekitiltijtokej tlemach tlen kinpaleuiya maka miyek matoyaui yestli niman xkitlaliliaj okseki. Yejuin tlemach tlen notekitiltijtok noijki onka ipan okseki países kampa xonka miyek tomin niman miyekej tlaltikpakchanejkej akin xiteixpantijkauan Jehová kitlajtlanij ijkon makinpajtikan.